លោក Antonio Guterres ព្រមានពីហានិភ័យនៃសង្រ្គាមជាមួយកូរ៉េខាងជើង
នៅថ្ងៃអង្គារ ទី១៩ កញ្ញា លោកអគ្គលេខាធិការអង្គការសហប្រជាជាតិ Antonio Guterres បានថ្លែងបើកមហាសន្និបាតអង្គការសហប្រជាជាតិក្នុងទីក្រុងញូយ៉ក សហរដ្ឋអាមេរិក។ នៅក្នុងសុន្ទរកថាលើកទី១ ក្នុងនាមជាប្រមុខអង្គការពិភពលោក លោក Guterres បានទាមទារឲ្យពិភពលោកមួយគ្មានអាវុធនុយក្លេអ៊ែរ និងព្រមានពីហានិភ័យនៃសង្រ្គាមជាមួយកូរ៉េខាងជើង។ ចំណែកលោកប្រធានាធិបតីអាមេរិកដូណាល់ ត្រាំបានចាត់ទុកទង្វើរបស់កូរ៉េខាងជើងថា ជាការគំរាមកំហែងពិភពលោក និងថា គេគ្មានជម្រើសផ្សេងក្រៅពីកម្ទេចរបបក្រុងព្យុងយ៉ាងឲ្យរលាយសូន្យទេ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៧
លោកអគ្គលេខាធិការអង្គការសហប្រជាជាតិ Antonio Guterres បានថ្លែងយ៉ាងដូចនេះនៅចំពោះមុខវត្តមានប្រមុខរដ្ឋ និងប្រមុខរដ្ឋាភិបាលបរទេសប្រមាណជា ១៣០នាក់មកពីគ្រប់ជ្រុងជ្រោយក្នុងលោក។ ក្រៅពីទាមទារឲ្យមានពិភពលោកមួយគ្មានអាវុធនុយក្លេអ៊ែរ ប្រមុខអង្គការពិភពលោករូបនេះដដែលបានគូសបញ្ជាក់ច្បាស់ៗថា ដំណោះស្រាយជាមួយកូរ៉េខាងជើងត្រូវតែធ្វើឡើងតាមផ្លូវចរចា និងមិនត្រូវប្រើសង្រ្គាមដើម្បីដោះស្រាយទេ។ "នៅក្នុងដំណោះស្រាយវិបត្តិកូរ៉េខាងជើង ខ្ញុំសូមអំពាវនាវឲ្យមានឯកភាពនៅផ្ទៃក្នុងក្រុមប្រឹក្សាសន្តិសុខ ព្រោះការឯកភាពគ្នានឹងអនុញ្ញាតឲ្យមានការរំសាយនុយក្លេអ៊ែរនៅឧបទ្វីបកូរ៉េ និងបង្កើតឲ្យមានលទ្ធភាពនៃការដោះស្រាយបញ្ហាតាមផ្លូវទូត" នេះជាការថ្លែងរបស់លោក Antonio។
ការថ្លែងរបស់លោក Antonio Guterres ស្តីពីបញ្ហាកូរ៉េខាងជើងពេលនេះបានធ្វើឡើង បន្ទាប់ពីរបបក្រុងព្យុងយ៉ាងបានធ្វើការសាកល្បងនុយក្លេអ៊ែរ និងបាញ់សាកល្បងគ្រាប់មីស៊ីលបាលីស្ទិកជាបន្តបន្ទាប់មក និងដែលក្រុមប្រឹក្សាសន្តិសុខបានចេញសេចក្តីសម្រេចចិត្តដាក់ទ័ណ្ឌកម្មសេចដ្ឋកិច្ចយ៉ាងចាស់ដៃលើកូរ៉េខាងជើងជាហូហែតាំងពីរដូវក្តៅកន្លងទៅ។ ជាលក្ខណៈទូទៅ លោក Antonio Guterres បានអំពាវនាវឲ្យគ្រប់ប្រទេសទាំងអស់ក្នុងលោកចូលរួមកសាងពិភពលោកមួយគ្មានអាវុធនុយក្លេអ៊ែរ និងថា រដ្ឋដែលមានអាវុធនុយក្លែអ៊ែរត្រូវតែមានការទទួលខុសត្រូវពិសេសនៅក្នុងបញ្ហានេះ។
ចំណែកលោកប្រធានាធិបតីអាមេរិកដូណាល់ ត្រាំបានបញ្ចេញប្រតិកម្មខ្លាំងៗដោយបញ្ចូលអ៊ីរ៉ង់ និងកូរ៉េខាងជើងទៅក្នុងក្រុមប្រទេសយូកូមដែលកំពុងគំរាមកំហែងពិភពលោក និងថា កងទ័ពអាមេរិកនឹងក្លាយជាកងទ័ពដ៏ខ្លាំងពូកែជាងគេមិនធ្លាប់មាន។ សម្រាប់លោកត្រាំ គេគ្មានជម្រើសណាផ្សេងក្រៅពីកម្ទេចកូរ៉េខាងជើងឲ្យរលាយសូន្យនោះទេ។ ជាមួយអ៊ីរ៉ង់ លោកត្រាំបានបរិហារលើកិច្ចព្រមព្រៀងនុយក្លេអ៊ែរដែលសហគមន៍អន្តរជាតិបានចុះហត្ថលេខាកាលពីឆ្នាំ ២០១៥ ដោយចាត់ទុកជាកិច្ចព្រមព្រៀងយ៉ាងអាម៉ាស់សម្រាប់អាមេរិក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ