ទោះបីមានសម្ពាធពីលោក ដូណាល់ ត្រាំ ក្រុមហ៊ុន Ford សុខចិត្តផ្ទេរផលិតកម្មរថយន្តទៅប្រទេសចិន
ចុះផ្សាយនៅថ្ងៃ៖
ស្តាប់ - ០៤:០៣
ក្រុមហ៊ុនផលិតរថយន្តអាមេរិក Ford បានសំរេចចិត្តផលិតរថយន្តតូចម៉ូដែល Focus នៅប្រទេសចិន។ ហើយរថយន្តទាំងនោះនឹងនាំចេញពីចិន ដើម្បីយកទៅលក់លើទឹកដីអាមេរិក។ កន្លងមក លោកប្រធានាធិបតី ដូណាល់ ត្រាំ តែងប្រើសំដីព្រមានចំពោះក្រុមហ៊ុនអាមេរិកណា ដែលនិយមផ្ទេររោងចក្រផលិតកម្មទៅបរទេស។ ប៉ុន្តែ តាមរយៈការសំរេចចិត្តរបស់ក្រុមហ៊ុន Fordបែបនេះហាក់បង្ហាញឲ្យឃើញថា សេចក្តីព្រមានរបស់លោកប្រធានាធិបតីអាមេរិកពុំសូវមានប្រសិទ្ធិភាពឡើយ។
កាលពីដើមឆ្នាំ២០១៧ នេះ លោក ដូណាល់ ត្រាំ បានបង្ហាញក្តីរំភើបរីករាយ នៅពេលទទួលដំណឹងថា ក្រុមហ៊ុនផលិតរថយន្ត Ford បានផ្លាស់ប្តូរចិត្តឈប់វិនិយោគនៅប្រទេសម៉ិចសិក ក្នុងការតំឡើងរថយន្តខ្នាតតូចម៉ូដែល Focus។ ក្រោយពីបានជាប់ឆ្នោតក្លាយជាប្រធានាធិបតីភ្លាម លោក ដូណាល់ ត្រាំ តែងបានគំរាមយកពន្ធក្នុងកំរិតអត្រាខ្ពស់ចំពោះក្រុមហ៊ុនផលិតរថយន្តអាមេរិកណា ដែលផ្ទេរការងារទៅបរទេស ហើយនាំចូលរថយន្តមកលក់លើទីផ្សារអាមេរិក។ តំបូងឡើយ ម្នាក់ៗយល់ឃើញថា ក្រុមហ៊ុន Ford ហាក់បន្ទន់ឥរិយាបថចង់យកចិត្តលោកប្រធានាធិបតីថ្មី តាមរយៈការសំរេចចិត្តឈប់វិនិយោគនៅប្រទេសម៉ិចសិច។ ប៉ុន្តែ នាពេលនោះ ក្រុមហ៊ុនមិនបានបញ្ជាក់ពីការសំរេចចិត្តចំពោះទីតាំងផលិតរថយន្តម៉ូដែល Focus ឡើយ។
ប៉ុន្តែ ៦ ខែក្រោយមក លើសពីការស្មានទៅទៀត ក្រុមហ៊ុន Ford បែរជាក្រឡាស់ចិត្តផ្ទេរការវិនិយោគនេះទៅប្រទេសចិនវិញ។ រោងចក្រនេះនឹងមានទីតាំងស្ថិតនៅទីក្រុងឆុងគីង (Chongqing)។ បើតាមការគ្រោងទុក ចាប់ពីឆ្នាំ២០១៩ រថយន្តម៉ូដែល Ford Focus នឹងនាំចេញពីប្រទេសចិន ដើម្បីផ្គត់ផ្គង់ទីផ្សារអាមេរិក។ តាមពិត អស់រយៈពេលរាប់ខែមកហើយ ដែលក្រុមហ៊ុន Ford បានគិតពិចារណាស្វែងរកទីតាំងថ្មី ដើម្បីធានាផលិតកម្មតម្លើងរថយន្តម៉ូដែល Focus។ បច្ចុប្បន្ន រថយន្តប្រភេទនេះកំពុងតែត្រូវបានផលិតនៅលើទឹកដីអាមេរិកនាទីក្រុង Wayne នៃរដ្ឋ Michigan។ ប៉ុន្តែ ក្រុមហ៊ុនធ្លាប់បានថ្អូញថ្អែរជាញឹកញយហើយថា វាជាការលំបាកណាស់ក្នុងការរក្សាទុករោងចក្រតម្លើងរថយន្តនៅលើទឹកដីអាមេរិក ដោយសារតែក្រុមហ៊ុនពុំសូវបានទទួលប្រាក់ចំណេញច្រើន។
លើសពីនេះទៅទៀត ដោយសារតែតម្លៃសាំងចុះថោក អតិថិជនជាច្រើននាក់ពុំសូវនិយមប្រើប្រាស់រថយន្តខ្នាតតូចម៉ូដែល Focus នេះឡើយ។ គេឃើញថាអ្នកប្រើប្រាស់បែរជានិយមទិញរថយន្តខ្ពស់ខ្នាតធំ (4x4) ឬរថយន្តខ្ពស់គ្មានតំបូលពីក្រោយ (pick up)។ ការណ៍នេះកំពុងតែធ្វើឲ្យស្ថានភាពលក់រថយន្តម៉ូដែល Focus កាន់តែជួបការលំបាកខ្លាំងថែមទៀត។ មែនទែនទៅ ពោលគឺកាលពីខែមេសា ឆ្នាំ២០១៦ អតីតប្រធានក្រុមហ៊ុន គឺលោក Mark Fields បានសំរេចចិត្តវិនិយោគទឹកប្រាក់ចំនួន ១,៦ ពាន់លានដុល្លារ ដើម្បីផ្ទេររោងចក្រតម្លើងរថយន្តខ្នាតតូចនេះនៅបរទេស។
តាមរយៈសេចក្តីប្រកាសព័ត៌មានមួយ ក្រុមហ៊ុន Ford បានអះអាងថា ការសំរេចវិនិយោគនៅប្រទេសចិនអាចឲ្យក្រុមហ៊ុនសន្សំប្រាក់បាន ១ ពាន់លានដុល្លារ។ ក្រុមហ៊ុនក៏បានធានាផងដែរថា ការផ្ទេរខ្សែចង្វាក់ផលិតកម្មទៅប្រទេសចិន គឺពាក់ព័ន្ធតែប្រភេទរថយន្តម៉ូដែល Focus តែប៉ុណ្ណោះ។ ការផ្ទេរផលិតកម្មនឹងធ្វើជាបណ្តើរៗពីរោងចក្រនៅទីក្រុង Wayne ទៅកាន់ទីក្រុង ឆុងគីង (Chongqing)។ ហើយកម្មកររោងចក្រនៅលើទឹកដីសហរដ្ឋអាមេរិកនឹងមិនបាត់បង់ការងារឡើយ។ ចាប់ពីចុងឆ្នាំ២០១៨ រោងចក្រនៅទីក្រុង Wayne នឹងត្រូវបំលែង ដើម្បីអាចតម្លើងរថយន្ត Ford ប្រភេទ pick-up ម៉ូដែល Ranger។ ហើយចាប់ពីឆ្នាំ២០២០ រោងចក្រនេះក៏នឹងទទួលតម្លើងរថយន្តម៉ូដែលថ្មីឈ្មោះ Bronco ផងដែរ។
Ford មិនមែនជាក្រុមហ៊ុនតំបូងគេទេ ដែលសំរេចចិត្តផ្ទេររោងចក្រផលិតរថយន្តទៅបរទេស រួចនាំចូលមកលក់លើទឹកដីអាមេរិក។ មានជាអាទីក្រុមអាមេរិកដ៏ធំមួយ គឺ GM (General Motor) បាននាំចូលរថយន្តផលិតនៅប្រទេសចិនម៉ូដែល Buick Envision ចំនួន ៣ ម៉ឺនគ្រឿង និងម៉ូដែល Cadillac CT6 ចំនួនរាប់ពាន់គ្រឿង។ ចំណែកក្រុមហ៊ុន Volvo ដែលបច្ចុប្បន្នត្រូវបានក្រុមហ៊ុនចិន Geely ទិញរួចហើយក៏បាននាំចេញរថយន្តតម្លើងនៅប្រទេសចិន ដើម្បីយកទៅលក់នៅទីផ្សារអាមេរិកផងដែរ។ ប៉ុន្តែ ខុសពីក្រុមហ៊ុនដ៏ទៃ Ford គឺជាក្រុមហ៊ុនធំជាងគេ។ កាលពីឆ្នាំ ២០១៦ កន្លងទៅនេះ Ford បានលក់រថយន្តដាច់ចំនួន ១៧០ ០០០ គ្រឿង។
បើទោះបីជាការអះអាងរបស់ក្រុមហ៊ុន Ford ថានឹងមិនបង្កឲ្យបាត់បង់ការងារដល់ពលរដ្ឋអាមេរិក។ ប៉ុន្តែ សមាមាត្រផែ្នកសេដ្ឋកិច្ចជុំវិញវិស័យផលិតកម្មរថយន្តនឹងមិនស្មើគ្នាឡើយ។យើងអាចលើកយកឧទាហរណ៍រថយន្តម៉ូដែល Buick Envision របស់ក្រុមហ៊ុន GM ដែលតម្លើងនៅប្រទេសចិនយកមកពិចារណា។ បើយោងតាមការសិក្សារបស់ National Highway Traffic Safety Administration ដែលជាស្ថាប័ននិយ័តកម្មគ្រប់គ្រងវិស័យផលិតរថយន្តបានឲ្យដឹងថា ៨០% នៃគ្រឿងបន្លាស់របស់រថយន្តនេះត្រូវបានផលិតនៅប្រទេសចិន។ ហើយមានតែ ១% នៃគ្រឿងបន្លាស់ប៉ុណ្ណោះដែលផលិតនៅសហរដ្ឋអាមេរិក ឬកាណាដា។ ដូចនេះ ផលិតកម្មរថយន្តរបស់ក្រុមហ៊ុនអាមេរិកបានបង្កើតការងារនៅប្រទេសចិនច្រើនជាងនៅអាមេរិក។
សំរាប់រថយន្តម៉ូដែល Focus របស់ក្រុមហ៊ុន Ford វិញ បច្ចុប្បន្ននេះ គ្រឿងបន្លាស់ចំនួន ៤៦% ផលិតនៅទ្វីបអាមេរិកខាងជើង។ តើនាថ្ងៃអនាគត ក្រុមហ៊ុន Ford នៅតែរក្សាជំហរផលិតគ្រឿងបន្លាស់នៅទីកន្លែងដដែល ឬក៏អាចផ្ទេរទៅប្រទេសចិន? នេះជាសំណួរគ្មានចម្លើយដែលម្នាក់ៗកំពុងតែព្រួយបារម្ភពីការបាត់បង់ការងារនៅអាមេរិក។ សេចក្តីសំរេចរបស់ក្រុមហ៊ុន Ford ជាសារផ្ញើទៅលោក ដូណាល់ ត្រាំ ថា ក្រុមហ៊ុនផលិតរថយន្តអាមេរិកមិនបណ្តែតបណ្តោយខ្លួនស្តាប់ការបញ្ជាឆ្វេង ឬស្តាំពីក្រុមរដ្ឋការប្រធានាធិបតីឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ