ហេតុអ្វីបានជាលោកដូណាល់ ត្រាំ ដកលោកRex Tillerson ពីតំណែងរដ្ឋមន្រ្តីការបរទេស?
តាមរយៈសារTwitter ប្រធានាធិបតីអាមេរិក លោកដូណាល់ ត្រាំ នៅថ្ងៃអង្គារម្សិលមិញ បានប្រកាសដកលោក Rex Tillerson ចេញពីតំណែងរដ្ឋមន្រ្តីការបរទេស និងដាក់ជំនួសមកវិញ ដោយលោកMike Pompeo ប្រធានទីភ្នាក់ងារសម្ងាត់ CIA។ នៅក្នុងសារ Twitter លោកដូណាល់ ត្រាំនៅបានបន្ថែមថា លោកស្រី Gina Haspel អនុប្រធានរបស់CIA នឹងក្លាយជាមនុស្សស្រីអាមេរិកាំងទី១ដែលចូលកាន់តំណែង ជាប្រធានទីភ្នាក់ងារស៊ើបការណ៍សម្ងាត់អាមេរិក CIA។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៥២
លោកដូណាល់ ត្រាំ នៅថ្ងៃអង្គារម្សិលមិញ បានប្រើសារTwitter ដើម្បីប្រកាសថា លោកបានដកលោករេច ធីល័រសុនពីមុខតំណែងរដ្ឋមន្រ្តីការបរទេសអាមេរិក។ នៅក្នុងសារTwitter លោកដូណាល់ ត្រាំ បានសរសេរថា លោកMike Pompeo ប្រធានទីភ្នាក់ងារស៊ើបការណ៍សម្ងាត់ CIA នឹងចូលមកជំនួសលោកRex Tillerson ក្នុងពេលលោកស្រី Gina Haspel ដែលបច្ចុប្បន្នជាអនុប្រធានរបស់CIA នឹងក្លាយជាប្រធានស្ថាប័នស៊ើបការណ៍សម្ងាត់អាមេរិក។ “លោកMike Pompeo នឹងក្លាយជាប្រមុខការបរទេសថ្មីរបស់អាមេរិក។ គាត់នឹងធ្វើការដ៏ល្អអស្ចារ្យ” នេះជាសារTwitter របស់លោកដូណាល់ ត្រាំ។
សូមអាន៖ស្តេចប្រេងជាមិត្តរបស់ពូទីនលោក Rex Tillerson ក្លាយជារដ្ឋមន្ត្រីការបរទេសអាមេរិក
មន្រ្តីជាន់ខ្ពស់របស់ក្រសួងការបរទេសអាមេរិក លោក Steve Goldstein បាននិយាយថា លោករេច ធីល័រសុន (Rex Tillerson )ដែលទើបត្រលប់មកពីធ្វើទស្សនកិច្ចនៅអាហ្វ្រិក មិនបាននិយាយជាមួយលោកដូណាល់ ត្រាំ ទេ នៅថ្ងៃអង្គារ និងមិនបានដឹងពីមូលហេតុដែលលោកត្រូវ លោកដូណាល់ ត្រាំ ដកចេញពីមុខតំណែងនោះទេ។
នៅមុនឡើងយន្តហោះទៅរដ្ឋកាលីហ្វ័នី នៅថ្ងៃអង្គារ លោកដូណាល់ ត្រាំ បាននិយាយប្រាប់អ្នកកាសែត ថា លោកហើយ និងលោកធ័រល័សុន មិនយល់ស្របគ្នាលើសំណុំរឿងច្រើនយ៉ាង តាំងពីរឿងកូរ៉េខាងជើង ការលូកដៃ របស់រុស្ស៊ី ក្នុងការបោះឆ្នោតអាមេរិក ហើយនិងជាពិសេស សំណុំរឿងនុយក្លេអ៊ែរអ៊ីរ៉ង់។ “នៅពេលខ្ញុំថា កិច្ចព្រមព្រៀងនុយក្លេអ៊ែរអាក្រក់ លោកធីល័រសុនវិញនិយាយ ថា វាអត់អីផង។” នេះជាប្រសាសន៍របស់លោកដូណាល់ត្រាំ ដែលបានសរសេរផងដែរ ថ្លែងអំណរគុណលោកធីល័រសុន សម្រាប់ការងាររបស់លោកកន្លងមក។
សូមអាន៖Rex Tillerson មកអឺរ៉ុប និយាយរឿងកូរ៉េខាងជើង និងលួងកុំឲ្យអឺរ៉ុបខឹងលោកដូណាល់ ត្រាំ
លោករេច ធីល័រសុន មហាសេដ្ឋីប្រេង ត្រូវបានលោកដូណាល់ ត្រាំ ជ្រើសរើស ជាប្រមុខការបរទេសអាមេរិក តាំងពីដើមអាណត្តិ។ ប៉ុន្តែ បន្តិចម្តងៗ លោកដូណាល់ ត្រាំ បានដកទំនុកចិត្ត ពីរដ្ឋមន្រ្តីការបរទេស ដែលមានជំហរ និងគំនិត មិនដូចនឹងលោក។ ព័ត៌មានដកលោករេច ធីល័រសុន និងដាក់ជំនួសដោយប្រធានទីភ្នាក់ងារCIA ធ្លាប់ត្រូវបានកាសែត New York Times ចុះផ្សាយម្តងហើយ នៅខែវិច្ឆិកា។ ប៉ុន្តែ កាលណោះ លោកដូណាល់ ត្រាំ បានបដិសេធ និងចាត់ទុកថា ជាការចុះផ្សាយព័ត៌មានមិនពិត។
មន្រ្តីជាន់ខ្ពស់អាមេរិក ដែលសុំមិនបញ្ចេញឈ្មោះបាននិយាយថា លោកដូណាល់ ត្រាំ ចង់រុះរើក្រុមការងាររបស់លោក ដើម្បីត្រៀមរៀបចំជំនួបកំពូលជាមួយ កូរ៉េខាងជើង។ លោកMike Pompeo ប្រធានស៊ើបការណ៍សម្ងាត់ CIA ដែលលោកដូណាល់ ត្រាំ ជ្រើសរើសឲ្យធ្វើជាប្រមុខការបរទេសអាមេរិក ជំនួស លោករេច ធីល័រសុន ធ្លាប់ទទួលបានការសិក្សានៅសាលានាយទាហានជាន់ខ្ពស់ West Point និងជាសមាជិកសភាអ្នកតំណាងរាស្រ្ត រហូតដល់ឆ្នាំ ២០១៧។ លោកត្រូវបានគេមើលឃើញជាមនុស្សស្និទ្ធ និងមានជំហរដូចគ្នាច្រើននឹងលោកដូណាល់ ត្រាំ មិនថា រឿងរុស្ស៊ី អ៊ីរ៉ង់។ លោក Pompeoលោកធ្លាប់បានទាមទារឲ្យមានការចរចាឡើងវិញលើកិច្ចព្រមព្រៀងនុយក្លេអ៊ែរអ៊ីរ៉ង់ និងធ្លាប់បានទាមទារឲ្យមានដំឡើងឡើងវិញ បណ្តាញ ប្រព័ន្ធ តាមដាន លួចស្តាប់ ខ្សែទូរស័ព្ទ របស់ថ្នាក់ដឹកនាំបរទេស និងប្រជាជនអាមេរិកាំង។ ថ្មីៗនេះ ក្នុងនាមជាប្រធានCIA លោកបាននិយាយថា វត្តមានរបស់ប្រធានចារកិច្ចរុស្ស៊ី នៅទីស្នាក់ការរបស់CIA កាលពីខែមករាដើមឆ្នាំនេះ គឺជារឿងធម្មតា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ