មេដឺកនាំក្រុមប្រឆាំង២រូប នៅវ៉េណេស៊ុយអេឡា ត្រូវបានចាប់ខ្លួន
លោកLeopoldo Lopez ឡេអូប៉ូលដូ ឡុបពេ និងលោកAntonio Ledezma អង់តូនីញ៉ូ ឡេដេហ្សម៉ា ជាមេដឺកនាំក្រុមប្រឆាំង នៅវ៉េណេស៊ុយអេឡា ត្រូវបានចាប់ខ្លួន នៅព្រឹកថ្ងៃអង្គារនេះ។ បើយោងតាមគ្រួសារពួកគាត់ គឺក្រុមភ្នាក់ងារចារកិច្ចវ៉េណេស៊ុយអេឡាជាអ្នកចាប់ខ្លួនពួកគាត់។
ចុះផ្សាយនៅថ្ងៃ៖
មេក្រុមប្រឆាំងសំខាន់នៅវ៉េណេស៊ុយអេឡា គឺលោក Leopoldo Lopez ឡេអូប៉ូលដូ ឡុបពេ និងលោក Antonio Ledezmaអង់តូនីញ៉ូ ឡេដេហ្សម៉ា ត្រូវបានគេស្គាល់ថា ជាអ្នកដែលបានអំពាវនាវ អោយធ្វើពហិកាបោះឆ្នោតជ្រើសរើសសភាធម្មនុញ្ញ ក្នុងសប្តាហ៍កន្លងទៅនេះ។ បើយោងតាមក្រុមគ្រួសារពួកគាត់ ក្រុមភ្នាក់ងារចារកិច្ចវ៉េណេស៊ុយអេឡា ជាច្រើននាក់ បាននាំខ្លួនមេដឺកនាំប្រឆាំងទាំង២រូបនេះចេញទៅ នៅថ្ងៃអង្គារនេះ។ ភរិយារបស់លោកឡុបពេ បានុចះផ្សាយរូបភាពវីដេអូ ដែលគេអាចមើលឃើញមានក្រុមប៉ូលិសដាក់លោកឡុបពេ ចូលឡាន រួចនាំគាត់ចេញទៅ។
ភរិយាលោកឡុបពេប្រាប់ថា មិនដឹងថា តើគាត់ត្រូវបាននាំខ្លួនទៅទីណាទេ។ មុននឹងត្រូវចាប់ខ្លួន លោកឡុបពេធ្លាប់ត្រូវតុលាការកាត់ទោសជាប់ពន្ធនគារ ១៤ឆ្នាំ កាលពីឆ្នាំ២០១៤ ពីតួនាទីក្នុងចលនាបាតុកម្ម ដែលធ្វើអោយមានមនុស្សស្លាប់៤៣នាក់។ ក្រោយជាប់ពន្ធនាគារជិត៣ឆ្នាំកន្លះមក លោកបានអនុញ្ញាតអោយចេញពីពន្ធនាគារ ប៉ុន្តែត្រូវជាប់ឃុំក្នុងផ្ទះ ក្រោមការឃ្លាំមើលពីអាជ្ញាធរ។ ចំណែកមេក្រុមប្រឆាំងមួយរូបទៀត គឺលោកឡេដេហ្សម៉ា គឺជាចៅហ្វាយក្រុងការ៉ាកាស តែត្រូវរងការចោទប្រកាន់ពីបទពុករលួយ។
វ៉េណេស៊ុយអេឡាទើបនឹងបោះឆ្នោតជ្រើសរើសសភាធម្មនុញ្ញស្របតាមបំណងរបស់ប្រធានាធិបតីម៉ាឌូរ៉ូ ដែលចង់តាក់តែងរដ្ឋធម្មនុញ្ញថ្មី និងរំលាយសភាចាស់ចោល។ សភាចាស់ ស្ថិតក្រោមការគ្រប់គ្រងរបស់ក្រុមប្រឆាំងតាំងពីឆ្នាំ២០១៦មក ក្រោយក្រុមប្រឆាំងឈ្នះឆ្នោត។ សមាជិកសភាធម្មនុញ្ញ៥៤៥នាក់ នឹងចូលធ្វើការ នៅសភានៅថ្ងៃពុធស្អែកនេះ។ សហគមន៍អន្តរជាតិ មិនទទួលស្គាល់សភាធម្មនុញ្ញវ៉េណេស៊ុយអេឡាទេ។ ក្រោយការបោះឆ្នោតសភាធម្មនុញ្ញវ៉េណេស៊ុយអេឡា សហរដ្ឋអាមេរិកបានចាត់វិធានការដាក់ទណ្ឌកម្មប្រធានាធិបតីម៉ាឌូរ៉ូ ដែលអាមេរិកចោទថាជាមេដឺកនាំផ្តាច់ការ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ