តួកគីប្រមូលផ្តុំពិភពអារ៉ាប ដើម្បីជជែកអំពីបញ្ហាហ្ស៊េរុយសាឡិម
ប្រធានាធិបតីតួកគី លោក អ៊ែរដូហ្កាន Recep Tayyip Erdoğan បានបើកកិច្ចប្រជុំកំពូល នៃអង្គការសហប្រតិបត្តិការអ៊ីស្លាម នៅថ្ងៃទី១៣ធ្នូនេះ នៅទីក្រុងអ៊ីស្តង់ ដើម្បីជជែកអំពីបញ្ហាហ្ស៊េរុយសាឡិម ដោយមានប្រមុខរដ្ឋ-រដ្ឋាភិបាលជាង២០ប្រទេសបានចូលរួម។ លោកប្រធានាធិបតីចង់ប្រមូលផ្តុំពិភពអារ៉ាបជាធ្លុងមួយ ស្រែកប្រឆាំងនឹងសេចក្តីសម្រេចរបស់លោកដូណាល់ត្រាំ កាលពីសប្តាហ៍មុន ទទួលស្គាល់ ក្រុងហ្ស៊េរុយសាឡិម ជារដ្ឋធានីរបស់អ៊ីស្រាអែល។
ចុះផ្សាយនៅថ្ងៃ៖
ស្តាប់ - ០១:៥៣
ប្រមុខរដ្ឋ-រដ្ឋាភិបាល ចំនួន២២ប្រទេស រួមមានលោកប្រធានអាជ្ញាធរប៉ាឡេស្ទីន ម៉ាមូដ អាបាស់ ព្រះចៅហ្សកដានី ប្រធានាធិបតីអ៊ីរ៉ង់ រ៉ូហានី ... បានបង្ហាញវត្តមានក្បែរលោកប្រធានាធិបតីតួកគី ក្នុងកិច្ចប្រជុំកំពូលវិសាមញ្ញនៃអង្គការសហប្រតិបត្តិការអ៊ីស្លាម (មានសមាជិក៥៧ប្រទេស)នេះ នៅទីក្រុងអ៊ីស្តង់ប៊ូល ដើម្បីចេញសេចក្តីថ្លែងការណ៍រួម “សេចក្តីថ្លែងការណ៍អ៊ីស្តង់ប៊ូល” បរិហារសេចក្តីសម្រេចរបស់លោកប្រធានាធិបតីអាមេរិក ទទួលស្គាល់ក្រុងហ្ស៊េរុយសាឡិមជារដ្ឋធានីរបស់អ៊ីស្រាអែល។
ជាងនេះទៅទៀត នៅក្នុងសុន្ទរកថាបើកកម្មវិធី តួកគី បានអំពាវនាវឱ្យសហគមន៍អន្តរជាតិ ទទួលស្គាល់ប៉ាឡេស្ទីនជារដ្ឋមួយ ដោយមានគំនូសព្រំដែនឆ្នាំ១៩៦៧ ជាគោល ព្រមទាំងទទួលស្គាល់ក្រុងហ្ស៊េរុយសាឡិមខាងកើតជារដ្ឋធានីរបស់ប៉ាឡេស្ទីន។
ក្នុងនាមជាម្ចាស់ផ្ទះ លោក អ៊ែរដូហ្កាន បានដំឡើងសំឡេងរួចជាស្រេច ចាត់ទុកអ៊ីស្រាអែល ជារដ្ឋភេរវនិយម និងឈ្លានពាន និងបានព្រមានថា ពិភពអារ៉ាបនឹងមិនអនុញ្ញាតឱ្យមានការអនុវត្តវិធានការអាមេរិកបានដោយស្រួលឡើយ។ លោក អ៊ែរដូហ្កាន បានប្រឹងប្រែង តាំងពីមួយសប្តាហ៍មក សង្ឃឹមថានឹងអាចប្រមូលផ្តុំពិភពអារ៉ាប ឱ្យមករួមដៃជាមួយលោកប្រឆាំងនឹងអាមេរិក ប៉ុន្តែការលំបាកមានច្រើន ៖ ប្រទេសអារ៉ាបមួយចំនួនបញ្ចេញប្រតិកម្មប្រឆាំងចុងមាត់ចុងក ខ្លះទៀតមិនចង់ប្រឈមនឹងអាមេរិក ឬអ៊ីស្រាអែលម្តង។ ក្រុមប្រទេសអ៊ីស្លាមធំៗនៅឈូងសមុទ្ទពែក្ស ខ្វល់ខ្វាយគិតរកវិធីទប់ស្កាត់ឥទ្ធិពលអ៊ីរ៉ង់ច្រើនជាង។ ជាក់ស្តែង អេហ្ស៊ីប អារ៉ាប៊ីសាអូឌីត បានត្រឹមបញ្ជូនរដ្ឋមន្ត្រីការបរទេសមកប្រជុំតែប៉ុណ្ណោះ។
ថ្វីបើជំនួបអ៊ីស្តង់ប៊ូលនេះ មិនផុសផុលខ្លាំងមែន តែវាបានលើកតម្កើងលោក អ៊ែរដូហ្កាន ឱ្យលេចមុខលេចមាត់ខ្លាំង ក្នុងនាមជាអ្នកការពារពិភពអារ៉ាបនៅលើពិភពលោក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ