បាល់ទាត់ពិភពលោកឆ្នាំ២០២៦៖តើបេក្ខភាពអាមេរិកខាងជើងអាចប្រឈមនឹងឧបសគ្គដោយសារតែលោកដូណាល់ ត្រាំ?
ចុះផ្សាយនៅថ្ងៃ៖
ស្តាប់ - ០៤:២៥
ការទទួលបេក្ខភាពផ្លូវការសំរាប់ធ្វើជាម្ចាស់ផ្ទះរៀបចំការប្រកួតបាល់ទាត់ពិភពលោកឆ្នាំ២០២៦ បានបិទបញ្ចប់ហើយកាលពីថ្ងៃសុក្រ ទី១៦ ខែមិនា សបា្តហ៍មុន។ ជាសរុប សហព័ន្ធបាល់ទាត់អន្តរជាតិ ហៅកាត់ថា FIFA បានទទួលបេក្ខភាពចំនួនពីរ។ បេក្ខភាពទីមួយគឺ ប្រទេសម៉ារុក តំណាងឲ្យទ្វីបអាហ្វ្រិក។ បេក្ខភាពទីពីរ គឺការរៀបចំរួមគ្នារវាងកាណាដា សហរដ្ឋអាមេរិក និងម៉ិចសិក តំណាងឲ្យទ្វីបអាមេរិកខាងជើង ។ គេនឹងប្រកាសលទ្ធផលនៃការជ្រើសរើសបេក្ខភាព នាថ្ងៃទី១៣ ខែមិថុនាខាងមុខនេះ។ បរិបថនៃស្ថានភាពនយោបាយបច្ចុប្បន្នរបស់សហរដ្ឋអាមេរិក ជាពិសេសសេចក្តីប្រកាសដ៏ចម្រូបចម្រាសកន្លងមករបស់លោក ដូណាល់ ត្រាំ អាចនឹងធ្វើឲ្យបេក្ខភាពបីប្រទេសរួមគ្នាតំណាងឲ្យទ្វីបអាមេរិកខាងជើងជួបបរាជ័យ។
បើតាមព័ត៌មានចុះផ្សាយដោយស្ថានីយ៍ទូរទស្សន៍កីឡា ESPN កាលពីថ្ងៃពុធ ទី១៤ ខែមិនាកន្លងទៅនេះបានឲ្យដឹងថា ការបោះឆ្នោតគាំទ្របេក្ខភាពទ្វីបអាមេរិកខាងជើងអាចនឹងជួបបញ្ហា។ ប្រសិនបើបេក្ខភាពរួមគ្នាបីប្រទេស ដែលរួមមាន៖ កាណាដា សហរដ្ឋអាមេរិក និងម៉ិចសិក ទទួលបរាជ័យ នោះ គឺប្រហែលជាដោយសារតែនយោបាយបច្ចុប្បន្ន និងជាពិសេសសំដីប្រកាន់ពូជសាសន៍របស់លោកប្រធានាធិបតីអាមេរិក ដូណាល់ ត្រាំ។ កាលពីប៉ុន្មានសប្តាហ៍មុន លោក ដូណាល់ ត្រាំ បាននិយាយនៅក្នុងអង្គប្រជុំមួយនាសេតវិមាន ដោយបានចាត់ទុកប្រទេសហៃទី និងប្រទេសអាហ្វ្រិកមួយចំនួនជា«ប្រទេសលាមក»។
សំដីបែបនេះអាចនឹងធ្វើឲ្យមេដឹកនាំសហព័ន្ធបាល់ទាត់អន្តរជាតិ (FIFA) មិនសប្បាយចិត្តឡើយ។ ហើយសំដីបែបរើសអើងពូជសាសន៍នេះក៏អាចនឹងធ្វើឲ្យប្រទេសនៅទ្វីបអាហ្វ្រិកមិនគាំទ្របេក្ខភាពអាមេរិកខាងជើងឡើយ។ ម៉្យាងទៀត វិធានការណ៍រឹតបណ្តឹងព្រំដែនកន្លងមក និងជាពិសេសការហាមឃាត់មិនផ្តល់ទិដ្ឋាការឲ្យប្រជាជនមកពីប្រទេសកាន់សាសនាឥស្លាមមួយចំនួនចូលទឹកដីសហរដ្ឋអាមេរិកក៏អាចក្លាយជាឧបសគ្គដល់ការជ្រើសរើសយកបេក្ខភាពទ្វីបអាមេរិកខាងជើងក្នុងការធ្វើជាម្ចាស់ផ្ទះរៀបចំព្រឹត្តិការណ៍បាល់ទាត់ពិភពលោកឆ្នាំ២០២៦ ផងដែរ។
សូមបញ្ជាក់ថា លទ្ធផលនៃការជ្រើសរើសម្ចាស់ផ្ទះរៀបចំបាល់ទាត់ពិភពលោកឆ្នាំ២០២៦ នឹងត្រូវប្រកាសឡើងនាថ្ងៃទី១៣ ខែមិថុនាខាងមុខនេះនៅទីក្រុងម៉ូស្គូ។ ពោល គឺមួយថ្ងៃមុនការបើកឆាកប្រកួតបាល់ទាត់ពិភពលោកឆ្នាំ២០១៨ នៅប្រទេសរុស្សី។ សំរាប់ការរៀបចំប្រកួតបាល់ទាត់ពិភពលោកឆ្នាំ២០២៦ ការជ្រើសរើសប្រទេសម្ចាស់ផ្ទះ គឺត្រូវធ្វើតាមនិតិវិធីថ្មីតាមរយៈការបោះឆ្នោតពីសំណាក់ប្រធានសហព័ន្ធបាល់ទាត់តំណាងឲ្យប្រទេសនិមួយៗ។ សព្វថ្ងៃនេះ សហព័ន្ធបាល់ទាត់អន្តរជាតិ ហៅកាត់ FIFA មានប្រទេសសមាជិកចំនួន ២១១។ តាមរយៈនិតិវិធីថ្មីនេះ ដើម្បីអាចទទួលសិទ្ធិធ្វើជាម្ចាស់ផ្ទះរៀបចំព្រឹត្តិការណ៍ប្រកួតបាល់ទាត់ពិភពលោក គេត្រូវការគាំទ្រចំនួន ១០៤ សំលេងពីប្រទេសសមាជិក។
ដោយផ្អែកលើទិដ្ឋភាពនយោបាយបច្ចុប្បន្ន ជាពិសេសសំដីចម្រូងចម្រាសកន្លងមករបស់លោកប្រធានាធិបតី ដូណាល់ ត្រាំ ប្រទេសសមាជិក FIFA មួយចំនួនអាចនឹងរារែកបោះឆ្នោតគាំទ្របេក្ខភាពប្រទេសបីរួមគ្នាតំណាងឲ្យទ្វីបអាមេរិកខាងជើង។ ប្រទេសសមាជិកទាំងនោះអាចនឹងគាំទ្រភ្លូកទឹកភ្លូកដីបេក្ខភាពប្រទេសម៉ារ៉ុក តំណាងឲ្យទ្វីបអាហ្វ្រិក។ លោក Sunil Gulati អតីតៈប្រធានសហព័ន្ធបាល់ទាត់សហរដ្ឋអាមេរិក និងជាប្រធានក្រុមការងាររួមតំណាងឲ្យប្រទេសទាំងបីបានសំណូមពរឲ្យប្រទេសសមាជិកទាំងអស់បោះឆ្នោតដោយផ្អែកលើមូលដ្ឋានគុណភាព និងសមត្ថភាពនៃបេក្ខភាព ជាជាងផ្អែកលើហេតុផលនយោបាយដែលកំពុងតែកើតឡើងសព្វថ្ងៃ។ បើតាមតំណាងបេក្ខភាពបីប្រទេសរូបនេះបានឲ្យដឹងថា ការធ្វើម្ចាស់ផ្ទះរួមគ្នាចំនួនបីប្រទេស គឺជារឿងសាកសមបំផុត។
សាកសមក៏ព្រោះផ្ទះ សហព័ន្ធបាល់អន្តរជាតិនឹងបង្កើនចំនួនប្រទេសចូលរួម។ គួរដឹងផងដែរថា ចាប់ពីឆ្នាំ២០២៦ ចំនួនប្រទេសចូលរួមនឹងត្រូវបង្កើនពីចំនួន ៣២ ទៅដល់ ៤៨ ប្រទេស។ នេះជាលើកទីមួយហើយដែលនឹងមានប្រទេសចូលរួមដ៏ច្រើនបែបនេះ។ ចំណែកចំនួននៃការប្រកួតនឹងកើនឡើងដល់ចំនួន ៨០ ផ្ទុយពីចំនួន ៦៤ ប្រកួតដូចសព្វថ្ងៃនេះ។ សំរាប់បេក្ខភាពប្រទេសទ្វីបអាមេរិកខាងជើង (កាណាដា សហរដ្ឋអាមេរិក និងម៉ិចសិក) លោក Sunil Gulati បានអះអាងថា ការរៀបចំបីប្រទេសរួមគ្នាជាលក្ខណៈប្រវត្តិសាស្រ្តនេះនឹងបង្ហាញឲ្យឃើញពីសមត្ថភាពរៀបចំប្រកបដោយគុណភាពគោរពទៅតាមល័ក្ខខ័ណ្ឌទាមទារថ្មីរបស់ FIFA។ ហើយម៉្យាងទៀត ការរៀបចំបីប្រទេសរួមគ្នានេះនឹងអាចបញ្ជៀសហានិភ័យណាមួយ។ លើសពីនេះ ទ្វីបអាមេរិកខាងជើងមានហេដ្ឋារចនាសម្ព័ន្ធរួចជាស្រេចទៅហើយ។ កីឡាដ្ឋានបាល់ទាត់មានស្រាប់រួចទៅហើយ។
កីឡាដ្ឋាននិមួយៗមានបច្ចេកវិទ្យាទំនើប ហើយមានចំណុះអាចផ្ទុកមនុស្សបានជាមធ្យមចំនួន ៦៨ ០០០ ពាន់នាក់។ លោក Sunil Gulati ក៏បានបញ្ជាក់ផងដែរថា សក្តានុពលនេះនឹងធ្វើឲ្យ FIFA អាចទទួលបានប្រាក់ចំណូលជាង ២ ពាន់លានដុល្លារពីការលក់សំបុត្រចូលទស្សនា។ ដោយឡែក លោក Gianna Infantino ប្រធានសហព័ន្ធបាល់ទាត់អន្តរជាតិបានវិភាគថា ការបង្កើនចំនួនប្រទេសចូលរួមនឹងធ្វើឲ្យ FIFA រកប្រាក់ចំណូលបានបន្ថែមទៀតប្រមាណជាង ៧០០ លានដុល្លារ។ ចំណែកបេក្ខភាពប្រទេសម៉ារ៉ុកវិញ តាមពិតទៅ នេះមិនមែនជាលើកទីមួយដែលប្រទេសអាហ្វ្រិកមួយនេះបានស្រមៃធ្វើជាម្ចាស់ផ្ទះរៀបចំព្រឹត្តិការណ៍បាល់ទាត់ពិភពលោក។ ប្រទេសនេះបានបរាជ័យចំនួនបួនលើកមកហើយ ពោលកាលពីព្រឹត្តិការណ៍ឆ្នាំ១៩៩៤, ១៩៩៨, ២០០៦ និង២០១០។ សំរាប់លើកនេះ ម៉ារុកចង់តំណាងឲ្យទ្វីបអាហ្វ្រិកទាំងមូលតែម្តង។ ម៉ារ៉ុកស្រម័យចង់ក្លាយជាប្រទេសអាហ្វ្រិកទីពីរ ដែលបានសិទ្ធិធ្វើជាម្ចាស់ផ្ទះ។
សូមរំលឹកជូនថា កាលពីឆ្នាំ២០១០ ប្រទេសអាហ្វ្រិកខាងត្បូងជាប្រទេសតំបូងគេបំផុត ដែលបានរៀបចំមហាព្រឹត្តិការណ៍កីឡាមានមនុស្សតាមដានច្រើនជាងគេបំផុតលើពិភពលោក។ តាមពិតទៅ សហព័ន្ធបាល់ទាត់នៅតាមប្រទេសអឺរ៉ុបជាច្រើនមាននិន្នាការគាំទ្របេក្ខភាពប្រទេសម៉ារុក។ ម៉្យាងទៀត ម៉ារុកសង្ឃឹមទទួលបានការគាំទ្រពីសហព័ន្ធបាល់ទាត់នៅតាមប្រទេសនានាក្នុងទ្វីបអាហ្វ្រិក។ បើដូចនោះមែន ម៉ារ៉ុកនឹងមានសំលេងគាំទ្រក្នុងដៃចំនួន ៥៤ មកពីបណ្តាប្រទេសអាហ្វ្រិក។ លោក Noël Graët ប្រធានសហ័ពន្ធបាល់ទាត់បារាំងបានប្រកាសជាចំហរថា លោកនឹងបោះឆ្នោតគាំទ្រប្រទេសម៉ារុក។ ការសំរេចចិត្តជាមុនបែបនេះក៏ដោយសារតែហេតុផលប្រវត្តិសាស្រ្ត នយោបាយ និងសេដ្ឋកិច្ច ដែលប្រទេសបារាំងមានចំណងជាមួយប្រទេសម៉ារ៉ុក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ