អង្គការសហប្រជាជាតិបរិហារ ភាសា “ប្រកាន់ពូជសាសន៍” របស់លោកត្រាំ
សហរដ្ឋអាមេរិកនិងពិភពលោកទាំងមូលកំពុងនាំគ្នាបញ្ចេញប្រតិកម្មប្រឆាំងនឹងពាក្យសំដីបែបអសុរសរបស់លោកប្រធានាធិបតីអាមេរិក។ អ្នកនាំពាក្យរបស់ឧត្តមស្នងការសិទ្ធិមនុស្សនៃអង្គការសហប្រជាជាតិ បានបរិហារសំដី ដ៏អសុរសរបស់លោកដូណាល់ត្រាំ ស្តីពីការទទួលជនអន្តោប្រវេសន៍មកពីប្រទេសហៃទី និងអាហ្វ្រិក ថាជាពាក្យដែលប្រកបទៅដោយ “ការប្រកាន់ពូជសាសន៍ គួរខ្មាសអៀន និងរន្ធត់ណាស់”។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៤
បើតាមកាសែតវ៉ាស៊ីនតោនប៉ុស្តិ៍ ក្នុងជំនួបជាមួយក្រុមប្រឹក្សាព្រឹទ្ធសភា កាលពីថ្ងៃព្រហស្បតិ៍ ស្តីពីការរៀបចំច្បាប់ការពារយុវជនអន្តោប្រវេសន៍ លោក ដូណាល់ ត្រាំ បាន ប្រើពាក្យដ៏អសុរសបំផុត(Shithole) សំដៅហៅប្រទេស ដូចយ៉ាងហៃទី សាល់វាដរ និងបណ្តាប្រទេសនៅអាហ្វ្រិក។ សមាជិកព្រឹទ្ធសភាបក្សប្រជាធិបតេយ្យDick Durbin បានអះអាងថា លោកត្រាំបានប្រើពាក្យអសុរសនោះច្រើនដង។
“គ្មានពាក្យអ្វីអាចជំនួស ឱ្យលើសនឹងពាក្យថា ប្រកាន់ពូជសាសន៍ ទេ ! គេមិនអាចប្រៀបប្រទេស នៅលើលោក ឬទ្វីបមួយ ដោយម៉ៅទាំងមូល បានឡើយ ! ពិតជាគួរឱ្យអៀនខ្មាស និងស្លុតចិត្តណាស់” ! នេះជាប្រសាសន៍ហួសចិត្តរបស់អ្នកនាំពាក្យឧត្តមស្នងសិទ្ធិមនុស្សនៃអង្គការប្រជាជាតិ ទៅកាន់អ្នកសារព័ត៌មាន នៅទីក្រុងហ្សឺណែវ ថ្ងៃសុក្រទី ១២មករា ដោយបន្ថែមថា ភាសារបស់លោកត្រាំ អសុរស ហើយអាចចាត់ទុកបានថាជាការញុះញង់ឱ្យប្រកាន់ពូជសាសន៍បានទៀត។
ហៃទី ក្រុមប្រទេសនៅអាហ្វ្រិក មានអារម្មណ៍ប៉ះពាល់និងបានសម្តែងកំហឹងខ្លាំងជាងគេ ! ប្រទេសអាហ្វ្រិកខាងត្បូង យល់ថាជាភាសាជេរ ! សហភាពអាហ្វ្រិកបានបរិហារសំដីដ៏គួរឈឺចាប់និងរំខានរបស់លោកត្រាំថាមិនមែនប៉ះពាល់លើប្រជាពលរដ្ឋស្បែកខ្មៅនៅអាមេរិកទេ តែចំពោះពលរដ្ឋអាហ្វ្រិកទាំងមូលតែម្តង។ បណ្តាប្រទេសនៅទ្វីបអាហ្វ្រិកខ្លះទៀត បានកោះហៅឯកអគ្គរដ្ឋទូតអាមេរិកមកជួប ដើម្បីសម្តែងការមិនពេញចិត្តនឹងសំដីបែប “ប្រកាន់ពូជសាសន៍” របស់លោកត្រាំ។
ប៉ុន្តែដូចជារៀងរាល់លើក លោកដូណាល់ ត្រាំ បានបង្ហោះសារ Tweet តាំងពីព្រហាមបដិសេធ ថាពាក្យដែលលោកប្រើនៅក្នុងពេលប្រជុំនោះ ធ្ងន់បន្តិចមែន ប៉ុន្តែមិនមែនដូចអ្នកសារព័ត៌មានរាយការណ៍ឡើយ។ សេតវិមាន មិនតវ៉ា ហើយក៏មិនច្រានចោលដែរ ជុំវិញរឿងអាស្រូវនេះ។ អ្នកនាំពាក្យបានត្រឹមឆ្លើយថា អ្នកនយោបាយអាមេរិកខ្លះ ប្រឹងដើម្បីបរទេស តែលោកត្រាំប្រឹងដើម្បីអាមេរិក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ