ស៊ីរីពង្រាយទ័ពត្រៀមអាសន្ន ប្រឈមនឹងការគំរាមវាយប្រហាររបស់លោកខាងលិច
ក្រោយពីបានឮប្រធានាធិបតីអាមេរិកនិងបារាំង ចង់បើកវាយប្រហារយោធា ដើម្បីឆ្លើយតបនឹងការប្រើអាវុធគីមីនៅ Douma នៃតំបន់ហ្គូតារបស់ស៊ីរី កងទ័ពរដ្ឋាភិបាលក្រុងដាម៉ាស បានរៀបជើងព្រួល និងពង្រាយទ័ពតាមទីតាំងសំខាន់ ក្នុងស្ថានភាពត្រៀមអាសន្នពីការឈ្លានពានពីបរទេស។ ក្រុងដាម៉ាសក៏បានអញ្ជើញអង្គការហាមឃាត់អាវុធគីមី OIAC ចុះទៅស៊ើបអង្កេតដោយផ្ទាល់ដល់ទីតាំងដែលរងការចោទប្រកាន់ថាមានប្រើអាវុធគីមី។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៤
រដ្ឋាភិបាលស៊ីរីបានអញ្ជើញជាផ្លូវការ អង្គការហាមឃាត់អាវុធគីមី ឱ្យចុះមកបំពេញទស្សនកិច្ចនិងធ្វើអង្កេតដល់កន្លែងកើតហេតុ Douma ក្នុងតំបន់ហ្គូតា ជាយក្រុងដាម៉ាសផ្ទាល់តែម្តង ក្រោមកិច្ចការពារសុវត្ថិភាពរបស់កងកម្លាំងរុស្ស៊ីនិងស៊ីរី។ នេះបើតាមប្រភពសារព័ត៌មានផ្លូវការស៊ីរី ដែលបញ្ជាក់ទៀតថា ក្រសួងការបរទេសស៊ីរីត្រៀមជានិច្ចនឹងសហការជាមួយអង្គការហាមឃាត់អាវុធគីមី ដើម្បីបញ្ជាក់រកការពិត។
សេចក្តីប្រកាសរបស់ស៊ីរីនេះ ធ្លាក់មកជួនចំពេលដែលក្រុមប្រឹក្សាសន្តិសុខអង្គការសហប្រជាជាតិកំពុងរៀបចំអនុម័តសេចក្តីសម្រេចស្នើឡើងដោយសហរដ្ឋអាមេរិកបង្កើតយន្តការអង្កេតអន្តរជាតិស្តីពីការប្រើប្រាស់អាវុធគីមីនៅស៊ីរី នៅយប់ថ្ងៃអង្គារនេះ។ ឯរុស្ស៊ីសម្ព័ន្ធមិត្តចាក់ទឹកមិនលិចរបស់ស៊ីរី ក៏បានស្នើគម្រោងសេចក្តីសម្រេចមួយដែរ ទាមទារឱ្យមានអង្កេតដែលចូលរួមដោយអង្គការហាមឃាត់អាវុធគីមីផង។ លោកអគ្គលេខាធិការអង្គការសហប្រជាជាតិវិញ បានទាមទារឱ្យមានអង្កេតត្រឹមត្រូវ និងគ្មានការរំខាន។
សូមបញ្ជាក់ថា របបក្រុងដាម៉ាស បានបដិសេធជានិច្ចថាពុំបានប្រើប្រាស់អាវុធគីមីសម្លាប់ជនស៊ីវិលប្រមាណ ជាង ៤០នាក់ កាលពីថ្ងៃសៅរ៍ ទី ៧ មេសា ដូចការចោទប្រកាន់របស់ក្រុមបស្ចឹមលោកទេ។ តែក្រុមលោកខាងលិចមិនជឿ ជាក់ស្តែង សហរដ្ឋអាមេរិក និងបារាំងវិញ បានសន្យាប្រើកម្លាំងយោធាវាយតបតស៊ីរី ប្រសិនបើរកឃើញភស្តុតាងថាស៊ីរីរំលោភច្បាប់អន្តរជាតិហ៊ានប្រើអាវុធគីមី ឬដោយគ្រាន់តែរង់ចាំមើលការអនុម័តសេចក្តីសម្រេចអង្គការសហប្រជាជាតិរួចសិនប៉ុណ្ណោះ។
ការគំរាមកំហែងប្រើកម្លាំងយោធារបស់លោកត្រាំ ហាក់មានទម្រង់កាន់តែច្បាស់ឡើងៗ ជាហេតុធ្វើឱ្យរបបស៊ីរីមិនអាចឈរនៅស្ងៀម។ បើតាមអង្គការអ្នកសង្កេតការណ៍សិទ្ធិមនុស្សនៅស៊ីរី យោធាស៊ីរីដាក់ពង្រាយកម្លាំងត្រៀមអាសន្នបន្ទាន់ នៅតាមទីតាំងសំខាន់ៗ ដូចជាអាកាសយានដ្ឋាន មូលដ្ឋានកងទ័ព នៅតាមខេត្តក្រុងធំៗ សម្រាប់រយៈពេលបីថ្ងៃ។ វិធានការបែបនេះ គេធ្លាប់ឃើញមានប្រើជាទូទៅតែក្នុងករណីមានការគំរាមកំហែងឈ្លានពានពីក្រៅ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ