អាមេរិក៖សៀវភៅ « Fire and Fury » កំពុងធ្វើឲ្យលោកដូណាល់ ត្រាំញាក់សាច់
ចុះផ្សាយនៅថ្ងៃ៖
ស្តាប់ - ០៦:៣១
នៅសហរដ្ឋអាមេរិក សៀវភៅក្រោមចំណងជើង « Fire and Fury » ឬអាចប្រែជាភាសាខ្មែរថា « ភ្លើង និងកំហឹង » ត្រូវបានដាក់លក់ជាសាធារណៈតាំងពីថ្ងៃសុក្រ ទី៥ មករា។ អ្នកនិពន្ធលោក Michael Wolff បានសរសេរទាក់ទងនឹងអកប្បកិរិយា ឥរិយាបទ និងបុគ្គលិកលក្ខណៈរបស់លោកប្រធានាធិបតីដូណាល់ ត្រាំ។ លោកត្រាំដែលបានព្យាយាមគ្រប់មធ្យោបាយដើម្បីរារាំងការចេញលក់សៀវភៅនោះ។ យ៉ាងណាក៏ដោយ លោកប្រមុខការទូតអាមេរិក Rex Tillerson ដែលធ្លាប់លើកឡើងពីបញ្ហាសរសៃប្រសាទរបស់លោកត្រាំបែរជាបានចេញមុខការពារលោកត្រាំទៅវិញ។
គួរបញ្ជាក់ជូនថា សៀវភៅ « Fire and Fury » បានចេញលក់មុនកាលកំណត់ដល់ទៅ ៤ថ្ងៃ ព្រោះតាមគម្រោង អ្នកនិពន្ធត្រៀមនឹងដាក់លក់ជាសាធារណៈនៅថ្ងៃទី៩ មករាសប្តាហ៍ក្រោយ។ ម្យ៉ាងទៀតមុននឹងដាក់លក់ជាសាធារណៈនៅថ្ងៃសុក្រ ទី៥ មករា ខ្លឹមសារខ្លះៗនៅក្នុងសៀវភៅមួយនេះក៏ធ្លាប់បានផ្សព្វផ្សាយនៅតាមបណ្តាញសារព័ត៌មានជាហូរហែកន្លងមក។ ជាសៀវភៅនយោបាយដែលអ្នកនិពន្ធលោក Michael Wolff បានសរសេរទាក់ទងនឹងអកប្បកិរិយា ឥរិយាបទ និងបុគ្គលិកលក្ខណៈរបស់លោកប្រធានាធិបតីដូណាល់ ត្រាំ។
មានអាយុ ៦៤ឆ្នាំ មានមុខមូល និងក្បាលឆក លោក Michael Wolff ជាអ្នកកាសែតក្នុងទីក្រុងញូយ៉ក និងដែលគេស្គាល់លោកតាមរយៈសំណេរបទវិចារណៈកថានៅក្នុងទស្សនាវដ្តីជាច្រើនដូចយ៉ាង Hollywood Reporter Vanity Fair ឬមួយក៏ New York Magazine ជាដើម។ លោក Michael បានបញ្ជាក់ថា ដើម្បីអាចសរសេរសៀវភៅ« Fire and Fury » ស្តីពីលោកដូណាល់ ត្រាំនេះបាន លោកបានប្រើពេលប្រមែប្រមូលព័ត៌មានពីលោកត្រាំផ្ទាល់ និងពីមនុស្សជំនិតជិត ឆ្ងាយរបស់លោកត្រាំរយៈពេល ១៨ខែ។ មានន័យថា តាំងពីលោកត្រាំឈរឈ្មោះជាបេក្ខជនប្រធានាធិបតី ពេលលោកត្រាំកំពុងធ្វើយុទ្ធនាការឃោសនាបោះឆ្នោត និងនៅពេលលោកត្រាំចូលអង្គុយកៅអីប្រធានាធិបតីនៅសេតវិមាន។
លោក Michael បានប្រាប់ឲ្យដឹងទៀតថា លោកបានធ្វើការសាកសួរលើមនុស្សជាង ២០០នាក់ដែលមានតាំងពីទីប្រឹក្សា អតីតទីប្រឹក្សា និងមិត្តជិតឆ្ងាយរបស់លោកត្រាំ។ បន្ទាប់មក លោកក៏ធ្លាប់បាននិយាយផ្ទាល់ជាមួយលោកត្រាំអស់ ៣ម៉ោងនៅក្នុងសម័យឃោសនាបោះឆ្នោត ក្រោយពេលស្បថចូលកាន់តំណែង និងនៅក្នុងសេតវិមាន។ លោក Michael បានបន្ថែមថា អ្វីដែលលោកបានរៀបរាប់នៅក្នុងសៀវភៅនេះ គឺជាព័ត៌មានដែលសាក្សីទាំងអស់បានផ្តល់ឲ្យលោក។
ប្រពន្ធលោកដូណាល់ ត្រាំស្រក់ទឹកភ្នែកខកចិត្តពេលដឹងថាប្តីជាប់ឆ្នោត
អ្នកនិពន្ធចង់រៀបរាប់ប្រាប់អ្នកអានពីពីរឿងអាថ៌កំបាំងរបស់គ្រួសារលោកត្រាំ និងបុគ្គលិកលក្ខណៈរបស់លោកដូណាល់ ត្រាំក្នុងនាមជាប្រធានាធិបតី។ ដោយផ្អែកលើសាក្សីដែលមានទាំងអ្នកចេញមុខ និងអ្នកមិនចេញមុខ លោក Michael បានសរេសរពីភាពមិនប្រក្រតីនៃអំណាចនីតិប្រតិបត្តិ និងរូបប្រធានាធិបតីដែលមិនចូលចិត្តអាន និងច្រើនចូលទៅសំងំក្នុងបន្ទប់ចាប់ពីម៉ោង ៦កន្លះល្ងាចដោយភ្នែកសម្លឹងលើកញ្ជក់ទូរទស្សន៍ចំនួន ៣ រួចចូលចិត្តនិយាយទូរស័ព្ទលេងសើចជាមួយមិត្តជិតដិតមួយក្តាប់តូច។
តាមលោក Michael មនុស្សជំនិតជិត ឆ្ងាយគ្រប់រូបរបស់លោកដូណាល់ ត្រាំ រាប់ទាំងក្រុមទីប្រឹក្សាផងតែងតែចោទសួរខ្លួនគេគ្រប់ពេលពីសមត្ថភាពរបស់លោកត្រាំក្នុងការដឹកនាំប្រទេស។ ក្រុមមនុស្សទាំងអស់នោះបាននិយាយប្រាប់លោក Michael ថា លោកត្រាំបញ្ចេញប្រតិកម្មដូចកូនក្មេង និងបានប្រៀបលោកត្រាំទៅនឹងគ្រាប់ប៊ូលនៅក្នុងម៉ាស៊ីនល្បែងមួយដែលរត់គ្មានទិសដៅមុននឹងធ្លាក់ចូលក្នុងរន្ធណាមួយ។ ឧទាហរណ៍នៅក្នុងន័យនេះត្រូវបានលោក Michael សរសេរថា លោកត្រាំនិយាយតែដដែលៗច្រើនដងក្នុងរឿងតែមួយ ពោល ៣ដងក្នុងរយៈពេល ១០នាទី។
អ្នកនិពន្ធបានបញ្ជាក់នៅក្នុងសៀវភៅរបស់ខ្លួនថាតាមពិតទៅ លោកដូណាល់ ត្រាំមិនចង់ក្លាយជាប្រធានាធិបតីទេ ហើយលោកត្រាំក៏មិនបានរង់ចាំ និងមិននឹកស្មានថាលោកឈ្នះដែរ។ តាមសៀភៅដដែល លោកត្រាំថែមទាំងបានប្រាប់ប្រពន្ធខ្លួនឯងថា មិនបាច់រង់ចាំជាស្រ្តីទី១ ទេ ព្រោះលោកគ្មានផ្លូវនឹងឈ្នះឡើយ។ ចំណែកប្រពន្ធលោកត្រាំក៏មិនចង់ឲ្យស្វាមីខ្លួនឯងក្លាយជាប្រធានាធិបតីដែរ។ តាមលោក Michael ប្រពន្ធលោកត្រាំបានស្រក់ទឹកភ្នែកនៅពេលឃើញស្វាមីជាប់ឆ្នោត តែជាទឹកភ្នែកខកចិត្ត ពោលមិនមែនជាទឹកភ្នែកត្រេកត្រអាលទេ។
ជាសរុប សៀវភៅ « Fire and Fury » បានសង្កត់ធ្ងន់លើសមត្ថភាពរបស់លោកត្រាំក្នុងការដឹកនាំប្រទេសមួយដែលជាមហាអំណាចទី១ ក្នុងលោក។ តាមលោក Michael ក្រុមទីប្រឹក្សារបស់លោកត្រាំមានយោបល់ និងបានយល់ដូចគ្នាថា លោកត្រាំគ្មានសមត្ថភាពសក្តិសមនឹងកាន់តំណែងជាប្រធានាធិបតីអាមេរិកឡើយ។
សៀវភៅ « Fire and Fury » អាចបំផុសឲ្យមានការតស៊ូមតិលើបុគ្គលិលលក្ខណៈប្រធានាធិបតីអាមេរិក
តាំងពីមុនសៀវភៅនេះចេញលក់ជាសាធារណៈ លោកដូណាល់ ត្រាំក៏ដូចជាក្រុមមេធាវីរបស់លោកតែងព្យាយាមគ្រប់យ៉ាងដើម្បីរារាំងការចេញលក់សៀវភៅនោះ។ តែទីបំផុតមិនអាចរាំរាំងបាន ហើយក្រុមមេធាវីរបស់លោកត្រាំបានប្រកាសពីគម្រោងដាក់ពាក្យប្តឹងលោក Michael។ មែនទែនទៅ អ្វីដែលមានសរសេរនៅក្នុងសៀវភៅនេះមិនមែនជារឿងថ្មីទេ គ្រាន់តែថា វាជាព័ត៌មានបញ្ជាក់បន្ថែមលើអ្វីដែលមានកន្លងមក។ ក្នុងចន្លោះឆ្នាំ ២០១៥ និង ២០១៦ លោកស្រីហ៊ីលឡារី គ្លីនតុនដែលជាបេក្ខជនប្រធានាធិបតីចាញ់ឆ្នោត និងក្រុមអ្នកប្រជាធិបតេយ្យធ្លាប់បានរិះគន់លើសមត្ថភាពរបស់លោកដូណាល់ ត្រាំ។
ថ្មីៗកន្លងទៅនេះ សូម្បីតែលោក John McCain ដែលជាសមាជិកព្រឹទ្ធសភាមកពីគណបក្សសាធារណរដ្ឋដូចលោកដូណាល់ ត្រាំក៏មានភាពមន្ទិលសង្ស័យលើសមត្ថភាពរបស់លោកត្រាំដែរ។ ចំណែកប្រធានគណៈកម្មការទទួលបន្ទុកកិច្ចការបរទេសនៅព្រឹទ្ធសភាហ៊ានតែប្រដូចសេតវិមានដែលលោកត្រាំកំពុងកាន់កាប់បច្ចុប្បន្នទៅនឹងកន្លែងមើលក្មេងដែលសុទ្ធជាមនុស្សធំ។ ដោយឡែក លោកប្រមុខការទូត Rex Tillerson ដែលធ្លាប់មើលស្រាលសមត្ថភាពរបស់លោកត្រាំកន្លងមកបែរជាបានគាំទ្រលោកត្រាំទៅវិញ និងថា លោកមិនដែលគិតថាលោកត្រាំមានបញ្ហាសរសៃប្រសាទ ហើយក៏គ្មានហើយផលណាមួយដែលលោកត្រូវគិតពីបញ្ហានេះដែរ។
យ៉ាងណាក៏ដោយ សៀវភៅ « Fire and Fury » របស់លោក Michael Wolff ពេលនេះកំពុងធ្វើឲ្យលោកដូណាល់ ត្រាំញាក់សាច់ខ្លាំង និងអាចបំផុសឲ្យមានការតស៊ូមតិមួយជុំវិញបុគ្គលិកលក្ខណៈរបស់ប្រធានាធិបតីអាមេរិក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ