លោកដូណាល់ ត្រាំ លុបចោល កញ្ចប់ជំនួយសម្រាប់ការពន្យារកំណើត
ប្រធានាធិបតី អាមេរិក លោកដូណាល់ ត្រាំ នៅថ្ងៃសុក្រម្សិលមិញបានសម្រេចលុបចោល មាត្រាមួយនៃច្បាប់សុខភាពអូបាម៉ា ដែលបានកំណត់ឲ្យម្ចាស់ក្រុមហ៊ុនបង់ប្រាក់ធានារ៉ាប់រង សម្រាប់ការពន្យារកំណើតរបស់បុគ្គលិកស្រី។ គឺនៅក្នុងនាមជាអ្នកគោរពជំនឿសាសនា ហើយនិងសីលធម៌ ដែលលោកដូណាល់ ត្រាំ សម្រេចលុបចោលជំនួយសម្រាប់ការពន្យារកំណើត។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៤៤
លោកដូណាល់ ត្រាំមិនអាចធ្វើឲ្យច្បាប់ការពារសុខភាពរបស់លោកអូបាម៉ា ត្រូវសភារំលាយចោលមែន (ដោយសារតែសំឡេងគាំទ្រមិនគ្រប់គ្រាន់ នៅសភាអាមេរិក) ប៉ុន្តែ លោកមិនបានលះបង់ចោលគំនិតប្រឆាំងនឹងច្បាប់អូបាម៉ានោះទេ។ នៅថ្ងៃសុក្រ ម្សិលមិញ រដ្ឋាបាលរបស់ដូណាល់ ត្រាំបានប្រកាសលុបចោលមាត្រាមួយ ក្នុងច្បាប់អូបាម៉ា ដែលធ្លាប់តែតម្រូវ ចាប់ចងឲ្យក្រុមហ៊ុនបង់ថ្លៃធានារ៉ាប់រង លើផ្នែកពន្យារកំណើតរបស់បុគ្គលិក។
កន្លងមក មានតែស្ថាប័នសាសនា នៅអាមេរិកតែប៉ុណ្ណោះ ដែលត្រូវបានលើកលែង រួចផុតពីកាតព្វកិច្ច ចាប់ចងដោយមាត្រាមួយនេះ នៃច្បាប់អូបាម៉ា។ ប៉ុន្តែ ទៅតាមការសម្រេចរបស់រដ្ឋបាលដូណាល់ ត្រាំ អំណើះតទៅ គ្រប់ស្ថាប័ន ក្រុមហ៊ុនឯកជននឹងបានរួចខ្លួន លែងជាប់កាតព្វកិច្ច ត្រូវបង់ប្រាក់ធានារ៉ាប់រង សម្រាប់នយោបាយពន្យារកំណើតរបស់បុគ្គលិកស្រី។
ការសម្រេចរបស់លោកប្រធានាធិបតីអាមេរិកត្រូវបានស្វាគមដោយសមាជិកព្រឹទ្ធសភា មកពីខាងក្រុមអភិរក្សនិយម ប៉ុន្តែ ផ្ទុយទៅវិញ បានបង្កឲ្យមានមតិប្រឆាំងគ្រប់ទិស មិនថា គណបក្សប្រឆាំង ក្រុមអ្នកការពារសិទ្ធិស្រ្តី ឬអ្នកជំនាញខាងសុខភាព។ អតីតបេក្ខជនប្រធានាធិបតីមកពីគណបក្សប្រជាធិបតេយ្យ លោកBernie Sandersបានរិះគន់លោកដូណាល់ ត្រាំថា កំពុងធ្វើនយោបាយ រើសអើងផ្លូវភេទ។ អង្គការការពារសិទ្ធិពលរដ្ឋអាមេរិកាំង ACLUវិញ បានសន្យាប្តឹងរដ្ឋបាលលោកដូណាល់ ត្រាំ ដែលគេបានចោទប្រកាន់ថា ស្អប់ខ្ពើម មិនឲ្យតម្លៃដល់សុខភាព និងជីវិតរបស់ស្រ្តី។
តាម អង្គការផែនការគ្រួសារអាមេរិកាំង ដោយលុបចោល កាតព្វកិច្ចទទួលខុសត្រូវរបស់ម្ចាស់ក្រុមហ៊ុន លោកដូណាល់ ត្រាំ កំពុងបាញ់តម្រង់ទៅរកស្រ្តីអាមេរិកាំង ប្រមាណ ៦២លាននាក់ ដែលកំពុងធ្វើនយោបាយពន្យារ កំណើត។ រដ្ឋបាលលោកដូណាល់ ត្រាំ ហើយនិងក្រុមអ្នកការពារសិទ្ធិស្រ្តី មានតួលេខមិនដូចគ្នានោះទេ។ តាមសេតវិមាន មានតែស្រ្តីប្រមាណ ១សែន ២ម៉ឺននាក់ប៉ុណ្ណោះ ដែលបានទទួលប្រយោជន៍ពីការធានារ៉ាប់រង របស់ម្ចាស់ក្រុមហ៊ុន ប៉ុន្តែ ការស្ទង់មតិ នៅឆ្នាំមុនបង្ហាញថា ច្បាប់អូបាម៉ា ចាប់អនុវត្ត តាំងពីឆ្នាំ ២០១០បានជួយឲ្យ ស្រ្តីអាមេរិកាំង ជាង ៥៥លាននាក់ បានទទួលការពន្យារកំណើតដោយឥតគិតថ្លៃ។
សូមបញ្ជាក់ថា ទៅតាមច្បាប់សុខភាព អូបាម៉ា ម្ចាស់ក្រុមហ៊ុនឯកជនត្រូវតែបង់ថ្លៃធានារ៉ាប់រង សម្រាប់ការពន្យារកំណើតរបស់បុគ្គលិក។ ប៉ុន្តែ នៅឆ្នាំ ២០១៤ តុលាការកំពូល បានសម្រេចឲ្យក្រុមហ៊ុនឯកជនពីរ រួចខ្លួន ពីការចេញបង់ថ្លៃ លើធានារ៉ាប់រង លើការពន្យារកំណើត ដោយសំអាងទៅលើជំនឿសាសនា និងសីលធម៌ ដែលជាគោលការណ៍សំខាន់របស់ក្រុមហ៊ុន។ នៅចំពោះអ្នកកាសែត នៅថ្ងៃម្សិលមិញ ស្រ្តី អ្នកនាំពាក្យរបស់សេតវិមានបានលើកយកការសម្រេចរបស់តុលាការកំពូល មកធ្វើជាសំអាងការពារការសម្រេចធ្វើកំណែទម្រង់របស់លោកដូណាល់ ត្រាំ ដែលបើតាមអ្នកនាំពាក្យ គឺជាមនុស្សដែលជឿទៅលើរដ្ឋធម្មនុញ្ញ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ