លោកដូណាល់ ត្រាំចង់កាត់ទោសប្រហារជីវិតលើភេរវជនដែលវាយប្រហារក្នុងទីក្រុងញូយ៉ក
នៅសហរដ្ឋអាមេរិក លោកប្រធានាធិបតីដូណាល់ ត្រាំហាក់ប្តូរចិត្តទាក់ទងនឹងជោគវាសនារបស់ភេរវជនឈ្មោះ Sayfullo Saipov ដែលបានបង្កភេរវកម្មក្នុងទីក្រុងញូយ៉កកាលពីរសៀលថ្ងៃអង្គារ ទី៣១ តុលា។ បន្ទាប់ពីចង់បញ្ជូនជន Sayfullo Saipov ទៅញាត់ក្នុងគុក Guantanamo មក លោកត្រាំបានត្រឡប់មកអះអាងនាថ្ងៃព្រហស្បតិ៍ ទី២ វិច្ឆិកាថា លោកចង់ឲ្យមានការកាត់ទោសប្រហារជីវិតជន Saipov វិញ ព្រោះនីតិវិធីបញ្ជូនទៅកាន់គុក Guantanamo ហាក់ដូចជាត្រូវប្រើពេលយូរ និងស្មុគស្មាញ។
ចុះផ្សាយនៅថ្ងៃ៖
ស្តាប់ - ០១:៥៨
ក៏ដូចជាទម្លាប់សព្វមួយដង ប្រតិកម្មរបស់លោកដូណាល់ ត្រាំត្រូវបានធ្វើឡើងតាមរយៈទំព័របណ្តាញសង្គម Twitter របស់លោក។ « ខ្ញុំមានបំណងចង់បញ្ជូនភេរវជននៅទីក្រុងញូយ៉កទៅដាក់ក្នុងពន្ធនាគារ Guantanamo តែនីតិវិធីមួយនេះទំនងជាត្រូវប្រើពេលយូរជាងការប្រើនីតិវិធីដោយឆ្លងកាត់តាមប្រព័ន្ធសហព័ន្ធ » នេះជាឃ្លាឃ្លោងដែលលោកត្រាំបានសរសេរនៅក្នុងទំព័របណ្តាញសង្គម Twitter របស់លោក រួចសរសេរបន្ថែមដោយត្រង់ៗ និងចំៗថា « ត្រូវតែចាត់វិធានការឲ្យបានលឿនគឺប្រហារជីវិត »។
សូមរម្លឹកជូនថា ជនអូសបេគីស្ថានឈ្មោះ Sayfullo Saipov ភេទប្រុស និងមានអាយុ២៩ឆ្នាំ គឺជាភេរវជនដែលបានបរឡានឡើងលើផ្លូវកង់សំដៅបុកអ្នកជិះកង់ និងអ្នកដំណើរយ៉ាងកម្រោលក្នុងសង្កាត់ Manhattan ទីក្រុងញូយ៉កដោយបណ្តាលឲ្យស្លាប់មនុស្ស ៨នាក់ និងរបួស ១២នាក់កាលពីរសៀលថ្ងៃអង្គារ ទី៣១ តុលា។ ចាប់បានទាំងរស់ តែរងរបួស ជន Sayfullo Saipov បានបង្ហាញពីការមិនសោកស្តាយ និងថែមទាំងពេញចិត្តចំពោះអ្វីដែលគេបានធ្វើក្នុងបុព្វហេតុអង្គការរដ្ឋអ៊ីស្លាម នេះបើតាមបណ្តឹងរបស់រដ្ឋអាជ្ញាសហព័ន្ធនៅក្រោយសួរចម្លើយ។ តាមក្រុមអ្នកស៊ើបអង្កេត ជន Sayfullo Saipov ហ៊ានទាំងទាមទារឲ្យដាក់ពង្រាយទង់អង្គការរដ្ឋអ៊ីស្លាមនៅក្នុងបន្ទប់នៃមន្ទីរពេទ្យដែលខ្លួនកំពុងព្យាបាលរបួសទៀតផង។
តាមការចោទប្រកាន់របស់រដ្ឋអាជ្ញាក្នុងទង្វើហិង្សា និងបំផ្លាញរថយន្ត ព្រមទាំងជំហរគាំទ្រអង្គការភេរវនិយមបរទេស ជន Sayfullo Saipov ប្រឈមនឹងការជាប់គុកអស់មួយជីវិត។ តែនៅថ្ងៃពុធ ទី១ វិច្ឆិកា រដ្ឋអាជ្ញាក្នុងសង្កាត់ Manhattan បានលើកឡើងនូវនីតិវិធីមួយដែលអនុញ្ញាតឲ្យកាត់ទោសប្រហារជីវិតជន Sayfullo Saipov ។ ការលើកឡើងរបស់រដ្ឋអាជ្ញាក្នុងសង្កាត់ Manhattan ដូចនេះក៏ជាការចង់បានរបស់លោកដូណាល់ ត្រាំតាំងពីយប់ថ្ងៃពុធ ទី១ វិច្ឆិកាដដែល។ បញ្ជូនទៅញាត់ក្នុងគុក Guantanamo ឬមួយក៏កាត់ទោសប្រហារជីវិត គេនឹងដឹងនៅពេលក្រោយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ