សភាអាមេរិកកោះហៅហ្វេសប៊ុក ពីរឿងគណនីក្លែងក្លាយរបស់រុស្ស៊ី
ចុះផ្សាយនៅថ្ងៃ៖
ស្តាប់ - ០៧:១៦
គណៈកម្មការស៊ើបការសម្ងាត់របស់សភាទាំងពីរជាន់ថ្នាក់របស់អាមេរិក កោះហៅជាផ្លូវការ នៅថ្ងៃពុធម្សិលមិញ ក្រុមហ៊ុនហ្វេសប៊ុក ទ្វីតទ័រ និងហ្គូហ្គល ដើម្បីឲ្យចូលទៅឆ្លើយបំភ្លឺ ជុំវិញសំណុំរឿងលូកដៃ របស់រុស្ស៊ី នៅក្នុងការបោះឆ្នោតប្រធានាធិបតីអាមេរិក នៅឆ្នាំ ២០១៦។ នៅដើមខែកញ្ញា ក្រុមហ៊ុនហ្វេសប៊ុក បានបើកការស៊ើបអង្កេតផ្ទៃក្នុង និងរកឃើញថា គណនីក្លែងក្លាយ ជាច្រើន ដែលបង្កើតឡើងចេញពីទឹកដីរុស្ស៊ី បានផ្សព្វផ្សាយព័ត៌មានមិនពិត នៅក្នុងអំឡុងឃោសនាបោះឆ្នោតអាមេរិក។
នៅក្នុងសេចក្តីថ្លែងការណ៍របស់គណៈកម្មការស៊ើបការណ៍សម្ងាត់របស់សភាអាមេរិក អ្នកទទួលខុសត្រូវរបស់ក្រុមហ៊ុនទាំងបី គឺ ហ្វេសប៊ុក ទ្វីតទ័រ និងហ្គូហ្គល ត្រូវទៅបង្ហាញខ្លួននៅថ្ងៃទី ១វិច្ឆិកាខាងមុខ ដោយហេតុផលថា សភា ហើយនិងប្រជាជនអាមេរិកត្រូវការចង់ដឹង ព័ត៌មានសំខាន់ ចេញពីមាត់ផ្ទាល់របស់ក្រុមហ៊ុនអ៊ីនធ័រនែត។ សភាអាមេរិកកោះហៅក្រុមហ៊ុនអ៊ីនធ័រនែត ដោយសារតែមានការស៊ើបអង្កេតរបស់ហ្វេសប៊ុកបង្ហាញថា រុស្ស៊ីបានបង្កើតគណនីក្លែងក្លាយ នៅលើបណ្តាញសង្គមហ្វេសប៊ុក ដើម្បីផ្សព្វផ្សាយព័ត៌មានមិនពិត។
នៅថ្ងៃពុធ ដដែល ក្នុងពេលដែលថ្នាក់ដឹកនាំ របស់ក្រុមហ៊ុនហ្វេសប៊ុក ត្រូវកោះហៅ ឲ្យទៅបកស្រាយ នៅសភា ប្រធានាធិបីអាមេរិក លោកដូណាល់ ត្រាំ បានសរសេរ នៅក្នុងសារ Twitterថា ហ្វេសប៊ុក រួមដៃជាមួយកាសែតអាមេរិកាំងផ្សេងទៀត ដើម្បីប្រឆាំងនឹងលោក។
នៅថ្ងៃ ទី៦ ដើមខែកញ្ញានេះ ក្រុមហ៊ុនហ្វេសប៊ុក ដែលបានបើកការស៊ើបអង្កេតផ្ទៃក្នុង បានបង្ហាញឲ្យគេដឹងថា ក្រុមហ៊ុនបានរកឃើញ គណនីក្លែងក្លាយ ឬគណនីមិនប្រក្រតី ចំនួន ៤៧០ ដែលបង្កើត និងគ្រប់គ្រង តាំងពីទឹកដីរុស្ស៊ី។ ពីពាក់កណ្តាលឆ្នាំ ២០១៥ ដល់ខែ មិថុនា ឆ្នាំនេះ គណនីក្លែងក្លាយរុស្ស៊ី បានចំណាយលុយ ១សែនដុល្លារ ដើម្បី ទិញ កន្លែងផ្សព្វផ្សាយពាណិជ្ជកម្ម នៅលើបណ្តាញសង្គមហ្វេសប៊ុក។
ជាទូទៅ រូបភាពផ្សាយពាណិជ្ជកម្មរបស់គណនីរុស្ស៊ីទាំងនោះ ទាកទងគ្នា និងតែងតែបញ្ជូនគេ ឲ្យទៅស្គាល់វិបសៃតិ៍ ដែលនិយាយពីព័ត៌មានមិនពិតជាច្រើន ដូចជាការធ្វើបាតុកម្មប្រឆាំងលោកស្រីហ៊ីឡារី គ្លីនតុន ឬក៏វិបសៃតិ៍ ដែលបង្កឲ្យមានការជជែកតវ៉ា ស៊ូមតិជុំវិញ បញ្ហារំលូតកូន ឬការប្រើប្រាស់អាវុធនៅអាមេរិក ជាដើម។
តាមកាសែតអាមេរិកាំង Washington post ក្រុមភា្នក់ងារសម្ងាត់របស់ក្រសួងការពារជាតិរុស្ស៊ី បានប្រើប្រាស់គណនីក្លែងក្លាយ ដើម្បីបង្កើតព័ត៌មានមិនពិត នៅលើបណ្តាញសង្គមហ្វេសប៊ុក តាំងពីខែមិថុនា ឆ្នាំទៅមិញ គឺ ក្នុងអំឡុងយុទ្ធនាការឃោសនាបោះឆ្នោតរបស់បេក្ខជនប្រធានាធិបតីអាមេរិកម្ល៉េះ។ គោលដៅនៃការបង្ហោះផ្សាយព័ត៌មានបំប៉ោង ឬមិនពិត គឺដើម្បីបំផ្លាញបេក្ខជនរបស់បក្សប្រជាធិបតេយ្យ គឺលោកស្រីហ៊ីឡារី ដែលនាំមុខនៅក្នុងការស្ទង់មតិ។
រហូតមកដល់ពេលនេះ ប៉ូលិសសហព័ន្ធFBI ហើយនិងសភាអាមេរិកកំពុងបើកការស៊ើបអង្កេត ទៅលើការលូកដៃរបស់រុស្ស៊ី ដែលគេជឿថា បានប្រើប្រាស់បណ្តាញសង្គម ដូចជាហ្វេសប៊ុក ដើម្បីបង្កើតព័ត៌មានមិនពិត ក្នុងន័យបញ្ចុះបញ្ចូលពលរដ្ឋអាមេរិកាំងឲ្យបោះឆ្នោត លោកដូណាល់ត្រាំ ប៉ុន្តែ មិនមែនលោកស្រី ហ៊ីឡារី ដែលមិនចូលចិត្តរុស្ស៊ី។
នៅសប្តាហ៍មុន តាមការអះអាងរបស់ក្រុមហ៊ុនហ្វេសប៊ុក គ្រាន់តែគេរកឃើញ គណនីក្លែងក្លាយរបស់រុស្ស៊ី ភ្លាម ក្រុមហ៊ុនហ្វេសប៊ុកបានជូនដំណឹងនេះភ្លាមទៅ រដ្ឋអាជ្ញាពិសេស លោកRobert Mueller ដែលកំពុងស៊ើបអង្កេតលើការជាប់ពាក់ព័ន្ធរវាងក្រុមឃោសនាបោះឆ្នោតរបស់លោកដូណាល់ ត្រាំ ជាមួយនឹងទីក្រុងម៉ូស្គូ។
សម្រាប់ ស្ថាបនិករបស់ហ្វេសប៊ុក លោកZuckerberg ហ្វេសប៊ុក នឹងសហការពេញទំហឹងជាមួយរដ្ឋាភិបាលអាមេរិក នៅក្នុងការស៊ើបអង្កេតទៅលើការលូកដៃរបស់រុស្ស៊ីនៅក្នុងការបោះឆ្នោត។ តាមលោកZuckerberg ក្រុមហ៊ុននឹងបញ្ជូនព័ត៌មានទាក់ទងនឹងការផ្សាយពាណិជ្ជកម្មទាំង៣ពាន់របស់គណនីក្លែងក្លាយរុស្ស៊ី ទៅឲ្យសភា ដែលកំពុងស៊ើបអង្កេតដូចគ្នាដែរ នឹងរដ្ឋអាជ្ញាពិសេស គឺការលូកដៃរបស់រុស្ស៊ី នៅក្នុងការបោះឆ្នោតប្រធានាធិបតីកន្លងមក។
ស្ថាបនិក ហ្វេសប៊ុក៖ ការគិតដែលថា ព័ត៌មានមិនពិត នៅលើបណ្តាញសង្គចមហ្វេសប៊ុក មានឥទ្ធិពលលើការបោះឆ្នោតនោះ គឺជាការគិត ដ៏ឆ្កួតលីលា
នៅប៉ុន្មានថ្ងៃក្រោយ លោកដូណាល់ត្រាំ ឈ្នះឆ្នោតក្លាយជាប្រធានាធិបតីអាមេរិក ស្ថាបនិក របស់ហ្វេសប៊ុក លោកZuckerberg បានរុញច្រានពាក្យដែលលើកឡើងថា ការផ្សព្វផ្សាយ ព័ត៌មានមិនពិត ព័ត៌មានក្លែងក្លាយ នៅលើបណ្តាញសង្គមហ្វេសប៊ុក អាចជះឥទ្ធិពលទៅលើលទ្ធផលបោះឆ្នោត ឬក៏បានជួយឲ្យលោកដូណាល់ ត្រាំ ឈ្នះឆ្នោត ក្លាយជាប្រធានាធិបតី។
តាមកាសែតWashington post ថៅកែរបស់ហ្វេសប៊ុកធ្លាប់ត្រូវបានអតីតប្រធានាធិបតីអាមេរិក លោកអូបាម៉ា ក្រើនរំលឹកម្តងហើយ គឺនៅបន្ទាប់ពីលោកZuckerberg រុញច្រានពាក្យចោទប្រកាន់ដែលថា ព័ត៌មានផ្សព្វផ្សាយ មិនពិត នៅលើបណ្តាញសង្គមហ្វេសប៊ុកបានជួយឲ្យលោកដូណាល់ ត្រាំឈ្នះឆ្នោត។ កាលនោះ លោកZuckerberg បាននិយាយថា ការគិតដែលថា ព័ត៌មានមិនពិត នៅលើបណ្តាញសង្គចមហ្វេសប៊ុក មានឥទ្ធិពលលើការបោះឆ្នោតនោះ គឺជាការគិត ដ៏ឆ្កួតលីលា។
ប៉ុន្តែ លទ្ធផលស៊ើបអង្កេត ដ៏គួរឲ្យភ្ញាក់ផ្អើល នៅដើមខែកញ្ញាគឺបានធ្វើថៅកែ ហ្វេសប៊ុក បិទមាត់ជិត មិនអាចតវ៉ាអ្វីទៀតនោះទេ។ នៅសប្តាហ៍មុន លោកZuckerbergផ្ទាល់ទទួលស្គាល់ថា លោកសោកស្តាយ ដែលបាននិយាយថា ព័ត៌មានមិនពិត គ្មានជះឥទ្ធិពលលើការបោះឆ្នោតប្រធានាធិបតី កន្លងមកនោះ។ នៅក្រោយការរកឃើញ គណនីក្លែងក្ល្ាយរបស់រុស្ស៊ី លោកZuckerberg នៅពេលនេះគឺបានភ្លឺភ្នែក ច្បាស់តែម្តង ព្រោះថា ក្រៅតែពីអាមេរិក ហ្វេសប៊ុកបានរកឃើញផងដែរ គណនីក្លែងក្លាយ រុស្ស៊ី មួយចំនួនបានព្យាយាមទិញកន្លែងផ្សាយពាណិជ្ជកម្មនៅលើហ្វេសប៊ុក ដើម្បីលូកដៃ ក្នុងការបោះឆ្នោតប្រធានាធិបតីបារាំង នៅពាក់កណ្តាលឆ្នាំនេះ។ បទពិសោធន៍នេះបានជួយឲ្យហ្វេសប៊ុកទប់ស្កាត់ផងដែរ ការបន្លំបង្កើតគណនីក្លែងក្លាយ ដើម្បី ចូលទៅកកូរ កកាយ ការបោះឆ្នោតអាល្លឺម៉ង់ដែលទើបតែចប់ទៅ នៅថ្ងៃអាទិត្យកន្លងទៅ។
ហ្វេសប៊ុកនិយាយធានាថា នឹងចាត់វិធានការត្រួតពិនិត្យ ឲ្យមានតម្លាភាពជាងនេះ
ការកឃើញ គណនីក្លែងក្លាយ ដែលចាត់ចែង ប្រើប្រាស់ដោយរុស្ស៊ីដើម្បីជះឥទ្ធិលលើការបោះឆ្នោតអាមេរិក បានធ្វើឲ្យហ្វេសប៊ុកផ្លាស់ប្តូរគោលការណ៍ជាមូលដ្ឋានគ្រឹះមួយចំនួនរបស់ខ្លួន។ កន្លងមក ហ្វេសប៊ុក បានបដិសេធ មិនបង្ហាញពីអត្តសញ្ញាណរបស់ម្ចាស់គណនីដែលទិញផ្សព្វផ្សាយពាណិជ្ជកម្មនៅលើបណ្តាញសង្គម នៅក្នុងហេតុផល ការពារការណ៍សម្ងាត់ ផ្ទាល់ខ្លួនរបស់អតិថិជនរបស់ហ្វេសប៊ុក។ ប៉ុន្តែ នៅក្រោយការបែកខ្ចរខ្ចាយលើកនេះ ហ្វេសប៊ុកបានសន្យាបង្ហាញតម្លាភាព ទៅតាមការចង់បានរបស់ក្រុមសកម្មជនសិទ្ធិមនុស្ស និងអ្នកនយោបាយកន្លងមក ពោលគឺ អំណើះតទៅ គេអាចចូលមើលស្គាល់មុខ មនុស្ស ដែលទិញផ្សាយពាណិជ្ជកម្ម នៅលើហ្វេសប៊ុក ដើម្បី ផលប្រយោជន៍នយោបាយ។
ហ្វេសប៊ុកអាចនឹងត្រួតពិនិត្យ ម៉ត់ចត់ជាងមុន លើខ្លឹមសារផ្សព្វផ្សាយពាណិជ្ជកម្ម និងលើគណនីដែលបង្កើត ជាខ្សែ ដោយប្រទេស ឬក្រុមនយោបាយធំៗណាមួយ ដើម្បីផលប្រយោជន៍នយោបាយ ប៉ុន្តែ យ៉ាងណាក៏ដោយ ហ្វេសប៊ុក នៅតែមិនអាចគ្រប់គ្រង តាមដានគ្រប់ជ្រុងជ្រោយ លើរាល់គណនីរបស់បុគ្គល សមាជិករបស់ហ្វេសប៊ុក ដែលប្រើប្រាស់គណនីរបស់ខ្លួន ដើម្បីផ្សព្វផ្សាយព័ត៌មានមិនពិត ក្នុងគោលដៅ បម្រើផលប្រយោជន៍ របស់បក្សនយោបាយដែលគេគាំទ្រនោះទេ។ ដំណើរការ តាមដានបែបនេះ គឺស្មុគស្មាញ និងទាមទារធនធានមនុស្សច្រើន ខ្លាំងណាស់ ព្រោះថា ហ្វេសប៊ុកមានអ្នកប្រើប្រាស់ដល់ទៅជាង ២ពាន់លាននាក់ នៅក្នុងពិភពលោក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ