អង្គការសហប្រជាជាតិបញ្ចេញមូលនិធិសង្រ្គោះបន្ទាន់សម្រាប់ជំនួយមនុស្សធម៌នៅយេម៉ែន
អង្គការសហប្រជាជាតិបានប្រកាសឲ្យដឹងពីការដកលុយចំនួន ៥០លានដុល្លារពីមូលនិធិសង្រ្គោះបន្ទាន់ទៅជួយប្រទេសយេម៉ែន។ មូលហេតុមកពីស្ថានការណ៍មនុស្សធម៌នៅក្នុងប្រទេសធ្លាក់ក្នុងសង្រ្គាមស៊ីវិលមួយនេះកំពុងធ្លាក់ដុះដាបយ៉ាងខ្លាំង។ សូមរម្លឹកជូនថាតាំងពីឆ្នាំ ២០១៤ មក ក្រុមឧទ្ទាមហ៊ូទីបានដណ្តើមកាន់កាប់ប៉ែកខាងជើងប្រទេស និងទីក្រុងសាណា ហើយប៉ែកខាងត្បូងបានស្ថិតក្នុងដៃប្រធានាធិបតីយេម៉ែនលោកមែនស៊ូ ហាឌីដែលគាំទ្រដោយសហគមន៍អន្តរជាតិ និងកម្លាំងសម្ព័ន្ធអារ៉ាប់ដឹកនាំដោយប្រទេសអារ៉ាប៊ីសាអូឌីត។
ចុះផ្សាយនៅថ្ងៃ៖ កែប្រែថ្ងៃទី៖
សង្រ្គាមស៊ីវិលរយៈពេល ៣ឆ្នាំកន្លងទៅបានបណ្តាលឲ្យមានមនុស្សស្លាប់ជាង ៨ ០០០នាក់ និងមានស្ថានការណ៍មនុស្សធម៌ដុនដាបខ្លាំង។ តាមកាកបាទក្រហមអន្តរជាតិ មានប្រជាជនយេម៉ែនចំនួន ៨០%កំពុងខ្វះអាហារទទួលទាន និងមានជាង ១លាននាក់អាចនឹងប្រឈមមុខនឹងជំងឺអាសន្នរោគ។ ម្យ៉ាងទៀត ការដឹកជំនួយមនុស្សធម៌ទៅកាន់ប្រទេសយេម៉ែនក៏មានការលំបាកខ្លាំងដោយសារតែជម្លោះប្រដាប់អាវុធ។
លោក Farhan Haq អ្នកនាំពាក្យម្នាក់របស់អគ្គលេខាធិការអង្គការសហប្រជាជាតិបានប្រាប់ឲ្យដឹងថា ទោះបីជាការដឹកជញ្ជូនជំនួយមនុស្សធម៌មានភាពប្រសើរឡើងបន្តិចកាលពីខែកន្លងទៅ ដោយមានការបើកឲ្យមានជើងហោះហើរ និងការបើកកំពង់ផែនៅសមុទ្រក្រហមដើម្បីទទួលប្រេងកាត និងគ្រឿងឧបភោគ បរិភោគក៏ដោយ ក៏អង្គការសហប្រជាជាតិនៅមានក្តីព្រួយបារម្ភខ្លាំងនឹងស្ថានភាពមនុស្សធម៌ដុនដាបខ្លាំង។
តាមក្រុមអ្នកកាសែតដែលកំពុងយកព័ត៌មាននៅក្នុងប្រទេសយេម៉ែន ជំនួយមនុស្សធម៌នៅមិនទាន់បានទៅដល់នៅឡើយទេ ហើយក្រុមឧទ្ទាមហ៊ូទី និងកម្លាំងសម្ព័ន្ធអារ៉ាប់ដឹកនាំដោយប្រទេសអារ៉ាប៊ីសាអូឌីតបានចោទគ្នាទៅវិញ ទៅមកពីបទរារាំងជំនួយមនុស្សធម៌។ ដោយឡែក អង្គការសហប្រជាជាតិបានបន្តអំពាវនាវឲ្យមានដំណោះស្រាយនយោបាយសម្រាប់វិបត្តិផ្ទៃក្នុងយេម៉ែន។
« ប្រជាជនយេម៉ែនត្រូវតែបិទបញ្ចប់ជម្លោះផ្ទៃក្នុងដើម្បីកសាងជីវិតឡើងវិញ។ ដើម្បីអាចសម្រេចកិច្ចការនេះបាន គ្រប់ភាគីជម្លោះទាំងអស់ត្រូវតែបញ្ចប់ការប្រឈមមុខដាក់គ្នា និងសន្យាជាមួយអង្គការសហប្រជាជាតិឆ្ពោះទៅរកដំណោះស្រាយនយោបាយយូរអង្វែង » នេះជាការថ្លែងរបស់លោក Farhan Haq។ គួររម្លឹកជូនថាកន្លងមក មានការប៉ុនប៉នស្វែងរកដំណោះស្រាយជាច្រើនដង តែនៅមិនទាន់ទទួលផលវិជ្ជមាននៅឡើយទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ