Donald Trump គំរាមដាក់ពង្រាយកងទ័ពនៅតាមព្រំដែនជាមួយម៉ិកស៊ិកដើម្បីរារាំងលំហូរអន្តោប្រវេស្តន៍
ដើម្បីប្រយុទ្ធកំចាត់ទល់នឹងបញ្ហាលំហូរអន្តោប្រវេស្តន៍ លោកប្រធានាធិបតីអាមេរិកDonald Trump បានថ្លែងនៅថ្ងៃអង្គារ៍ម្សិលមិញ ថាលោកមានបំណងដាក់ពង្រាយកងទ័ពនៅតាមបណ្តោយព្រំដែនជាមួយម៉ិចស៊ិកនៅក្នុងពេលរង់ចាំការសាងសង់ជញ្ជាំងព្រំដែន។ បញ្ហាព្រំដែនដែលលោក Trump បានវិនិច្ឆ័យថា ទាំងអាជ្ញាធរម៉ិចស៊ិកនិងទាំងប្រធានាធិបតីអាមេរិកមុនគឹលោក អូបាម៉ា មានភាពធូររលុង។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៧
ដើមហេតុដែលលោក Donald Trump បានធ្វើអត្ថាធិប្បាយអស់រយៈពេលជាច្រើនថ្ងៃមកហើយប្រឆាំងលំហូរក្រុមអន្តោប្រវេសន្ត៍មកក្នុងប្រទេសខ្លួននោះ គឺបណ្តាលមកពីរូបភាពជាច្រើននៃក្បួនអន្តោប្រវេស្តន៍មួយដែលមានគ្នាប្រមាណជា១ ៥០០នាក់។ ក្បួនអន្តោប្រវេស្តន៍នេះ ដែលដឹកនាំដោយអង្គការមិនមែនរដ្ឋាភិបាលមួយ បានចេញដំណើរពីអាមេរិកកណ្តាលតាមរថយន្តក្រុងនិងដោយថ្មើជើងដើម្បីបរិហារអំពើពុករលួយនៅក្នុងប្រទេសរបស់ខ្លួននិងដើម្បីសុំសិទ្ធជ្រកក្រោននៅសហរដ្ឋអាមេរិក។
លោក Donald Trump ក៏បានសុំអោយប្រទេសម៉ិចស៊ិក បញ្ឈប់ក្បួនអន្តោប្រវេស្តន៍នេះភ្លាមនិងបានគំរាមថានឹងអាមេរិកនឹងធ្វើការចរចាជាថ្មីឡើងវិញនៅលើសន្ធិសញ្ញាដោះដូរពាណិជ្ចកម្មដោយសេរីដែលហៅកាត់ថាAlena.។ លោក Trump ថែមទាំងនិយាយច្រំដែលៗនៅលើគោលបំណងរបស់លោកក្នុងការសាងសង់ជញ្ជាំងមួយនៅតាមបណ្តោយព្រំដែន ទោះបីជាលោកនៅពុំទាន់បានការយល់ព្រមពីសភានៅក្នុងការផ្តល់កញ្ចប់ថវិកាចំនួន ២សែនលានដុល្លារសម្រាប់ការសាងសង់ជញ្ជាំងព្រំដែននេះក្តី។។
ប្រធានាធិបតីអាមេរិកថែមទាំងបានអះអាងទៀតថា “នៅពេលដែលអាមេរិកមានជញ្ជាំងព្រំដែនមួយនោះ អាមេរិកនឹងធ្វើការការពារព្រំដែនរបស់ខ្លួនដោយកងទ័ពអាមេរិក។នោះហើយជាការបោះជំហានយ៉ាងវែងមួយរបស់អាមេរិក។ បន្ទាប់ពីសេចក្តីថ្លែងការណ៍នេះភ្លាម ឯកអគ្គរដ្ឋទូតម៉ិចស៊ិក បានសុំឲ្យសហរដ្ឋអាមេរិកបំភ្លឺពីបញ្ហាជញ្ជាំងព្រំដែននេះ។
គួររំលឹកថា ផ្ទុយពីការអះអាងរបស់លោកDonald Trump វត្តមានទាហានអាមេរិកនៅតាមព្រំដែនម៉ឹកស៊ិកពុំមែនមានជាលើកទីមួយនោះទេតែវាមានជាយូរយារមកហើយ។ គឺកងរក្សាជាតិ អង្គភាពបំរុងនៃកងទ័ពដែលធ្លាប់បានអន្តរាគមនៅតាមព្រំដែនខាងត្បូងនិងនៅក្រោមអាណត្តិរបស់ប្រធានាធិបតី អូបាម៉ាក្នុងឆ្នាំ២០១០និង២០០៦ក្រោមអាណត្តិរបស់លោក George Bush៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ