មនុស្សគំរាមកំហែងការរស់នៅរបស់ខ្លួន ព្រោះទាញយកធនធានហួសហេតុពីផែនដី
ក្រុមអ្នកវិទ្យាសាស្ត្របានចេញផ្សាយលទ្ធផលស៊ើបអង្កេត បង្ហាញថា ការបន្តរុករកទាញប្រយោជន៍ហួសហេតុពីផែនដី ដែលជាស្នាដៃរបស់មនុស្សយើងសព្វថ្ងៃនេះ ជាការគំរាមធ្វើអោយប្រភេទសត្វនានាផុតពូជ។ ផលវិបាក គឺមនុស្សខ្លួនឯងដដែល ដែលកំពុងគំរាមការរស់នៅ ការចិញ្ចឹមជីវិតរបស់ខ្លួន ទៅអនាគត។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៧
ក្រុមអ្នកវិទ្យាសាស្ត្រក្រុមIPBES ជាអក្សរកាត់នៃក្រុមអន្តរដ្ឋាភិបាលស្រាវជ្រាវផ្នែកជីវៈចម្រុះ និងប្រព័ន្ធអេកូឡូហ្ស៊ី បានជួបជុំគ្នានៅប្រទេសកូឡុំប៊ី បង្ហាញលទ្ធផលការងារ គួរអោយព្រួយបារម្ភ។ យោងតាមការស្រាវជ្រាវរបស់ពួកគេ ជីវៈចម្រុះ ដែលជាភាពសំបូរបែបនៃគ្រប់ទំរង់ជីវិតក្នុងភពផែនដី កំពុងរងការបំផ្លិចបំផ្លាញពីមួយថ្ងៃទៅមួយថ្ងៃ នៅគ្រប់ទិសទីក្នុងពិភពលោក។ មនុស្សនៅតែបន្តទាញយកប្រភពធនធានពីផែនដីហួសហេតុ។
ផលវិបាកគឺថា ៣០ឆ្នាំខាងមុខ ធនធានត្រីនៅតំបន់អាស៊ី-ប៉ាស៊ីហ្វិក នឹងបាត់បង់។ ឆ្នាំ២០៥០ ផ្កាថ្មរហូត៩០ភាគរយអាចនឹងហិនហោច។ ប្រភេទសត្វស្លាប និងថនិកសត្វជាងពាក់កណ្តាល អាចនឹងត្រូវបាត់បង់ ពីទ្វីបអាហ្វ្រិក នៅឆ្នាំ២១០០ខាងមុខនេះ។ នេះជាលើកទី១ហើយដែលផែនដីប្រឈមនឹងការផុតពូជទ្រង់ទ្រាយធំនៃប្រភេទសត្វ គិតតាំងពីពេលសត្វឌីណូស ផុតពូជ៦៥លានឆ្នាំមុនមក។ ជាមធ្យម ២សតវត្សមកនេះ ប្រភេទសត្វឆ្អឹងកង ២ប្រភេទបានបាត់ផុតពូជ រៀងរាល់ឆ្នាំ។ រមាសស ឈ្មោះថា Sudan នៅប្រទេសកេនយ៉ា ក៏កំពុងជិតផុតពូជដែរហើយ។ រមាសស Sudan ឈ្មោលចុងក្រោយ បានស្លាប់ដោយការប្រមាញ់។ ពេលនេះ នៅសល់តែរមាសសញី២ក្បាលប៉ុណ្ណោះ។
បញ្ហាទាំងនេះ ជាស្នាដៃមនុស្សតែមនុស្សខ្លួនឯងកំពុងបំផ្លាញការរស់នៅ និងការចិញ្ចឹមជីវិតខ្លួនឯងក្នុងពេលអនាគត ពេលដែលធនធានធម្មជាតិទាំងអស់នេះហិនហោចអស់ ខណៈចំនួនមនុស្សនឹងកើនឡើង ពេលអនាគត។ ក្រុមអ្នកវិទ្យាសាស្ត្របានបរិហារពីការខ្ជះខ្ជាយម្ហូបអាហារ ដែលគិតទៅ មនុស្សយើងខ្ជះខ្ជាយរហូត៤០ភាគរយ នៃអាហារដែលផលិតបាន។ ដោយឡែក ក្រុមអ្នកវិទ្យាសាស្ត្រលើកឡើងថា មិនទាន់យឺតពេលទេ ដើម្បីស្តារស្ថានភាពឡើងវិញ។ ដំណោះស្រាយគឺ ត្រូវបង្កើតអោយមានតំបន់ការពារកាន់តែច្រើន ស្តារតំបន់ដែលដុនដាប និងអភិវឌ្ឍន៍កសិកម្មនឹងនរយូរអង្វែង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ