ផ្ទុះរឿងអាស្រូវផ្លូវភេទ មិនធ្លាប់មាន នៅក្នុងពិភពភាពយន្តហូលីវូត
ចុះផ្សាយនៅថ្ងៃ៖
ស្តាប់ - ០៧:០៨
បណ្ឌិតសភាសិល្បៈនិងវិទ្យាសាស្ត្រអាមេរិក Academy of Motion Picture Arts and Sciences ដែលជាម្ចាស់ផ្តល់ពានរង្វាន់ភាពយន្តអូស្កា ដ៏ល្បីល្បាញ បានសម្រេចបណ្តេញសមាជិករបស់ខ្លួនម្នាក់គឺ លោក Harvey Weinstein ចេញពីក្រុម។ ជាផលិតករដ៏មានអំណាចបំផុតម្នាក់នៅហូលីវូត លោក វីនស្ទីន ត្រូវជាប់ចោទពីបទបំពារបំពាន និងរំលោភផ្លូវភេទ ស្ត្រីជាតារាភាពយន្តជាង៣០រូប ក្នុងអំឡុងពេលជាង៣០ឆ្នាំចុងក្រោយនេះ។ នៅថ្ងៃនេះ ជាលើកទីមួយហើយដែលពិភពហូលីវូត ត្រូវអង្រួនដោយរឿងអាស្រូវផ្លូវភេទយ៉ាងដូច្នេះ។
មានអាយុ ៦៥ឆ្នាំ លោក ហាវេ វីនស្ទីន ជាអ្នកមាន ជាផលិតករភាពយន្តដ៏ល្បីល្បាញ និងជាជនដ៏មានឥទ្ធិពលខ្លាំងម្នាក់នៅក្នុងពិភពហូលីវូត។ លោកធ្លាប់ទទួលពានរង្វាន់អូស្កា ដល់ទៅ ៨១ និងរង្វាន់តែងតាំង ចំនួន៣៤១ដង។
ប៉ុន្តែនៅយប់មិញ ជាលើកទីមួយ បណ្ឌិតសភាសិល្បៈនិងវិទ្យាសាស្ត្រអាមេរិក បានចេញសម្រេចក្តីសម្រេច ដ៏កម្របំផុត ដាក់ទណ្ឌកម្ម លោកវីនស្ទីន ដោយបានប្រកាសបណ្តេញផលិតកររូបនេះ ចេញពីស្ថាប័ន តែម្តង។
បណ្ឌិតសភាសិល្បៈនិងវិទ្យាសាស្ត្រអាមេរិក ដែលជាស្ថាប័នផ្តល់ពានរង្វាន់អូស្កា ដ៏ល្បីល្បាញនេះមានសមាជិកសរុបប្រមាណ៨ពាន់នាក់ និងគណៈកម្មការដឹកនាំ៥៤រូប។ ស្ថាប័នឧស្សាហកម្មភាពយន្តនេះមានអាយុ ៩០ឆ្នាំហើយ ! តែគេធ្លាប់ឃើញមានការបណ្តេញសមាជិកម្នាក់ តែម្តងគត់ ដែលជាសិល្បករ Carmine Caridi ពីបទបានលួចចម្លងឯកសារសម្ងាត់ភាពយន្តទៅផ្សាយក្នុងប្រព័ន្ធអ៊ីនធ័រនែត។
ករណីលោក វីនស្ទីន ជាការបណ្តេញទីពីរប៉ុណ្ណោះ។ គណៈកម្មការ ដែលបានបើកប្រជុំបន្ទាន់ យប់មិញ សម្រេចក្នុងសំឡេងលើសពី២/៣ ចេញសេចក្តីថ្លែងការណ៍ពន្យល់ថា “ស្ថាប័នមិនត្រឹមតែមិនចង់ឱ្យមានមនុស្សមិនចេះគោរពមិនរួមការងារ នៅជិតទេ តែស្ថាប័នចង់ផ្តល់សារច្បាស់លាស់មួយបញ្ជាក់ថា ការធ្វើមិនដឹងមិនឮ ការផ្សំគំនិតខ្លាចភាពអៀនខ្មាស ពីការរងគ្រោះរំលោភបំពាន និងការយាយីផ្លូវភេទនៅកន្លែងធ្វើការ ក្នុងឧស្សាហកម្មភាពយន្ត ត្រូវចប់ហើយ !”
ក្រៅអំពីទណ្ឌកម្មនេះ ក្រុមហ៊ុនផលិតកម្មភាពយន្តដែលលោកបានស្ថាបនាឡើងជាមួយប្អូនប្រុស ក៏បានប្រកាសដកចេញដែរ។ ប្រទេសបារាំង ក៏កំពុងពិចារណារកមធ្យោបាយដកមេដាយកិត្តិយសដែលលោកប្រធានាធិបតីសាកូហ្ស៊ីបានផ្តល់ឱ្យលោក វីនស្ទីន កាលពីឆ្នាំ២០១២ ចេញវិញដែរ។
៣០ឆ្នាំ រំលោភបំពានផ្លូវភេទលើតារាជាង៣០នាក់
រឿងអាស្រូវនេះបានផ្ទុះឡើង កាលពីសប្តាហ៍មុន តាមរយៈការអង្កេតនិងចុះផ្សាយរបស់កាសែត New Yorker និង New York Times ញូវយ៉កថែមស៍។ បើតាមកាសែតទាំងពីរ ផលិតករភាពយន្តដ៏ល្បីល្បាញ វីនស្ទីន ដែលធ្លាប់ជាអ្នកធ្វើព្យុះធ្វើភ្លៀង ក្នុងពិភពហូលីវូត គឺជាមនុស្សញៀនស្រី ! ធ្លាប់ចាប់រំលោភ និងបំពារបំពានផ្លូវភេទលើសិល្បការនី ប្រមាណ៣០រូប តាំងពីជាង៣០ឆ្នាំមកហើយ។ តារាភាពយន្តជាច្រើន មានអាទិ៍ នាង Asia Argento Rose McGowan Lysette Anthony ជាតិអង់គ្លេស បាននាំគ្នាធ្វើការចោទប្រកាន់ លោក វីនស្ទីន ថាបានចាប់រំលោភពួកគេនៅក្នុងទសវត្សរ៍ឆ្នាំ ៨០ ខ្លះនៅទសវត្សរ៍ឆ្នាំ៩០ ។ល។ និង។ល។
ពីមួយថ្ងៃទៅមួយថ្ងៃ មានតារាសម្តែង សិល្បការិនី ម្នាក់ហើយម្នាក់ទៀត បារាំង អង់គ្លេស អាមេរិក ... នាំគ្នាចេញមុខធ្វើសក្ខីកម្ម លាតត្រដាងជីវិតរងគ្រោះពីការរំលោភបំពានផ្លូវភេទ ដោយស្នាដៃវីនស្ទីន។ សូម្បីតែតារាហូលីវូត ដ៏ល្បីល្បាញ Angelina Jolie ក៏ធ្លាប់មានប្រវត្តិមិនល្អជាមួយនឹងវីនស្ទីនដែរ។ លោកស្រី អង់ហ្សេលីណា ហ្សូលី បានសរសេរលិខិតចំហមួយ ទាមទារឱ្យមានការបញ្ចប់អំពើហិង្សារំលោភស្ត្រី និងបានទម្លាយរឿងសម្ងាត់ខ្លួន ថាធ្លាប់ជាជនរងគ្រោះម្នាក់ដែរ នៅពេលលោកស្រីចាប់ផ្តើមជីវិតភាពយន្តដំបូង មុនដកខ្លួនចេញលែងធ្វើការជាមួយផលិតកររូបនេះវិញ។ ស្តាប់ទៅដូចជាគ្មានតារាហូលីវូតណា ថាមិនដឹង ឬមិនស្គាល់ ចរិក ជំងឺល្មោភកាម បំពានលើស្ត្រី របស់វីនស្ទីនទេ។
ហេតុអ្វីជនរងគ្រោះសំងំយូរដល់ជាង៣០ឆ្នាំ
នេះជាសំណួរមួយក្នុងចំណោមសំណួរជាច្រើន ដែលចោទឡើង នៅពេលគេបានឃើញបានអានសក្ខីកម្មរបស់ “ជនរងគ្រោះ” ដ៏រន្ធត់ស្តីអំពីការរំលោភ បំពានបំពារផ្លូវភេទមកលើរូបពួកគេ ពីសំណាក់ លោក វីនស្ទីន ហើយត្រូវសំងំបិទមាត់ឈឹងដល់ទៅជាងបីទស្សវត្សរ៍ ទើបអាចទម្លាយបាននៅពេលនេះ។
នេះក៏ទំនងជាដោយសារការខ្មាសអៀន របស់អ្នកខ្លះ និងការផ្សំគំនិតលាក់ របស់អ្នកផ្សេងទៀត។ ខ្មាសអៀនផង សម្ពាធការងារផង ស្ត្រីជាជនរងគ្រោះពេលនោះ ដែលច្រើនតែជាតារាក្មេងៗ ថ្មីថ្មោងទើបចាប់ផ្តើមការងារដំបូង ពិតជាគ្មានផ្លូវជ្រើសរើសទេ ព្រោះបើមិនស្រួលនឹងត្រូវគេបន្ទោសវិញផង។
ប៉ុន្តែពេលនេះវាខុសពីពេលមុន ! ពីមុនមក ក្នុងចំណោមជនប្រព្រឹត្តអំពើរំលោភបំពានផ្លូវភេទ១០០នាក់ មានតែ២នាក់ តែត្រូវបានតុលាការកាត់ទោសដាក់ពន្ធនាគារតាមច្បាប់។ ក្នុងករណីលោកវីនស្ទីនក៏ដូចគ្នា មានការប្តឹងផ្តល់ច្រើនតែត្រូវបិទបញ្ចប់ទៅវិញ ដោយការយោគយល់បង់ប្រាក់សងជំងឺចិត្ត។ តែពេលនេះ តុលាការមិនមើលរំលងការរំលោភបំពានលើស្ត្រីទៀតទេ ហើយមានរលកសាមគ្គីភាពរវាងស្ត្រីដូចគ្នា និងសុភាពបុរស តាមប្រព័ន្ធសង្គម ក្នុងជីវិតពិត ប្រឈមផ្ទាល់នឹងការរើសអើងភេទ បំពានស្ត្រី។ ការរើសអើង ម៉ាក់ងាយស្ត្រី បានក្លាយជាប្រធានបទរបស់សារព័ត៌មាន។ កាសែតមិនញញើតនឹងចុះផ្សាយរឿងអាស្រូវដើម្បីបុព្វហេតុស្ត្រីទេ។ ការនេះពិបាករកណាស់ កាលពី៣០ឆ្នាំ មុន។
សេចក្តីក្លាហាន សាមគ្គីភាព ជាជំងឺឆ្លង បើមានម្នាក់ហ៊ានងើបហើយ និងមានជាបន្តបន្ទាប់ គឺជាការអាងគ្នាទៅអាងគ្នាមក។
អស់រិទ្ធ
លោក ហាវេ វីនស្ទីន ដែលធ្លាប់ល្បីល្បាញមានឥទ្ធិពលខ្លាំង អាចបំផ្លាញសំណាងតារាណាម្នាក់មិនឱ្យទទួលរង្វាន់អូស្កា កំពុងនិងចាប់ផ្តើមធ្លាក់ ទើបការបកអាក្រាតងាយធ្វើទៅបាន។ ការប្តឹងផ្តល់ចោទប្រកាន់នេះបញ្ជាក់កាន់តែច្បាស់ទៀតអំពីដំណើរអស់អំណាចរបស់លោក វីនស្ទីន។ ពីរបីឆ្នាំ ចុងក្រោយនេះ ជំងឺញៀនភេទបានធ្វើឱ្យក្រុមហ៊ុនទើសទាស់នឹងថៅកែខ្លួន និងខូចឈ្មោះ។ មានវ័យក៏កាន់តែចាស់ សុខភាពចុះអន់ អំណាចនិងឥទ្ធិពលនៅហូលីវូត ក៏ចុះថមថយ បញ្ហាថវិកាក៏បានញ៉ាំញីទៀត។ មានក្រុមហ៊ុនភាពយន្តថ្មីៗ ថៅកែល្អគួរឱ្យគោរពលេចមុខខ្លាំងនៅហូលីវូត។ រឿងអាស្រូវនេះនឹងធ្វើឱ្យក្រុមហ៊ុនលោកវីនស្ទីន និងវីនស្ទីនខ្លួនឯង ត្រូវផុងលិប ពិបាកស្តារហើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ