អតីតឧក្រិដ្ឋជនសង្គ្រាមលីបេរីយ៉ាម្នាក់កំពុងទទួលការកាត់ក្តីនៅសហរដ្ឋអាមេរិក
ចុះផ្សាយនៅថ្ងៃ៖
ស្តាប់ - ០៤:០៩
Mohammed Jabateh ជនសង្ស័យឧក្រិដ្ឋកម្មសង្គ្រាមនៅប្រទេសលីបេរីយ៉ាត្រូវតុលាការអាមេរិកជំនុំជម្រះទោស។ ការឃាត់ខ្លួនពេជ្ឈឃាតសង្គ្រាមរូបនេះ គឺក្រោមការជួយជ្រោមជ្រែងសហការពីសំណាក់អង្គការការពារសិទ្ធិមនុស្សអន្តរជាតិ។ បើទោះបីជាជនសង្ស័យបានលួចសំងំខ្លួនរស់នៅសហរដ្ឋអាមេរិកអស់រយៈពេលជាច្រើនឆ្នាំ ប៉ុន្តែ ស្រមោលអតីតកាលនៅតែតាមលងជនដៃដល់នេះជានិច្ច។ ការកាត់ក្តីនេះនឹងក្លាយជាគំរូប្រវត្តិសាស្រ្តមួយ។ ហើយក៏អាចអនុញ្ញាតឲ្យជនរងគ្រោះ និងក្រុមគ្រួសារមានអារម្មណ៍ស្ងប់ចិត្តផងដែរ។
ក្រោយពីសំងំលាក់ខ្លួន និងលាក់អត្តសញ្ញាណអស់រយៈពេលជិត ២០ ឆ្នាំ ទីបំផុត Mohammed Jabateh ត្រូវបានអាជ្ញាធរអាមេរិកចាប់ខ្លួនកាលពីឆ្នាំ២០១៦។ មានអាយុ ៥០ ឆ្នាំ Mohammed Jabateh បានដាក់ពាក្យសុំសិទ្ធិរស់សហរដ្ឋអាមេរិកកាលពីឆ្នាំ១៩៩៩។ នៅលើសំណុំបែបបទសុំសិទ្ធិជ្រកកោន ជនសង្ស័យរូបនេះបានរាយការណ៍ប្រាប់អាជ្ញាធរអាមេរិកថា រូបគេពុំធ្លាប់បានប្រព្រឹត្តឧក្រិដ្ឋកម្ម ឬពាក់ព័ន្ធនឹងសកម្មភាពប្រល័យពូជសាសន៍ណាមួយឡើយ។
ដោយបានតាំងទីលំនៅក្បែរតំបន់ជាយក្រុងមួយនៃទីក្រុង Philadelphia ជនសង្ស័យរូបនេះមានជីវភាពសាមញ្ញ។ គេមានក្រុមហ៊ុនតូចមួយ គឺក្រុមនាំចេញឡានជជុះទៅលក់នៅអាហ្វ្រិក។ នៅក្នុងសហគមន៍ អ្នកជិតខាងចាត់ទុកថា ជនសង្ស័យរូបនេះថាជាបុគ្គលម្នាក់ស្ងប់ស្ងាត់ និងជាអ្នកមានជំនឿសាសនាយ៉ាងជ្រាលជ្រៅ។
ក្រោយពីឃុំខ្លួនរយៈពេលមួយឆ្នាំ សវនាការកាត់ក្តីជនសង្ស័យរូបនេះទើបតែត្រូវបានចាប់បើកកាលពីថ្ងៃទី១ ខែតុលានេះតែប៉ុណ្ណោះ។ ក្នុងកំឡុងពេលបើកអង្គជំនុំជម្រះក្តី តំណាងអយ្យាការនៃតុលាការទីក្រុង Philadelphia បានថ្លែងការចោទប្រកាន់លើជនសង្ស័យរូបនេះ ដោយផែ្អកលើសំអាងថា ជនសង្ស័យរូបនេះបានប្រព្រឹត្តឧក្រិដ្ឋកម្មសង្គ្រាម និងឧក្រិដ្ឋកម្មប្រឆាំងមនុស្សជាតិក្នុងកំឡុងសម័យសង្គ្រាមស៊ីវិលលើកទីមួយក្នុងប្រទេសលីបេរីយ៉ា។ ប៉ុន្តែ ចាប់តាំងពីបានចូលមករស់នៅលើទឹកដីអាមេរិក ជនសង្ស័យពុំដែលធ្លាប់ជាប់ទោស ឬបង្កបញ្ហាអ្វីឡើយជាមួយប៉ូលីស។
ដូចនេះ ដើម្បីអាចដាក់បន្ទុកលើជនសង្ស័យប្រព្រឹត្តឧក្រិដ្ឋសង្គ្រាមរូបនេះ តុលាការអាមេរិកបានសំរេចចោទប្រកាន់ Mohammed Jabateh ចំនួនពីរករណីស្របទៅតាមច្បាប់អាមេរិក។ ទីមួយ គឺពីបទភូតកុហកអាជ្ញាធរអន្តោប្រវេសន៍អាមេរិក។ ទីពីរ គឺពីបទក្បត់ពាក្យសច្ចាប្រណិធានចំពោះអាជ្ញាធរអាមេរិក។
សវនាការកាត់ក្តីនេះបានដំណើរការអស់រយៈពេល ៨ ថ្ងៃ។ អង្គជំនុំជម្រះបានអញ្ចើញសាក្សីចំនួន ១៧ នាក់ ដើម្បីមករៀបរាប់ហេតុការណ៍ដែលពួកបានជួបប្រទះ។ ឆ្លងតាមការរៀបរាប់របស់សាក្សី ព្រមជាមួយនឹងភស្តុងតាងស្រាវជ្រាវស៊ើបអង្កេត គេបានរកឃើញថា Mohammed Jabateh ធ្លាប់ជាមេទ័ពនៃក្រុមឧទ្ទាមមួយ ព្រមទាំងមានរហស្សនាមសង្គ្រាមហៅថា Jungle Jabbah។ ក្រុមឧទ្ទាមនោះមានឈ្មោះពេញថាចលនារំដោះរួបរួមដើម្បីប្រជាធិបតេយ្យប្រទេសលីបេរីយ៉ា ឬហៅកាត់ថា Ulimo។
សូមរំលឹកជូនផងដែរថា ប្រទេសលីបេរីយ៉ាបានឆ្លងកាត់សង្គ្រាមស៊ីវិលចំនួនពីរលើក។ សង្គ្រាមលើកទីមួយគឺ បានផ្ទុះឡើងចន្លោះពីឆ្នាំ ១៩៨៩ ដល់ឆ្នាំ ១៩៩៦។ ហើយសង្គ្រាមលើកទី ២ បានផ្ទុះឡើងម្តងទៀតចន្លោះពីឆ្នាំ ១៩៩៩ ដល់ ឆ្នាំ២០០៣។ សង្គ្រាមទាំងពីរលើកនេះបានបង្កឲ្យមនុស្សចំនួន ២៥ ម៉ឺននាក់ស្លាប់បាត់បង់ជីវិត។ លើសពីនេះទៅទៀត សង្គ្រាមនេះបានបង្ខំឲ្យមនុស្សចំនួន ៤ លាននាក់ធ្វើបំលាស់ទីកន្លែងរស់នៅ។
នៅក្នុងអង្គសវនាការ ជនរងគ្រោះម្នាក់បានប្រាប់ថា នាថ្ងៃមួយ ពេជ្ឈឃាដ Jungle Jabbah បានបញ្ជាឲ្យកូនទាហានបាញ់សំលាប់ប្រធានភូមិម្នាក់។ ហើយថែមទាំងបានឲ្យកូនចៅពុះយកបេះដូងជនរងគ្រោះយកមកចំអិនធ្វើម្ហូបទៀតផង។ សាក្សីផ្សេងទៀតបានបន្ថែមថា ជនស៊ីវិលស្លូតត្រង់ជាបុរសត្រូវបានចាប់ដុតទាំងរស់។ ចំណែកស្រ្តីត្រូវបានចាប់រំលោភសេពសន្ធវៈ ឬវះពោះជាដើម។ ចំណែកជនរងគ្រោះផ្សេងទៀតត្រូវបានជម្លៀសខ្លួន និងចាប់បង្ខំឲ្យធ្វើជាទាសករ នៅតាមការដ្ឋានជីករុករកមាស និងត្បូងពេជ្រ ដែលក្រុមឧទ្ទាមគ្រប់គ្រង។
គិតមកដល់ពេលនេះ ចៅក្រមជំនុំជម្រះក្តី Paul S. Diamond នៅមិនទាន់បញ្ជាក់កាលបរិច្ឆេទប្រកាសសាលក្រមនៅឡើយទេ។ ប្រសិនបើតុលាការនៅបន្តតំកល់សេចក្តីចោទប្រកាន់ទាំងពីរនេះ ជនសង្ស័យរូបនេះអាចជាប់ទោសចំនួន ៣០ ឆ្នាំ។ ការឈានទៅចាប់ខ្លួនវែកមុខមាត់ពិតជនសង្ស័យពេជ្ឈឃាតសង្គ្រាមរូបនេះ គឺដោយសារតែមានពាក្យបណ្តឹងពីអង្គការ Global Justice and Research Project។ អង្គការនេះធ្វើការលើផែ្នកការពារសិទ្ធិមនុស្ស និងការពារក្តីដល់ជនរងគ្រោះសម័យសង្គ្រាមស៊ីវិលនៅប្រទេសលីបេរីយ៉ា។ អង្គការនេះស្ថិតក្រោមតំបូលរបស់អង្គការធំមួយប្រចាំនៅប្រទេសស្វីស គឺអង្គការ Civitas Maxima។
អស់រយៈពេលជាច្រើនឆ្នាំមកហើយ អង្គការនេះព្យាយាមតស៊ូមតិប្រឆាំងនឹងនិន្ទណ្ឌភាព ឬភាពគ្មានទោសពៃចំពោះជនដៃដល់ដែលបានប្រព្រឹត្តបទល្មើសសង្គ្រាមនៅក្នុងប្រទេសលីបេរីយ៉ា។ សព្វថ្ងៃនេះ ឧក្រិដ្ឋកម្មជនសង្គ្រាមមួយភាគធំកំពុងមានសេរីភាពនៅក្នុងប្រទេសលីបេរីយ៉ា។ ចំណែកមួយចំនួនទៀតបានកំពុងសំងំលាក់ខ្លួននៅបរទេស។ ក្រៅពី Mohammed Jabateh ជនសង្ស័យបីរូបទៀតក៏នឹងត្រូវប្រឈមមុខនឹងការទោសផងដែរនៅបរទេស ក្នុងនោះមាននៅប្រទេសប៊ែលហ្សិក ស្វីស និងអង់គ្លេស៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ