អៀម៉ាកាន់តែកំណាច Florida ជម្លៀសមនុស្សជាង៥លាននាក់
ព្យុះអៀម៉ា ដែលបានឡើងកម្លាំងក្លាយជាព្យុះកំណាចបំផុតនិងបានបោកបក់យ៉ាងខ្លាំងលើកោះគុយបា នៅថ្ងៃសុក្រ កំពុងធ្វើដំណើរឆ្ពោះទៅរដ្ឋ Florida សហរដ្ឋអាមេរិក។ ការត្រៀមប្រឈមបានជំរុញឱ្យមានការជម្លៀសពលរដ្ឋដល់ទៅប្រមាណជាង៥លាននាក់។ ទន្ទឹមគ្នាព្យុះសង្ឃរ៉ា ស្ហូហ្សេ មួយទៀតកំពុងកកើតឡើងបក់រំកិលកាន់មកជិតតំបន់អង់ទី ហើយព្យុះទីបី ឈ្មោះ Katia បានមកដល់ម៉ិចស៊ិក ដែលទើបរងគ្រោះរញ្ជួយដីមរណៈកាលពីម្សិលមិញ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៩
បន្ទាប់ពីបានសម្លាប់ជីវិតមនុស្សអស់ ១៩នាក់ នៅពេលបោកបក់លើតំបន់កោះការ៉ាអ៊ីប តាំងពីថ្ងៃពុធមក អៀម៉ាបានឡើងកម្លាំងខ្លាំងដល់កំពូលវិញ នៅពេលឆ្លងកាត់ប្រទេសគុយបា ដែលបានរងគ្រោះព្យុះភ្លៀងខ្លាំងស្រេចទៅហើយ និងដែលបានការជម្លៀសពលរដ្ឋដល់ទៅជាងមួយលាននាក់ ជាកិច្ចការពារ។ ក្រុងឡាហាវ៉ាន ក៏បានប្រកាសអាសន្ន។
សហរដ្ឋអាមេរិកក៏កំពុងត្រៀមអាសន្នដែរ !
អៀម៉ាដែលទំហំធំជាងរដ្ឋFlorida នឹងវាយបោកបក់លើក្រុងមីអាមីក្នុងល្បឿន២៤០គមក្នុងម៉ោង។ អាជ្ញាធរបានអំពាវនាវឱ្យប្រជាពលរដ្ឋជាង៥,៦លាននាក់ភៀសខ្លួន ព្រោះគ្មានតំបន់ណាមួយនៃរដ្ឋ អាចគេចរួចពីព្យុះសង្ឃរាយក្សអៀម៉ាបានទេ។ កាលពីឆ្នាំ១៩៩២ ព្យុះAndrewក្នុងកំរិត៥ខ្ពស់ខ្លាំងដូចអៀម៉ា តែមានទំហំតូច តូចជាអៀម៉ាឆ្ងាយណាស់។ ភាពអាសន្នត្រូវបានចូលជាធរមាននៅរដ្ឋ Florida ហើយ ហើយបានពន្លាតដល់រដ្ឋហ្ស័កហ្ស៊ី ការ៉ូលីនខាងត្បូងនិងវៀហ្ស៊ីនីទៀត។
យោធាអាមេរិកក៏បានបញ្ចេញនាវាចម្បាំង និងរថយន្តមុជទឹកបានចំនួនពីរគ្រឿង ផ្ទុកកម្លាំងសង្គ្រោះបីរយនាក់ ឧទ្ធម្ភាចក្រ២៧គ្រឿង ព្រមទាំងសម្ភារៈបរិក្ខារពេទ្យជាច្រើន ដើម្បីឆ្លើយតបទៅនឹងសេចក្តីត្រូវការជាក់ស្តែងរបស់ជនរងគ្រោះ។
ចំណែកនៅខាងតំបន់ការ៉ាអ៊ីប អៀម៉ាទៅផុតមិនទាន់ស្រួលបួលផង José ដ៏កំណាចខ្លាំងក្នុង៤ នៃមាត្រដ្ឋាន៥ បានមកដល់។ Saint-Martinនិង Saint-Barthélemy ដែលរងការខូចខាតយ៉ាងដំណំពី អៀមា (អស់ប្រមាណដល់ទៅ ១២០០លានអឺរ៉ូ បើគិតពីទឹកប្រាក់ត្រូវផ្តល់សំណងដល់ពលរដ្ឋ តាមប្រព័ន្ធធានារ៉ាប់រងគ្រោះធម្មជាតិ) បានប្រកាសអាសន្នជាថ្មីទៀត។ ខាងម៉ិចស៊ិក ក៏មិនគ្រាន់បើ បន្ទាប់ពីការរញ្ជួយដី ម៉ិចស៊ិចត្រូវរងការប្រហារពីព្យុះកេត្យា តែជាសំណាងល្អព្យុះនេះបានចុះខ្សោយក្លាយជាព្យុះភ្លៀងធម្មតា ជាមួយនឹងកម្លាំងខ្យល់បោកបក់ ១២០គ.ម.ក្នុងម៉ោង នៅពេលប៉ះដែនទ្វីប៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ