លោកដូណាល់ ត្រាំ ចោទក្រុមប្រទេសផលិតប្រេង OPEC ថា ជាអ្នកបំប៉ោងតម្លៃប្រេងឆៅ
តម្លៃប្រេងឆៅ នៅសប្តាហ៍នេះ បានឡើងថ្លៃដល់៧០ដុល្លារ ក្នុងមួយបារីល បន្ទាប់ពីធ្លាក់ថ្លៃ ខ្លាំងបំផុត ដល់២៦ដុល្លារ កាលពីដើមឆ្នាំ២០១៦។ ប្រធានាធិបតី អាមេរិក លោកដូណាល់ ត្រាំ បានទម្លាក់កំហុសទៅលើក្រុមប្រទេស នាំចេញប្រេង OPEP ថា ជាអ្នកធ្វើឲ្យតម្លៃប្រេងឆៅឡើងថ្លៃ។ ក្រុមប្រទេសសមាជិក OPEP និងប្រទេសផលិតប្រេង ដែលមិនមែនជាសមាជិករបស់ OPEP បានជួបប្រជុំគ្នា នៅថ្ងៃសុក្រម្សិលមិញ នៅ ប្រទេសអារ៉ាប៊ី សាអូឌីត ដើម្បី និយាយពីកិច្ចព្រមព្រៀងកាត់បន្ថយការផលិតប្រេង ដែលត្រូវអស់ សុពលភាព នៅចុងឆ្នាំ ២០១៨នេះ។
ចុះផ្សាយនៅថ្ងៃ៖
នៅឆ្នាំ ២០១៦ ក្រុមប្រទេសនាំចេញប្រេង OPEP និងក្រុមប្រទេសផលិតប្រេង ដែល មិនមែនជាសមាជិករបស់ OPEPបានចុះកិច្ចព្រមព្រៀងលើការកាត់បន្ថយការផលិត ប្រេង ក្នុងគោលដៅ ស្តារឡើងវិញ តម្លៃប្រេងឆៅ ដែលបានធ្លាក់ចុះខ្លាំង រហូតដល់ ២៦ដុល្លារ ក្នុងមួយបារីល នៅដើមឆ្នាំ ២០១៦។ តាមកិច្ចព្រមព្រៀង ក្រុម ប្រទេសផលិត និងនាំចេញប្រេង បានយល់ព្រមកាត់បន្ថយ ការផលិតប្រេង ប្រមាណ ជិត ២លានបារីល ក្នុងមួយថ្ងៃ។
សូមអាន៖ប្រទេសសមាជិកអង្គការOpep សម្រេចបានកិច្ចព្រមព្រៀងកាត់បន្ថយការបូមប្រេង
នៅ២ឆ្នាំក្រោយ កិច្ចព្រមព្រៀង តម្លៃប្រេងឆៅ បានឡើងថ្លៃពី ក្រោម៣០ដុល្លារ ដល់៧៤ដុល្លារ ក្នុងមួយបារីល កាលពីថ្ងៃ ព្រហស្បតិ៍។ នៅថ្ងៃសុក្រម្សិលមិញ នៅក្នុងកិច្ចប្រជុំថ្នាក់រដ្ឋមន្រ្តីថាមពលរបស់ក្រុមប្រទេសសមាជិក OPEP និងប្រទេសផលិតប្រេង ដែលមិនមែនសមាជិក របស់ OPEP រដ្ឋមន្រ្តីថាមពលរបស់អារ៉ាប៊ី សាអូឌីត បានវាយតម្លៃថា ទីផ្សារអន្តរជាតិមានសមត្ថភាពទិញប្រេងក្នុងតម្លៃខ្ពស់។
ការលើកឡើងរបស់រដ្ឋមន្រ្តីអារ៉ាប៊ី សាអូឌីតបានទាក់ទាញ ភ្លាម សាររិះគន់របស់ប្រធានាធិបតីអាមេរិក ដែលបានចោទក្រុមប្រទេស សមាជិក OPEP ថា ជាអ្នកបំប៉ោងតម្លៃប្រេងឆៅ។ នៅក្នុងសារTwitter លោកដូណាល់ ត្រាំ នៅបានចោទក្រុមប្រទេសសមាជិក OPEP ថា កំពុងសស្រាក់សស្រាំ ចាក់ប្រេងបំពេញកប៉ាល់ដើម្បី ត្រៀមចេញទៅលក់ នៅទីផ្សារ នៅពេលតម្លៃប្រេងកំពុងឡើងថ្លៃ យ៉ាងដូច្នេះ។
នៅក្នុងកិច្ចប្រជុំនៅថ្ងៃសុក្រ រដ្ឋមន្រ្តីថាមពលប្រេងរបស់អារ៉ាប៊ី សាអូឌីត បានបញ្ជាក់ថា ទីក្រុងរីយ៉ាតមិនមែនជា អ្នកដំឡើងថ្លៃប្រេងឆៅ ប៉ុន្តែ គឺទីផ្សារទេ ដែលជាកំណត់តម្លៃ ប្រេង។ សម្រាប់អ្នកវិភាគមួយចំនួន អារ៉ាប៊ី សាអូឌីត ដែលក្រាញ មិនចង់កាត់បន្ថយបរិមាណផលិតប្រេង តាំងពីដំបូងទី គ្រោងចង់ឲ្យតម្លៃប្រេង កើនឡើងដល់៨០ដុល្លារ ឬ១០០ដុល្លារ ក្នុងមួយបារីល ដែលជាតម្លៃ ប្រេងឆៅ នៅមុនការធ្លាក់ចុះ ដ៏គំហុក នៅឆ្នាំ ២០១៤។ អារ៉ាប៊ី សាអូឌីត ដែលជាប្រទេសនាំចេញប្រេងច្រើនជាងគេនៅលើលោក សង្ឃឹមទាញយកផលចំណេញពីតម្លៃប្រេងឡើងថ្លៃ ដើម្បី យកមកដោះស្រាយបញ្ហាហិរញ្ញវត្ថុក្នុងស្រុក។
តម្លៃប្រេងឆៅបានឡើងថ្លៃ ឡើងវិញ ដោយមកតែពីកិច្ចព្រមព្រៀងកាត់បន្ថយការផលិត ប្រេង ដែលបានជួយកុំឲ្យការផ្គត់ផ្គង់ប្រេងមានច្រើនជាងតម្រូវការ។ ម្យ៉ាងទៀត តម្លៃប្រេងឡើងថ្លៃឡើងវិញ ដោយសារតែវិបត្តិនយោបាយនៅក្នុងប្រទេសផលិតប្រេង ដូចជា វេណេស៊ុយអេឡា នីហ្សេរីយ៉ា ឬ លីប៊ីជាដើម។ នេះគេនៅមិនទាន់និយាយពីផលប៉ះពាល់ នៃនយោបាយរបស់លោកដូណាល់ ត្រាំ ដែលបានគំរាមដាក់ទណ្ឌកម្មសេដ្ឋកិច្ចទៅលើអ៊ីរ៉ង់ ដែលជាប្រទេសផលិត និងនាំចេញប្រេងដ៏សំខាន់មួយដែរ។
អាមេរិកដែលបានវ៉ានាំមុខ អារ៉ាប៊ី សាអូឌីត ក្នុងនាមជាប្រទេសផលិតប្រេងធំទី២ក្នុងលោក បានទាញយកផលចំណេញច្រើនណាស់ពីនយោបាយកាត់បន្ថយការផលិតបូមប្រេងរបស់ក្រុមប្រទេសOPEPកន្លងមក។ នៅពេលដែល OPEPកាត់បន្ថយបរិមាណផលិតប្រេង អាមេរិកឯណោះវិញ បានបង្កើនការបូម និងផលិតប្រេង ដល់១០លានបារីល ក្នុងមួយថ្ងៃ គិតនៅត្រឹមថ្ងៃព្រហស្បតិ៍នេះ។ អាមេរិកដែលគួរសប្បាយចិត្តនឹងប្រេងឡើងថ្លៃ បែរជាទៅរិះគន់OPEP ថាធ្វើឲ្យតម្លៃប្រេងឡើងថ្លៃ ព្រោះតែអាមេរិកអាចច្រណែន ខ្លាច បាត់ទីផ្សារ នៅពេលក្រុមប្រទេសOPEP បង្កើនការផលិតប្រេង នៅពេលប្រេងឡើងថ្លៃ ឡើងវិញ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ