លោក Jeff Bezos ថៅកែក្រុមហ៊ុន Amazone ក្លាយជាអ្នកមានជាងគេបំផុតក្នុងលោក
ចុះផ្សាយនៅថ្ងៃ៖
កាលពីថ្ងៃព្រហស្បតិ៍ ទី២៧ កក្កដាកន្លងទៅនេះ លោក Jeff Bezos ស្ថាបនិកក្រុមហ៊ុន Amazone ដែលមានជំនាញខាងលក់ទំនិញអនឡាញបានក្លាយជាបុគ្គលដែលមានទ្រព្យសម្បត្តិច្រើនជាងគេបំផុតលើលោក។ នេះជាចំណាត់ថ្មីចេញផ្សាយដោយទស្សនាវដ្តី Forbes។ ទន្ទឹមគ្នានឹងជោគជ័យក្នុងមុខជំនួលក់ទំនិញលើអ៊ីនធ័រនែត ប្រធានក្រុមហ៊ុន Amazone ក៏ជាអ្នករិះគន់ឥតសំចៃមាត់ម្នាក់ ដែលតែងចេញមុខប្រឆាំងលោក ដូណាល់ ត្រាំ ប្រធានាធិបតីអាមេរិក។
Amazone គឺជាក្រុមហ៊ុនលក់ទំនិញលើវេបសាយដ៏ល្បីឈ្មោះមួយរបស់អាមេរិក។ ក្រុមហ៊ុននេះត្រូវបានបង្កើតឡើងកាលពីឆ្នាំ១៩៩៤ នៅទីក្រុង Seattle ក្នុងរដ្ឋវ៉ាស៊ីនតោន។ បើយោងតាមទស្សនាវដ្តី Forbes គេបានប៉ាន់ស្មានថា លោក Jeff Bezos ម្ចាស់ក្រុមហ៊ុននេះមានទ្រព្យសម្បត្តិផ្ទាល់ខ្លួនប្រមាណ ៩០,៥ ពាន់លានដុល្លារអាមេរិក។ ទឹកប្រាក់ដ៏ច្រើនសន្ធឹកសន្ធាប់នេះត្រូវបានកើនឡើងក្រោយពីតម្លៃភាគហ៊ុនក្រុមហ៊ុន Amazone បានឡើងថ្លៃនៅលើទីផ្សារភាគហ៊ុន។
ដោយសារតែភាគក្រុមហ៊ុន Amazone បានឡើងថ្លៃខ្ពស់បែបនេះហើយបានជាធ្វើឲ្យលោក Jeff Bezos ជាប់ចំណាត់ថ្នាក់ទី ១ ជាលើកតំបូងក្នុងចំណោមពួកមហាសេដ្ឋីមានសម្បត្តិទ្រព្យស្តុកស្តម្ភ។ ចំណាត់ថ្នាក់ថ្មីនេះធ្វើឲ្យលោក Bill Gates ស្ថាបនិកក្រុមហ៊ុន Microsoft ធ្លាក់មកនៅត្រឹមលេខ ២។ បច្ចុប្បន្ននេះ គេប៉ាន់ស្មានថា លោក Bill Gates មានទ្រព្យសកម្មក្នុងរង្វង់ទឹកប្រាក់ប្រមាណ ៩០ ពាន់លានដុល្លារ។ សូមបញ្ជាក់ថា ក្នុងរយៈពេល ២២ ឆ្នាំចុងក្រោយនេះ លោក Bill Gates បានកាន់កាប់តំណែងជាមហាសេដ្ឋីទី១ក្នុងលោកអស់រយៈពេល ១៨ ឆ្នាំ។
តាមពិតទៅ ទ្រព្យសម្បត្តិដ៏មហាសាលរបស់លោក Jeff Bezos គឺដោយសារតែគាត់មានភាគហ៊ុនចូលរួមក្នុងមូលធនរបស់ក្រុមហ៊ុន Amazone។ បើតាមព័ត៌មានផ្សព្វផ្សាយដោយអាជ្ញាធរត្រួតពិនិត្យទីផ្សារភាគហ៊ុនអាមេរិកបានឲ្យដឹងថា លោក Jeff Bezos មានភាគហ៊ុនផ្ទាល់ខ្លួន ចំនួន ៨០,៨៩ លានហ៊ុន ដែលស្មើនឹង ១៧% នៃមូលធនសរុបរបស់ក្រុមហ៊ុន។ ចាប់តាំងពីថ្ងៃទី២០ មីនាមកម្ល៉េះ តម្លៃភាគហ៊ុនរបស់ក្រុមហ៊ុន Amazone បានឡើងជាង ២៤% នៅលើទីផ្សារភាគហ៊ុនទាំងឡាយ។ កំណើននេះបានធ្វើឲ្យម្ចាស់ក្រុមហ៊ុន Amazone កើនទ្រព្យសម្បត្តិផ្ទាល់ខ្លួនចំនួន ១៧ ពាន់លានដុល្លារ។ ប៉ុន្តែ ចំនួនទឹកប្រាក់ប៉ាន់ស្មានតាមរយៈតម្លៃភាគហ៊ុននេះ គឺគ្រាន់តែជាចំនួនតួលេខប៉ុណ្ណោះ។
បច្ចុប្បន្ននេះ ក្រុមហ៊ុន Amazone មានបុគ្គលិកចំនួន ១ សែន ៨ ម៉ឺននាក់នៅសហរដ្ឋអាមេរិក និងចំនួនជាង ៣ សែននាក់នៅលើពិភពលោក។ កាលពីពាក់កណ្តាលខែមករា ឆ្នាំ២០១៧ ក្រុមហ៊ុនយក្សលក់ទំនិញអនឡាញនេះបានប្រកាសថានឹងបង្កើតការងារដល់ពលរដ្ឋអាមេរិកចំនួន ១ សែននាក់ក្នុងរយៈ ១៨ ខែខាងមុខនេះ។ សព្វថ្ងៃនេះ ក្រុមហ៊ុន Amazone កំពុងតែសាងសង់មជ្ឈមណ្ឌលគ្រប់គ្រងការបញ្ជាទិញអនឡាញពីសំណាក់អតិថិជន។ មជ្ឈមណ្ឌលគ្រប់គ្រងនេះស្ថិតនៅរដ្ឋកាលីហ្វ័រនីញ៉ា រដ្ឋផ្លរីដា និងរដ្ឋតិចសាស់។
នៅសហរដ្ឋអាមេរិក ក្រុមហ៊ុន Amazone បានកាន់កាប់ទីផ្សារលក់ទំនិញអនឡាញចំនួន ២៦%។ នេះបើយោងតាមតួលេខកាលពីឆ្នាំ២០១៦។ ហើយក្នុងរយៈពេល ១៨ ឆ្នាំ ពោល គឺចន្លោះពីឆ្នាំ១៩៩៧ ដល់ឆ្នាំ២០១៥ មូលធនក្រុម Amazone បានកើនឡើងពី ១៤៨ ពាន់លានដុល្លារដល់ ៣២៥ ពាន់លានដុល្លារ។ បើទោះបីជាមហាសេដ្ឋីម្ចាស់ក្រុមហ៊ុនវេបសាយលក់ទំនិញអនឡាញ Amazone ជោគជ័យលើមុខជំនួញរបស់ខ្លួនក៏ពិតមែន ប៉ុន្តែ លោក Jeff Bezos ពុំមែនជាមនុស្សគាំទ្រនយោបាយរបស់លោកប្រធានាធិបតី ដូណាល់ ត្រាំ ឡើយ។
បើតាមសំដីកន្លងមករបស់លោក ដូណាល់ ត្រាំ បានឲ្យដឹងថា បណ្តាក្រុមហ៊ុនលក់ទំនិញអនឡាញតួយ៉ាងដូចជា Amazone សុទ្ធតែពុំបានបង់ពន្ធឲ្យបានគ្រប់គ្រាន់ដល់រដ្ឋាភិបាលអាមេរិកឡើយ។ កាលពីក្នុងអំឡុងពេលយុទ្ធនាការឃោសនាស្វែងរកសម្លេងឆ្នោត លោក ដូណាល់ ត្រាំ ធ្លាប់បានអំពាវនាវក្តែងៗហើយថា លោកនឹងដាក់កំរិតពន្ធដ៏ខ្ពស់បំផុតដល់ក្រុមហ៊ុន Amazone។
ប៉ុន្តែ ភាពមិនចុះសម្រុងគ្នារវាងលោក ដូណាល់ ត្រាំ និងក្រុមហ៊ុន Amazone មិនមែនមានត្រឹមតែបញ្ហាពន្ធអាការប៉ុណ្ណោះទេ។ តាមពិតទៅ ថៅកែក្រុមហ៊ុន Amazone គឺលោក Jeff Bezos ក៏ជាម្ចាស់សារព័ត៌មាន The Washington Post ផងដែរ។ ហើយសារព័ត៌មានដ៏ល្បីល្បាញមួយនេះតែងសរសេររិះគន់ក្រុមរដ្ឋការរបស់លោកប្រធានាធិបតី ដូណាល់ ត្រាំ។ កន្លងមក ថៅកែក្រុមហ៊ុន Amazone តែងបញ្ចេញទស្សនៈផ្ទាល់ខ្លួនរិះគន់មិនសំចៃមាត់ចំពោះនយោបាយដ៏ចម្រូងចម្រាសរបស់លោកប្រធានាធិបតី ដូណាល់ ត្រាំ។ ដោយសារតែមិនចូលចិត្តសំដីគ្រោតគ្រាធរបស់លោកប្រធានាធិបតីអាមេរិកថ្មី លោក Jeff Bezos ធ្លាប់បាននិយាយបែបកំប្លែងថា លោកចង់ប្រើយានអាវកាសរបស់ក្រុមហ៊ុន Blue Origin ដើម្បីចាប់លោក ដូណាល់ ត្រាំ បញ្ជូនទៅអាវកាសឲ្យនៅឆ្ងាយពីគេឯង។ សូមបញ្ជាក់ថា លោក Jeff Bezos ក៏ជាម្ចាស់ក្រុមហ៊ុនផ្តល់សេវាកម្មដឹកជញ្ជូនអាវកាសនេះផងដែរ។
ជាការឆ្លើយតប លោក ដូណាល់ ត្រាំ បានប្រតិកម្មថា លោក Jeff Bezos ប្រើប្រាស់សារព័ត៌មាន The Washington Post ជាឧបករណ៍នយោបាយមួយ ដើម្បីជះឥទ្ធិពលលើអ្នកនយោបាយអាមេរិកក្នុងគោលបំណងធ្វើយ៉ាងណាកុំឲ្យក្រុមហ៊ុន Amazone បង់ពន្ធអាករច្រើនពេកដល់រដ្ឋាភិបាលអាមេរិក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ