អាមេរិក៖លោកដូណាល់ ត្រាំយល់ព្រមផ្តល់សញ្ជាតិឲ្យជនអន្តោប្រវេសន៍ខុសច្បាប់ចំនួន ១,៨លាននាក់ តែមានលក្ខខណ្ឌ
នៅសហរដ្ឋអាមេរិក លោកប្រធានាធិបតីអាមេរិកដូណាល់ ត្រាំស្នើទៅសភានាថ្ងៃសុក្រ ទី២៦ មករានូវគម្រោងច្បាប់ថ្មីមួយស្តីពីអន្តោប្រវេសន៍។ នៅក្នុងគម្រោងច្បាប់ថ្មីនេះ លោកត្រាំបានយល់ព្រមផ្តល់សញ្ជាតិឲ្យជនអន្តោប្រវេសន៍ចំនួន ១លាន ៨សែននាក់ដែលបានចូលក្នុងទឹកដីអាមេរិកដោយខុសច្បាប់។ តែជាថ្នូរត្រឡប់វិញ លោកត្រាំចង់ឲ្យសភាអនុម័តលើកញ្ចប់ថវិកាចំនួន ២៥ ០០០លានដុល្លារសម្រាប់សង់ជញ្ជាំងនៅតាមបណ្តោយព្រំដែនជាមួយប្រទេសម៉ិចស៊ិក។
ចុះផ្សាយនៅថ្ងៃ៖
ស្តាប់ - ០១:៥៩
រហូតមកដល់ពេលនេះ ភាពប្រទាញប្រទង់គ្នារវាងក្រុមអ្នកសាធារណរដ្ឋរបស់លោកដូណាល់ ត្រាំ និងក្រុមអ្នកប្រជាធិបតេយ្យបានផ្តោតលើចំណុចសំខាន់ពីរ ទី១ ថវិកាសម្រាប់សង់ជញ្ជាំងនៅតាមបណ្តោយព្រំដែនជាមួយប្រទេសម៉ិចស៊ិក និងទី២ ផ្តល់សិទ្ធិជ្រកកោណស្របច្បាប់ឲ្យដល់ពួក Dreamers ទាំងជិត ៧០០ ០០០នាក់នៅសហរដ្ឋអាមេរិក។ គឺចំណុចខ្វែងគំនិតទាំងពីរនេះហើយដែលបានធ្វើឲ្យអាមេរិកជួបប្រទះវិបត្តិថវិកា Shutdown នាពេលថ្មីៗកន្លងទៅ។
គួររម្លឹកជូនថា ពួក Dreamers ទាំងជិត ៧០០ ០០០នាក់ដែលភាគច្រើនជាជនជាតិម៉ិចស៊ិកបានចូលក្នុងទឹកដីអាមេរិកតាំងពីនៅវ័យក្មេង។ នៅក្នុងជំនាន់លោកប្រធានាធិបតីអូបាម៉ា លោកបានបង្កើតកម្មវិធីមួយឈ្មោះ DACA ដោយអនុញ្ញាតឲ្យពួក Dreamers នេះទទួលបានការរៀនសូត្រ និងធ្វើការងារ។ តែកម្មវិធី DACA នេះត្រូវបានលោកត្រាំលប់ចោល និងប្រគល់ឲ្យសភាដោះស្រាយដោយទុកពេលដល់ខែមីនាខាងមុខ។ បើពុំនោះសោតទេ ពួក Dreamers ទាំងអស់នឹងត្រូវចាប់បញ្ជូនទៅស្រុកកំណើតរបស់គេវិញ។
ឥឡូវនេះ លោកត្រាំបានយល់ព្រមឲ្យមានការផ្តល់សញ្ជាតិអាមេរិកដល់ជនអន្តោប្រវេសន៍ខុសច្បាប់រហូតដល់ទៅ ១លាន ៨សែននាក់ឯណោះ ពោល ២ដងច្រើនជាងការទាមទាររបស់ក្រុមអ្នកប្រជាធិបតេយ្យដែលសុំឲ្យដោះស្រាយតែលើពួក Dreamers ទាំងជិត ៧០០ ០០០នាក់ប៉ុណ្ណោះ។ តែលោកត្រាំបានព្រមានរួចហើយថា ការធ្វើសម្បទានត្រូវតែមានទៅ មានមក ពោលមិនមែនមានតែភាគីម្ខាងទេ។ នៅក្នុងន័យនេះ លោកត្រាំបានស្នើឲ្យសភាអនុម័តលើច្បាប់ថវិកាចំនួន ២៥ ០០០លានដុល្លារសម្រាប់ចំណាយលើការសាងសង់ជញ្ជាំងនៅតាមព្រំដែនជាមួយប្រទេសម៉ិចស៊ិកដើម្បីទប់ស្កាត់លំហូរជនអន្តោប្រវេសន៍ខុសច្បាប់។
គេនៅមិនទាន់ដឹងថា តើសំណើដោះដូររបស់លោកដូណាល់ ត្រាំពេលនេះនឹងធ្វើឲ្យក្រុមអ្នកប្រជាធិបតេយ្យទទួលយកបាន ឬអត់ទេ។ អ្វីដែលគេដឹង កិច្ចចរចា និងការ តថ្លៃគ្នានៅបន្តមាន និងមិនមែនងាយស្រួលប៉ុន្មានឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ