ក្រោយការដកតំណែងលោក Rex Tillerson លោកដូណាល់ ត្រាំអាចបន្តឹងនយោបាយការទេសរបស់អាមេរិក
ចុះផ្សាយនៅថ្ងៃ៖
ស្តាប់ - ០៧:៤៣
នៅសហរដ្ឋអាមេរិកក៏ដូចជានៅក្នុងពិភពលោក ព្រឹតិ្តការណ៍ដែលបន្តភ្ញាក់ផ្អើល និងបន្តជាបច្ចុប្បន្នភាពនាថ្ងៃពុធ ទី១៤ មីនានេះ គឺការដែលលោកដូណាល់ ត្រាំបានដកលោក Rex Tillerson ពីតំណែងរដ្ឋមន្រ្តីការបរទេសនាថ្ងៃអង្គារ ទី១៣ មីនា។ តំណែងដ៏សំខាន់មួយនេះក៏ត្រូវបានលោកត្រាំជំនួសដោយលោក Mike Pompeo ដែលជានាយកស្ថាប័នស៊ើបការណ៍សម្ងាត់ CIA ហើយតំណែងនាយក CIA ក៏ត្រូវបានលោកត្រាំដាក់ជំនួសភ្លាមៗដោយលោកស្រី Gina Haspel ដែលជានាយករង CIA។ តែតំណែងរបស់លោក Mike Pompeo ក៏ដូចជាលោកស្រី Gina Haspel នឹងត្រូវទទួលការយល់ព្រមពីព្រឹទ្ធសភានាពេលខាងមុខ។
សេចក្តីសម្រេចរបស់លោកដូណាល់ ត្រាំជាសេចក្តីសម្រេចដែលលោក Rex Tillerson បានរង់ចាំផង និងភ្ញាក់ផ្អើល។ រង់ចាំព្រោះអស់រយៈពេលជាច្រើនខែកន្លងមកហើយដែលតំណែងរដ្ឋមន្រ្តីការបរទេសរបស់លោក Rex Tillerson បានរង្គោះរង្គើដោយសារតែភាពមិនចុះសម្រុងគ្នាលើសំណុំរឿងជាច្រើនដែលលោកមានជាមួយលោកដូណាល់ ត្រាំ។ ភ្ញាក់ផ្អើលព្រោះលោកត្រាំមិនប្រាប់ផ្ទាល់ ឬទូរស័ព្ទប្រាប់លោក Tillerson ទេ តែបែរជាសរសេរក្នុង Twitter ក្នុងពេលដែលលោក Tillerson កំពុងបំពេញទស្សនកិច្ចមួយជុំទ្វីបអាហ្រ្វិក។
ក្រោយពីដឹងដំណឹងនេះភ្លាម លោក Tillerson បានត្រឡប់ចូលអាមេរិក និងធ្វើដំណើរទៅក្រសួងដើម្បីថ្លែងអំណរគុណដល់បុគ្គលិកទាំងអស់ដែលបានធ្វើកិច្ចការយ៉ាងសកម្មនាពេលកន្លងមក។ ក្រៅពីអរគុណដល់មន្រ្តីក្រោមឳវាទរបស់ខ្លួន លោក Tillerson ក៏បានអរគុណដល់លោករដ្ឋមន្រ្តីការពារជាតិ James Mattis និងមេបញ្ជាការកងទ័ពលោក Joe Dunford ដែលបានរួមសហការណ៍ជាមួយលោកនាពេលកន្លងមក។ ក៏ប៉ុន្តែ គ្មានពាក្យមួយមាត់ណាសម្រាប់លោកដូណាល់ ត្រាំទេ ពោលខុសពីលោកត្រាំដែលបានអរគុណលោក។ កំណត់សម្គាល់មួយទៀត លោកត្រាំក៏បានដកតំណែងទីប្រឹក្សាម្នាក់របស់លោក Tillerson ដែលបានបញ្ចេញប្រតិកម្មជាសាធារណៈថា លោកត្រាំមិនបានផ្តល់ហេតុផលពីការបញ្ចប់តំណែងលោក Tillerson ទេ។
ឃើញថា លោកត្រាំមិនត្រឹមកំចាត់លោក Tillerson ប៉ុណ្ណោះទេ សូម្បីតែមនុស្សជំនិត អ្នកស្មោះស្ម័គ្រ អ្នកសហការណ៍ ឬអ្នកមានទំនោររកលោក Tillerson ក៏អាចស្ថិតក្នុងសំណាញ់របស់លោកត្រាំដែរ ពិសេសក្រុមមនុស្សដែលមិនចុះសម្រុងនឹងលោក។ មានការលើកឡើងថា អ្នកដែលត្រូវលោកត្រាំកំចាត់នាពេលខាងមុខ អាចជារដ្ឋមន្រ្តីការពារជាតិ ឬរដ្ឋមន្រ្តីក្រសួងយុត្តិធម៌។ បើមិនត្រូវលោកត្រាំដកទេ អ្នកដែលមានខ្លួនក៏អាចនឹងបង្ខំចិត្តដើរចេញដោយខ្លួនឯងដែរ ដូចដែលធ្លាប់មានជារឿយៗនាពេលកន្លងមក។
លោក Pompeo ជាមនុស្សចូលចិត្តប្រើធម៌ក្តៅ
មានអាយុ ៥៣ឆ្នាំ លោក Pompeo ជាអតីតទាហាន មេធាវី និងជាអ្នកជំនួញ។ លោកទើបចូលប្រឡូកក្នុងឆាកនយោបាយបាន ១០ឆ្នាំដោយបានជាប់ឆ្នោតជាអ្នកតំណាងរាស្រ្តរបស់គណបក្សសាធារណរដ្ឋក្នុងរដ្ឋ Kansas ពីឆ្នាំ ២០១១ ដល់ឆ្នាំ ២០១៧។ លោក Pompeo បានលាឈប់ពីតំណាងរាស្រ្តតាមសំណើរបស់លោកដូណាល់ ត្រាំ រួចក៏ត្រូវបានលោកត្រាំតែងតាំងជានាយក CIA។ ជារៀងរាល់ថ្ងៃ លោក Pompeo បានចូលការិយាល័យលោកត្រាំដើម្បីរាយការណ៍ពីបញ្ហាសន្តិសុខជាតិក៏ដូចជាបញ្ហាអន្តរជាតិមួយចំនួនដែលលោក និងលោកត្រាំមានជំហរដូចគ្នា។
គឺជំហរដូចគ្នា និងមិនសូវត មាត់របស់លោក Pompeo ដែលបានធ្វើលោកត្រាំយកលោកទៅជំនួសកន្លែងលោក Rex Tillerson ដែលតែងតែចេញមុខប្រឆាំងលោកត្រាំជាសាធារណៈ។ សំណុំរឿងអន្តរជាតិដែលលោកត្រាំ និងលោក Tillerson យល់មិនដូចគ្នារួមមាន កិច្ចព្រមព្រៀងនុយក្លេអ៊ែរអ៊ីរ៉ង់ កម្មវិធីនុយក្លេអ៊ែរកូរ៉េខាងជើង កិច្ចព្រមព្រៀងក្រុងប៉ារីសស្តីពីអាកាសធាតុដែលលោកត្រាំបានដកខ្លួនចេញ ឬមួយក៏សង្រ្គាមពាណិជ្ជកម្មដែលលោកត្រាំកំពុងធ្វើជាមួយប្រទេសមួយចំនួនដោយយកពន្ធលើទំនិញនាំចូលអាមេរិកជាដើម។
និយាយពីបុគ្គលិកលក្ខណៈរវាងលោក Rex Tillerson និងលោក Mike Pompeo គឺផ្ទុយគ្នា។ លោក Tillerson ជាមនុស្សចូលចិត្តប្រើធម៌ត្រជាក់ដោយប្រកាន់យកកិច្ចចរចាជាអាទិភាពនៅក្នុងដំណោះស្រាយ។ ចំណែកលោក Mike Pompeo ជាមនុស្សចូលចិត្តប្រើកម្លាំងបាយដោយមិនចាំបាច់និយាយអង្វរច្រើន។
កិច្ចព្រមព្រៀងនុយក្លេអ៊ែរអ៊ីរ៉ង់អាចប្រឈមនឹងគ្រោះថ្នាក់
មានសំណុំរឿងក្តៅចំនួនពីរនៅចំពោះមុខ ទី១ កិច្ចព្រមព្រៀងនុយក្លេអ៊ែរអ៊ីរ៉ង់ និងទី២ កម្មវិធីនុយក្លេអ៊ែរកូរ៉េខាងជើង។ ទាក់ទងនឹងកម្មវិធីនុយក្លេអ៊ែរកូរ៉េខាងជើង គេត្រូវរង់ចាំមើលថា តើអ្វីទៅជាលទ្ធផលនៃគម្រោងជំនួបរវាងលោកដូណាល់ ត្រាំ និងមនុស្សខ្លាំងកូរ៉េខាងជើងលោកគីម ជុងអ៊ុននាដំណាច់ខែឧសភាខាងមុខ។ ប្រសិនបើអ្វីៗដំណើរការដូចដែលក្រុងវ៉ាស៊ីនតោន និងក្រុងព្យុងយ៉ាងចង់បាន ឬក៏ហោចណាស់មិនទាស់សម្តីគ្នាទេ នោះភាពប្រឈមមុខដាក់គ្នារវាងលោកត្រាំ និងលោកគីម ជុងអ៊ុនអាចនឹងធ្លាក់ចុះច្រើន។ ផ្ទុយទៅវិញ ភាពប្រទូស្រ្តាយ និងសង្រ្គាមពាក្យសម្តីរវាងជើងខ្លាំងទាំងពីរអាចនឹងផ្ទុះជាថ្មី ហើយពេលនោះ លោក Mike Pompeo អាចនឹងចាក់លោកត្រាំឲ្យចាត់វិធានការចាស់ដៃលើលោកគីម ជុងអ៊ុន ពោលខុសពីលោក Rex Tillerson ដែលតែងទប់កំហឹងលោកត្រាំ។
ទាក់ទងនឹងកិច្ចព្រមព្រៀងនុយក្លេអ៊ែរអ៊ីរ៉ង់ លោកត្រាំ និងលោក Pompeo យល់ស្របគ្នាថា គេត្រូវតែពិនិត្យមើលឡើងវិញលើកិច្ចព្រមព្រៀងនោះ ពោលខុសពីលោក Tillerson ដែលថា ជាកិច្ចព្រមព្រៀងដែលអាចទទួលយកបាន។ តាមគម្រោងនៅថ្ងៃទី១២ ឧសភាខាងមុខ លោកត្រាំនឹងត្រូវប្រកាសដក ឬមិនដកអាមេរិកចេញពីកិច្ចព្រមព្រៀងនុយក្លេអ៊ែរអ៊ីរ៉ង់ដែលសហគមន៍អន្តរជាតិបានចុះហត្ថលេខាកាលពីពាក់កណ្តាលឆ្នាំ ២០១៥។ តែពីពេលនេះដល់ថ្ងៃទី១២ ឧសភា លោកត្រាំបានស្នើប្រទេសហត្ថលេខីទាំងអស់ ពិសេសអឺរ៉ុបឲ្យពិនិត្យសើរើមើលឡើងវិញលើកិច្ចព្រមព្រៀងនោះ។
លោកត្រាំមិនបានលំអិតពីចំណុចដែលគេត្រូវចរចាឡើងវិញទេ តែលោកយល់ថា កិច្ចព្រមព្រៀងនោះនៅមានលក្ខណៈធូរស្រាលខ្លាំង បើធៀបនឹងទង្វើជាក់ស្តែងរបស់អ៊ីរ៉ង់សព្វថ្ងៃ។ នៅត្រង់ចំណុចនេះទៀត លោក Mike Pompeo អាចនិយាយប្រាប់លោកត្រាំថា បើគ្មានកិច្ចព្រមព្រៀងថ្មីទេ អាមេរិកត្រូវតែដកខ្លួនចេញពីកិច្ចព្រមព្រៀងនោះភ្លាម។ ដូច្នេះគេអាចនិយាយបានថា នយោបាយការបរទេសរបស់លោក Pompeo អាចតឹងតែង និងកាចជាងលោក Tillerson។ តែសួរថា តើលោកដូណាល់ ត្រាំពិតជាចង់បាននយោបាយការបរទេសរបៀបនេះនៅក្នុងកាលៈទេសៈសព្វថ្ងៃឬ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ