វិបត្តិវ៉េណេស៊ុយអេឡាឈានដល់ការដកហូតតំណែងរដ្ឋអាជ្ញា
សមាជិកសភាធម្មនុញ្ញវ៉េណេស៊ុយអេឡាដែលទើបចូលធ្វើការនៅថ្ងៃសៅរ៍ម្សិលមិញ បានដកតំណែងលោកស្រីរដ្ឋអាជ្ញាទូទៅ ល្វីហ្សា អរតេហ្កា Luisa Ortegaធ្វើអោយទំនាក់ទំនងវ៉េណេស៊ុយអេឡាជាមួយសហគមន៍អន្តរជាតិកាន់តែតានតឹង។ សហរដ្ឋអាមេរិក ស៊ីលី និងកូឡុំប៊ីបានថ្កោលទោសការដកតំណែងរដ្ឋអាជ្ញាវ៉េណេស៊ុយអេឡា។
ចុះផ្សាយនៅថ្ងៃ៖
សភាធម្មនុញ្ញវ៉េណេស៊ុយអេឡា ទើបចូលអង្គុយធ្វើការទាន់ស្រួលបួលផង បានសម្រេចដកលោកស្រីល្វីហ្សា អរតេហ្កា ពីតំណែងរដ្ឋអាជ្ញាទូទៅតែម្តង។ សមាជិកសភាពិសេសមួយនេះ បាននាំគ្នាចោទលោកស្រី អរតេហ្កា ថាជាជនក្បត់។ តុលាការកំពូលវិញ ប្រកាសថា នឹងមានការកាត់ទោសលោកស្រីទាក់ទងនឹងភាពមិនទៀងទាត់។ គណនីធនាគារលោកស្រីអរតេហ្កាបានជាប់គាំង អាជ្ញាធរហាមលោកស្រីមិនអោយចាកចេញពីប្រទេសទេ។
លោកស្រីអរតេហ្កា ជាអ្នកគាំទ្រអតីតប្រធានាធិបតីស្ហាវេស ត្រូវបានតែងតាំងក្នុងការងារតាំងពីឆ្នាំ២០០៧មក។ ច្រើនឆ្នាំមកនេះ លោកស្រីលែងជិតស្និទ្ធនឹងប្រធានាធិបតីម៉ាឌូរ៉ូ ទៀតហើយ។ លោកស្រីបានបរិហារការដកតំណែងលោកស្រីថាជាអំពើផ្តាច់ការ។ កងកម្លាំងវ៉េណេស៊ុយអេឡាបានរារាំងលោកស្រីមិនអោយបានចូលទៅការិយាល័យការងារ នៅក្រុងការ៉ាកាសទេ។ ក្រុមការងាររបស់លោកស្រីរដ្ឋអាជ្ញារូបនេះ ទើបនឹងបើកការអង្កេតកាលពីថ្ងៃពុធ ជុំវិញការសង្ស័យថាមានការបន្លំសន្លឹកឆ្នោត ក្នុងពេលបោះឆ្នោតជ្រើសរើសសភាធម្មនុញ្ញ កាលពីថ្ងៃ៣០កក្កដា។ ក្រុមការងារលោកស្រីបានស្នើអោយលុបចោលសភាធម្មនុញ្ញនេះទៀតផង។
ការដកតំណែងលោកស្រីរដ្ឋអាជ្ញាវ៉េណេស៊ុយអេឡា ត្រូវសហរដ្ឋអាមេរិកចាត់ទុកថាជាអំពើខុសច្បាប់។ លោកស្រីប្រធានាធិបតីប្រទេសស៊ីលី មីស្ហែល បាស្ហឺឡេ បានចាត់ទុកការដកតំណែងនេះ ថាជាជំហានឆ្ពោះទៅដល់ការកាត់ផ្តាច់លទ្ធិប្រជាធិបតេយ្យ។ ប្រធានាធិបតីកូឡុំប៊ី លោកម៉ានុយអែឡ សាន់តូស វិញបានលើកឡើងថា នេះជាសកម្មភាពផ្តាច់ការដំបូង នៃសភាធម្មនុញ្ញវ៉េណេស៊ុយអេឡា។
ម្សិលមិញនេះ រដ្ឋមន្ត្រីការបរទេសប្រេស៊ីល អាហ្សង់ទីន អ៊ុយរ៉ាហ្កាយ និងប៉ារ៉ាហ្កាយបានព្យួរវ៉េណេស៊ុយអេឡាពីទីផ្សាររួមគ្នានៃប្រទេសទ្វីបអាមេរិកខាងត្បូង។ ប្រទេសទាំងនេះដាក់លក្ខខណ្ឌអោយវ៉េណេស៊ុយអេឡាដោះលែងអ្នកទោសនយោបាយ រៀបចំអំណាចនិតិបញ្ញត្តឡើងវិញ រៀបចំការបោះឆ្នោត ហើយត្រូវលុបចោលសភាធម្មនុញ្ញ។ សភាធម្មនុញ្ញវ៉េណេស៊ុយអេឡាមានកាតព្វកិច្ចតាក់តែងរដ្ឋធម្មនុញ្ញឆ្នាំ១៩៩៩ឡើងវិញ។ ក្រុមប្រឆាំងមើលឃើញថា លោកម៉ាឌូរ៉ូ បង្កើតសភាពិសេសនេះឡើង ដើម្បីពង្រឹងនិងបន្តអំណាចដឺកនាំ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ