អាមេរិកនឹងអាចពង្រឹងសព្វាវុធនុយក្លេអ៊ែរ ដើម្បីទុកការពារខ្លួន
រដ្ឋបាលលោកដូណាល់ ត្រាំ នឹងអាចសម្រេចផលិតអាវុធនុយក្លេអ៊ែរថ្មី។ តាមសេចក្តីព្រាងឯកសារសម្ងាត់ របស់ក្រសួងការពារជាតិអាមេរិក ដែលកាសែតHuffington Postទទួលបាន និងចុះផ្សាយ នៅថ្ងៃព្រហស្បតិ៍ទី១១មករា រដ្ឋាភិបាលអាមេរិកនឹងអាចបើកផ្លូវ ឲ្យប្រើគ្រាប់បែកនុយក្លេអ៊ែរ ដើម្បីវាយបកវិញ នៅក្នុងករណី ដែលអាមេរិករងការវាយប្រហារពីខាងក្រៅ។
ចុះផ្សាយនៅថ្ងៃ៖
ស្តាប់ - ០២:១៣
តាមឯកសារសម្ងាត់ដែលបែកលេចធ្លាយ ទៅដល់ដៃអ្នកកាសែតរបស់ Huffington Post រដ្ឋបាលលោកដូណាល់ ត្រាំ នឹងអាចបន្តអភិវឌ្ឍ ផលិតគ្រាប់បែកនុយក្លេអ៊ែរថ្មី។ ឯកសារសម្ងាត់របស់ក្រសួងការពារជាតិអាមេរិក ដែលមានឈ្មោះថា ការពិនិត្យទៅលើនយោបាយនុយក្លេអ៊ែរ ឆ្នាំ ២០១៨ បានបង្ហាញថា អាមេរិកនឹងអាចប្រើសព្វាវុធនុយក្លេអ៊ែរសម្រាប់វាយបកវិញ នោះបើទោះបីជាការវាយប្រហារមកលើអាមេរិក មិនមែនជាការវាយប្រហារ ដោយប្រើគ្រាប់បែកនុយក្លេអ៊ែរក្តី។
មន្ទីរបញ្ចកោន បានបដិសេធមិនធ្វើអត្ថាធិប្បាយអ្វីទាំងអស់ ក្នុងហេតុផលថា ឯកសារនៅជាសេចក្តីព្រាង និងនៅមិនទាន់បានទទួលបោះត្រាយល់ព្រម ពីប្រធានាធិបតីនៅឡើយ។ ប្រភពស្និទ្ធនឹងសំណុំរឿងនេះបានប្រាប់ទីភ្នាក់ងារព័ត៌មានReuters ថា ក្រសួងការពារជាតិបានចងក្រង សរសេរ ការសិក្សាលើនយោបាយនុយក្លេអ៊ែរ ប៉ុន្តែ គេមិនច្បាស់ថា វានឹងត្រូវបញ្ជូន ទៅឲ្យប្រធានាធិបតីដូណាល់ ត្រាំ សម្រេចអនុម័តនោះទេ។
ការពិនិត្យទៅលើនយោបាយនុយក្លេអ៊ែរ អាមេរិកធ្លាប់ធ្វើម្តង ហើយ ឆ្នាំ ២០១០ នៅក្នុងអាណត្តិរបស់លោកប្រធានាធិបតីអូបាម៉ា។ នៅក្នុងឯកសារឆ្នាំ ២០១០ លោកអូបាម៉ាធ្លាប់បានបង្ហាញពីបំណង កាត់បន្ថយតួនាទីរបស់អាវុធនុយក្លេអ៊ែរ។ លោកអូបាម៉ាធ្លាប់បានលើកឡើងពីពិភពលោកមួយ ដែលអាវុធនុយក្លេអ៊ែរ មិនដើរតួនាទីសំខាន់។ ប៉ុន្តែ នៅក្នុងឯកសារឆ្នាំ ២០១៨ មន្ទីរបញ្ចកោនបានលើកឡើងថា សម្មតិកម្មរបស់លោកបារ៉ាក់ អូបាម៉ា គឺជាសម្មតិកម្មខុសទាំងស្រុង។ ពិភពលោកកាន់តែគ្រោះថ្នាក់។ នេះបើតាមសេចក្តីព្រាងរបស់មន្ទីរបញ្ចកោន។
សូមអាន៖ លោកដូណាល់ ត្រាំចង់ឲ្យសព្វាវុធនុយក្លេអ៊ែរអាមេរិក នាំមុខគេ
នៅក្នុងសេចក្តីព្រាងដដែល គេបានសរសេរទាមទារឲ្យអាមេរិក ធ្វើទំនើបកម្មសព្វាវុធនុយក្លេអ៊ែររបស់ខ្លួន ព្រោះថា រុស្ស៊ី និងចិន កំពុងដុះខាត់ខ្លាំងណាស់អាវុធនុយក្លេអ៊ែរ។ អាវុធនុយក្លេអ៊ែរ ដែលគេចាត់ទុកជាមធ្យោបាយសម្រាប់ទប់ស្កាត់កុំឲ្យមានសង្រ្គាមនុយក្លេអ៊ែរ។ ទៅតាមគណនាគន់គូររបស់ទីភ្នាក់ងារសហព័ន្ធអាមេរិក ការធ្វើទំនើបកម្មសព្វាវុធនុយក្លេអ៊ែររបស់អាមេរិក នៅក្នុងរយៈពេល ៣០ឆ្នាំ ទៅ មុខ នឹងធ្វើឲ្យអាមេរិកចំណាយថវិកា ប្រមាណ ៩៨៣ពាន់លានអឺរ៉ូ។
លោកដូណាល់ ត្រាំ ប្រធានាធិបតីថ្មីរបស់អាមេរិក ធ្លាប់បានវាយតម្លៃថា អាមេរិកមានការយឺតយ៉ាវ ក្នុងការអភិវឌ្ឍសមត្ថភាពអាវុធនុយក្លេអ៊ែររបស់ខ្លួន។ លោកដូណាល់ត្រាំ បាននិយាយថា លោកចង់ឲ្យអាមេរិកនាំមុខគេ ក្នុងចំណោមប្រទេសមហាអំណាចនុយក្លេអ៊ែរ។ ដើម្បី នាំមុខគេ អាមេរិក ត្រូវតែដុសខាត់វិស័យសព្វាវុធនុយក្លែអ៊ែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ