របាយការណ៍អ.ស.ប. ៖ ការវាយប្រហារអាវុធគីមីនៅស៊ីរី ជាស្នាដៃរបស់ក្រុងដាម៉ាស
រដ្ឋាភិបាលក្រុងដាម៉ាស របស់ បាស្ហារ អាល់អាសាដ Bachar el -Assad គឺជាអ្នកប្រើអាវុធគីមីវាយប្រហារលើតំបន់ Khan Cheikhoun ដែលបានសម្លាប់ជីវិតមនុស្សអស់ជាង ៨០នាក់ កាលពីថ្ងៃទី៤មេសាកន្លងទៅ។ ភ្នាក់ងារចារកិច្ចបារាំង អង់គ្លេស អាមេរិក ធ្លាប់បានផ្តល់សេចក្តីសន្និដ្ឋានបែបនេះរួចហើយ ប៉ុន្តែនៅថ្ងៃនេះ អង្គការសហប្រជាជាតិ និងអង្គការហាមឃាត់អាវុធគីមី បានចេញរបាយការណ៍បញ្ជាក់ ជាផ្លូវការ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៧
របបក្រុងដាម៉ាស បានដោះសារការពារខ្លួន ដោយចោទពួកឧទ្ទាមថាជាអ្នកទម្លាក់គ្រាប់បែកចំលើឃ្លាំងស្តុកអាវុធគីមី សារាំង។ ប៉ុន្តែរបាយការណ៍របស់អង្គការសហប្រជាជាតិ និងអង្គការហាមឃាត់អាវុធគីមី កម្រាស់ជាង៣០ទំព័រ បានសរុបសេចក្តីសន្និដ្ឋានយ៉ាងច្បាស់លាស់ ៖ គឺរបបក្រុងដាម៉ាស ជាអ្នកវាយប្រហារដោយប្រើអាវុធគីមី សារាំង តាមរយៈការបាញ់ទម្លាក់គ្រាប់បែកគីមីសារាំង ពីលើយន្តហោះ។ នេះបើតាមប្រសាសន៍របស់ប្រមុខការទូតអាមេរិកប្រចាំអង្គការសហប្រជាជាតិ មុនការផ្សព្វផ្សាយរបាយការណ៍ ដែលគ្រប់គ្នារង់ចាំបំផុត។
ក្រុមអ្នកជំនាញឯករាជ្យរបស់ក្រុមប្រឹក្សាសន្តិសុខអង្គការសហប្រជាជាតិ បានលាតត្រដាង មួយចំណុចម្តងៗ ភស្តុតាងដែលបញ្ជាក់ថាការវាយប្រហារគីមីនោះជាស្នាដៃរបស់រដ្ឋាភិបាលលោកអាសាដ។ នៅក្នុងគ្រប់បទសម្ភាសន៍ជាមួយសាក្សី វត្ថុតាងប្រមូលបាននៅកន្លែងកើតហេតុ ការវិភាគប្លង់ហោះហើរ បាននាំទិសចង្អុលឱ្យឃើញច្បាស់អំពីទំនួលខុសត្រូវរបស់ក្រុងដាម៉ាស។ ការវិភាគបង្ហាញឱ្យឃើញ សេណារីយោតែមួយគឺ ការទម្លាក់គ្រាប់បែក នៅពេលព្រឹកព្រហាម ថ្ងៃទី ៤ មេសា ២០១៧ ក្នុងកម្លាំងខ្លាំងគ្រប់គ្រាន់ ដើម្បីឱ្យឧស្ម័នគីមី សារាំង អាចសាយភាយចេញពីរណ្តៅគ្រាប់បាន រយៈពេល ១០ថ្ងៃ ក្រោយការវាយប្រហារ តាមផ្លូវអាកាស។
ដានគំរូប្រមូលបានពីរណ្តៅគ្រាប់ បានបង្ហាញអំពីវត្តមាននៃជាតិគីមីម្យ៉ាងដែលគេធ្លាប់ឃើញមានប្រើនៅក្នុងឃ្លាំងអាវុធគីមីស៊ីរី។ រូបថត និងវីដេអូ ជាច្រើនចាប់បានរូបយន្តហោះ នៃកងទ័ពអាកាសរបស់រដ្ឋាភិបាលស៊ីរីហោះលើផ្ទៃមេឃតំបន់ ក្នុងថ្ងៃនោះ។
រុស្ស៊ី សម្ព័ន្ធមិត្តរបស់ស៊ីរី បានអះអាងថា សារធាតុគីមីសារាំងរកឃើញនោះ គឺភាយចេញមកពីការផ្ទុះគ្រាប់កាំភ្លើងធំនៅនឹងដី មិនមែនជាគ្រាប់ធ្លាក់មកពីការវាយប្រហារផ្លូវអាកាសទេ។
ការចោទប្រកាន់ផ្លូវការ និងចំៗនេះ ធ្លាក់មកជួនចំពេលអង្គការសហប្រជាជាតិ ទើបប្រកាសបើកវដ្តចរចាថ្មីស្តីពីស៊ីរី ចាប់ពីថ្ងៃទី ២៨ វិច្ឆិកាទៅ។ អាមេរិក តាមរយៈរដ្ឋមន្ត្រីការបរទេសបានប្រកាសភ្លាមថា អនាគតរបស់ស៊ីរី ត្រូវតែគ្មានរូប Bachar al-Assad និងសមាជិកគ្រួសារត្រកូលនេះនៅក្នុងជួរថ្នាក់ដឹកនាំប្រទេស៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ