ចលនាប្រឆាំងតវ៉ានឹងការប្រើប្រាស់កាំភ្លើង នៅអាមេរិក កាន់តែរីករាលដាល
កាលពីថ្ងៃសៅរ៍ម្សិលមិញនេះ បាតុករអាមេរិករាប់រយពាន់នាក់ ដែលជាសិស្សានុសិស្ស និងអ្នកគាំទ្ររបស់ពួកគេ បានប្រមូលផ្តុំគ្នាយ៉ាងច្រើនកុះករ ជាប្រវត្តិសាស្ត្រ ដើម្បីធ្វើបាតុកម្ម ប្រឆាំងទៅនឹង ការវាយប្រហារដោយការបាញ់កាំភ្លើង ដែលកើតឡើងជាបន្តបន្ទាប់នៅអាមេរិក។ មិនតែប៉ុណ្ណោះ ចលនាតវ៉ានេះ នឹងរីករាលដាលទៅក្រៅប្រទេសទៀតផង។
ចុះផ្សាយនៅថ្ងៃ៖ កែប្រែថ្ងៃទី៖
ការធ្វើបាតុកម្ម នៅទូទាំងសហរដ្ឋអាមេរិក របស់យុវជនវ័យក្មេងរាប់ពាន់នាក់ កាលពីម្សិលមិញ មានបំណង បង្កើនការរឹតបន្តឹង លើការលក់ និងប្រើប្រាស់កាំភ្លើងនៅក្នុងប្រទេស។ ការបាញ់ប្រហារនៅអាមេរិក កើតឡើងម្តងហើយម្តងទៀត និងបានក្លាយជារឿងគួរឱ្យភ័យខ្លាចសម្រាប់ពលរដ្ឋអាមេរិក។
គេសង្កេតឃើញថា ការធ្វើបាតុកម្មនេះ ទទួលបានជោគជ័យជាខ្លាំង ដោយហេតុថា មានអ្នកចូលរួមជាច្រើនហួសពីការស្មាន។ ពិសេសជាងនេះទៅទៀតនោះ ចលនាតវ៉ានេះ នឹងរីកសាយភាយកាន់តែធំឡើងរហូតដល់ក្រៅ ប្រទេសដូចជា នៅអង់គ្លេស និង អូស្ត្រាលីជាដើម។
អ្នករៀបចំ ធ្វើចលនាប្រឆាំង ម្នាក់ បានឲ្យដឹងថា ក្រុមរបស់ពួកគេ គ្រោងនឹងធ្វើ បាតុកម្មជាង ៨០០ ទៀត នាពេលខាងមុខ ទាំងក្នុងសហរដ្ឋអាមេរិកនិងបណ្តាប្រទេសផ្សេងៗទៀត ដើម្បីជុំរុញឲ្យមានការគ្រប់គ្រងការ លក់ដូរអាវុធ ទ្វេឡើង និង មិនអាណាធិបតីដូចបច្ចុប្បន្ននេះ។
ចលនាតវ៉ាដ៏ធំ និង មិន ដែលធ្លាប់មានពីមុនមក នៅក្នុងប្រទេសមហាអំណាចមួយនេះ ក៏បានទទួលការគាំទ្រជាច្រើនផងដែរ ពីសំណាក់តារាចម្រៀង និង តារាភាពយន្តល្បីៗអាមេរិកដូចជានាង Demi Lovato និង នាង Ariana Grande ។ ក្នុងចំណោមតារាល្បីៗទាំងនោះ មានអ្នកខ្លះបរិច្ចាគថវិកា និង អ្នកខ្លះទៀតចូលរួមធ្វើបាតុកម្មដោយផ្ទាល់។
ទាក់ទិនរឿងនេះ លោក អតីតប្រធានាធិបតីអាមេរិក បារ៉ាក់ អូបាម៉ា បានសរសេរនៅលើបណ្តាញសង្គម Twitter ថា រូបលោក និងភរិយាពិតជាស្ងប់ស្ងែងណាស់ ចំពោះសិស្សានុសិស្សវ័យក្មេងទាំងអស់ ដែលបំផុលគំនិតធ្វើបាតុកម្មនេះឡើង។ លោកអូបាម៉ា បានបន្ថែមថា សម្លេងតវ៉ា របស់ពលរដ្ឋអាមេរិកដ៏ច្រើនបែបនេះ នឹងនាំមកវិញនូវការផ្លាស់ប្តូរជាវិជ្ជមានជាមិនខាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ