២០១៧ ជាឆ្នាំប្រកបទៅដោយគ្រោះធម្មជាតិធំៗនៅសហរដ្ឋអាមេរិក
ចុះផ្សាយនៅថ្ងៃ៖
ស្តាប់ - ០៤:១៥
សំរាប់ឆ្នាំ២០១៧ កន្លងទៅនេះ សហរដ្ឋអាមេរិកបានទទួលរងគ្រោះធម្មជាតិធំៗជាហូរហែរ។ ក្នុងនោះមានដូចជា ខ្យល់ព្យុះកំបុតត្បូង គ្រោះទឹកជំនន់ និងភ្លើងឆេះព្រៃជាដើម។ ហើយទំហំខូចខាតបណ្តាលមកពីបាតុភូតធម្មជាតិនេះ គឺកាន់តែមានភាពធំឡើងៗគួរឲ្យព្រួយបារម្ភ។ បើតាមសំដីអ្នកវិទ្យាសាស្រ្តបានឲ្យដឹងថា បញ្ហាគ្រោះធម្មជាតិនេះ គឺបណ្តាលមកពីការប្រែប្រួលអាកាសធាតុ។ អ្វីដែលជារឿងគួរឲ្យអស់សំណើច គឺឆ្នាំ២០១៧នេះទៀតសោតក៏ជាឆ្នាំ ដែលសហរដ្ឋអាមេរិកបានសំរេចដកខ្លួនចេញពីកិច្ចព្រមព្រៀងទីក្រុងប៉ារីសស្តីពីអាកាសធាតុ។
នៅសហរដ្ឋអាមេរិក មហន្តរាយធំតំបូងសំរាប់ឆ្នាំ២០១៧ គឺបានចាប់ផ្តើមពីខ្យល់ព្យុះ Harvey។ ខ្យល់ព្យុះនេះបានបោកបក់កាលពីចុងខែសីហា។ ទីក្រុង Houston ក្នុងរដ្ឋតិចសាស់បានលិចលុងអស់រយៈពេលជាច្រើនសប្តាហ៍។ មានមនុស្សជាងដប់នាក់បានបាត់បង់អាយុជីវិត។ មនុស្សរាប់សែននាក់ត្រូវបានជម្លៀសខ្លួន។ ទំហំខូចខាតមានប្រមាណជាងរាប់ពាន់លានដុល្លារ។ សូមបញ្ជាក់ថា Houston ជាទីក្រុងដ៏ធំទីបួននៅសហរដ្ឋអាមេរិក។ ហើយក៏ជាតំបន់សំបូរទៅដោយធនធានប្រេងកាតដ៏ធំជាងគេផងដែរ។
មួយសប្តាហ៍ក្រោយមក គឺដល់វេនខ្យល់ព្យុះ Irma វិញម្តង។ ខ្យល់ព្យុះកំណាចនេះមានល្បឿន ៣០០ គីឡូម៉ែត្រក្នុងមួយម៉ោង។ ខ្យល់ព្យុះនេះបានបោសកំទេចផ្ទះសម្បែងនៅតាមបណ្តាប្រជុំកោះការ៉ាអ៊ីប។ ពេលឆ្លងកាត់ទឹកដីអាមេរិក ព្យុះកំណាចនេះបានបណ្តាលឲ្យមនុស្សម្នារាប់លាននាក់នៅក្នុងរដ្ឋ Florida ត្រូវបង្ខំចិត្តជម្លៀសខ្លួនទៅកាន់ទីសុវត្ថិភាព។ ចំណែកបណ្តាដែនដីកោះឯករាជ្យមួយចំនួនដូចជា Saint-Martin និង Barbuda សុទ្ធតែបានទទួលរងការបំផ្លិចបំផ្លាញយ៉ាងដំណំ។ មហន្តរាយនេះបានជំរុញឲ្យបណ្តាមេដឹកនាំនៃដែនដីកោះទាំងនោះប្រកាសអាសន្នអំពីការកើនឡើងកំដៅភពផែនដី ដែលជាដើមចមនៃការប្រែប្រួលអាកាសធាតុ។
មិនបានយូរប៉ុន្មានផង ដល់វេនខ្យល់ព្យុះកំណាចមួយទៀត គឺព្យុះ Maria។ ព្យុះនេះបានបំផ្លិចបំផ្លាញដែនកោះឯករាជ្យមួយ គឺកោះ Dominique និងកោះ Porto Rico ដែលជាដែនដីភ្ជាប់ជាមួយនឹងសហរដ្ឋអាមេរិក។ ហើយថ្មីៗនេះទៀតសោត បម្រែប្រមួលអាកាសធាតុបានបញ្ចេញមហិទ្ធិឫទ្ធិយ៉ាងពេញទំហឹងតែម្តង។ នៅរដ្ឋកាលីហ្វ័រនីញ៉ា កំដៅអាកាសធាតុបានបណ្តាលឲ្យមានភ្លើងឆេះព្រៃយ៉ាងសន្ធោសន្ធៅ។ អគ្គិភ័យធម្មជាតិនេះបានបណ្តាលឲ្យឆេះបំផ្លាញចំការទំពាំងបាយជូនៅតំបន់ទីក្រុង San Francisco។ ហើយអគ្គិភ័យនេះថែមទាំងបានដុតកំទេចផ្ទះសម្បែងនៅតាមសង្កាត់មួយចំនួននៃទីក្រុង Los Angeles ទៀតផង។
លោក Jerry Brown អភិបាលរដ្ឋកាលីហ្វ័រញ៉ាបានអះអាងថា នេះជាមហន្តរាយភ្លើងឆេះព្រៃដ៏កាចសាហាវជាងគេពុំធ្លាប់មានរយៈពេល ៨០ ឆ្នាំចុងក្រោយនេះ។ ហើយដោយសារតែរដ្ឋមួយនេះតែងជួបគ្រោះរាំងស្ងួត ដូចនេះ ការកើនឡើងកំដៅអាចនឹងបង្កឲ្យមានភ្លើងឆេះព្រៃយ៉ាងងាយ។ មហន្តរាយដ៏កំណាចរបៀបនេះនឹងកាន់តែអាចកើតឡើងជាញឹកញ៉ាប់នាពេលអនាគតខាងមុខនេះ។ លោក Jerry Brown ជាអភិបាលរដ្ឋម្នាក់ក្នុងចំណោមអភិបាលរដ្ឋ និងអភិបាលក្រុងធំៗជាច្រើននៅសហរដ្ឋអាមេរិក ដែលចង់បន្តចូលរួមគោរពកិច្ចព្រមព្រៀទីក្រុងប៉ារីសស្តីពីអាកាសធាតុ។ ម្នាក់ៗចង់បន្តអនុវត្តកិច្ចព្រមព្រៀងនេះ ដើម្បីបង្ហាញសញ្ញាប្រឆាំងនឹងសេចក្តីសំរេចចិត្តរបស់លោក ដូណាល់ ត្រាំ។
សូមរំលឹកជូនថា កិច្ចព្រមព្រៀងអន្តរជាតិស្តីពីអាកាសធាតុត្រូវបានចុះហត្ថលេខាកាលពីខែធ្នូ ឆ្នាំ២០១៥។ ប្រមុខរដ្ឋ ចំនួន ១៩៦ ប្រទេសបានចុះហត្ថលេខាលើកិច្ចព្រមព្រៀងប្រវត្តិសាស្រ្តនេះ។ គោលដៅនៃកិច្ចព្រមព្រៀងនេះ គឺធ្វើយ៉ាងណាឲ្យកំដៅភពផែនដៅមិនលើសពី ២ អង្សារ ចាប់ពីយុគសម័យឧស្សាហកម្ម។ ការបន្ថយកំដៅនេះនឹងអាចជួយបញ្ចៀសផលវិបាកធ្ងន់ធ្ងរ ក្នុងនោះមានដូចជា ការកើនឡើងកំពស់ទឹកសមុទ្រ និងការរលាយទឹកកកជាដើម។
សហរដ្ឋអាមេរិកក្រោមការដឹកនាំរបស់លោកប្រធានាធិបតី ដូណាល់ ត្រាំ បានសំរេចដកខ្លួនចេញពីកិច្ចព្រមព្រៀងអន្តរជាតិនេះ។ លោក ត្រាំ យល់ឃើញថា កិច្ចព្រមព្រៀងនេះអាចប៉ះពាល់ធ្ងន់ធ្ងរដល់សេដ្ឋកិច្ចអាមេរិក និងក៏ជាការហុចឱកាសឲ្យចិនអាចដឹកនាំសេដ្ឋកិច្ចពិភពលោក។នៅក្នុងរបាយការណ៍ស្តីពីយុទ្ធសាស្រ្តសន្តិសុខជាតិរបស់សហរដ្ឋអាមេរិក រដ្ឋការលោក ដូណាល់ ត្រាំ បានសំរេចដកពាក្យ ការកើនកំដៅផែនដី ចេញពីក្នុងបញ្ជីនៃការគាំរាមកំហែង។ នេះជាលើកទីមួយហើយដែលពាក្យនេះត្រូវបានដកចេញ បើយើងប្រៀបធៀបក្នុងរយៈពេល ២០ ឆ្នាំចុងក្រោយនេះ។
សំរាប់នយោបាយរបស់លោក ដូណាល់ ត្រាំ គឺសហរដ្ឋអាមេរិកត្រូវតែមានឯករាជ្យភាពផែ្នកថាមពល តាមរយៈការប្រើប្រាស់ថាមពលហ្វូស៊ីល មានជាអាទិដូចជាប្រេងកាត ធ្យូងថ្ម និងឧស្ម័នក្រោមដីជាដើម។ ផ្ទុយទៅវិញ នៅតាមបណ្តាប្រទេសនានា គេកំពុងតែងាកមកចាប់អារម្មណ៍វិនិយោគស្រាវជ្រាវលើផែ្នកថាមពលព្រះអាទិត្យ និងថាមពលកង្ហារខ្យល់។ កន្លងមក លោក ដូណាល់ ត្រាំ តែងអះអាងថា វិស័យឋាមពល គឺជាការបង្កើតការងារជូនពលរដ្ឋអាមេរិក។ ដោយយោងលើហេតុផលនេះហើយ កាន់អំណាចបានមិនដល់មួយឆ្នាំពេញផង លោក ដូណាល់ ត្រាំ បានលុបចោលច្បាប់ការពារបរិស្ថាន Clean Power Plan របស់លោកអតីតៈប្រធានាធិបតី បារ៉ាក់ អូបាម៉ា។ លើសពីនេះ លោក ត្រាំ ក៏ថែមទាំងបានចុះហត្ថលេខាលើក្រឹត្យមួយចំនួន ដើម្បីអនុញ្ញាតឲ្យមានការបើកការដ្ឋានរុករកប្រេងកាត និងឧស្ម័ន នៅក្នុងតំបន់ឈូងសមុទ្រម៉ិចសិក និងក្នុងរដ្ឋអាឡាស្កា។ គោលដៅរបស់លោក ដូណាល់ ត្រាំ គឺចង់ប្រែក្លាយសហរដ្ឋអាមេរិកឲ្យទៅជាប្រទេសនាំចេញថាមពលដ៏ធំជាងគេនាឆ្នាំ ២០២៦ ខាងមុខនេះ។
លោក Michael Mann អ្នកស្រាវជ្រាវផែ្នកបរិស្ថានប្រចាំសាកលវិទ្យាល័យនៃរដ្ឋ Pennsylavania បានវិភាគថា លោក ដូណាល់ ត្រាំ បានបំផ្លាញនូវអ្វីដែលជាកិច្ចខិតខំប្រឹងប្រែងការពារបរិស្ថាន។ បើតាមលោក Alden Myer នាយកផែ្នកយុទ្ធសាស្រ្តប្រចាំអង្គការ Union of concerned scientists បានព្រលយពាក្យថា បើលោក ដូណាល់ ត្រាំ កាន់អំណាចតែមួយអាណត្តិ ផលប៉ះពាល់បរិស្ថាននឹងមានរយៈពេលខ្លីតែប៉ុណ្ណោះ។ ពោល គឺរយៈពេលតែបីទៅបួនឆ្នាំប៉ុណ្ណោះ។
ក្រៅពីសហរដ្ឋអាមេរិក នៅតាមបណ្តាប្រទេសផ្សេងទៀតជុំវិញពិភពលោក ឆ្នាំ២០១៧ ក៏ជាឆ្នាំប្រកបទៅដោយគ្រោះធម្មជាតិវឹកវរផងដែរ។ ទឹកភ្លៀងបានបង្កជាទឹកជំនន់លិចលង់ប្រទេសឥណ្ឌា បង់ក្លាដែស និងនេប៉ាល់។ មានមនុស្សប្រមាណជាង ១២០០ នាក់បានស្លាប់បាត់បង់ជីវិត។ ផ្ទះសម្បែង និងកសិផលត្រូវបានបំផ្លិចបំផ្លាញ។ ចំណែកនៅទ្វីបអឺរ៉ុប គ្រោះរាំងស្ងួតបានអង្រួនប្រទេសអេស៉្បាញ និងព័រទុយហ្គាល់ ដែលជាហេតុបង្កឲ្យមានភ្លើងឆេះព្រៃរាលដាលយ៉ាងសន្ធោសន្ធៅ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ