រុស្ស៊ី មានទីតាំងល្អ នៅអ៊ីរ៉ង់ សម្រាប់ទាញយកគុណប្រយោជន៍ ពី ការដកខ្លួនចេញ នៃសរអា
ម៉ូស្គូបានថ្លែងផ្តន្ទាទោសប្តូរប្តេជ្ញ ការដកខ្លួនចេញនៃ សរអា ពី កិច្ចព្រមព្រៀងនុយក្លេអ៊ែរអ៊ីរ៉ង់ ហើយ ម៉ូស្គូក៏នឹងរងផលវិបាកសេដ្ឋកិច្ចតិចជាងសហភាពអឺរ៉ុបដោយមកពីទណ្ឌកម្មអាមេរិកាំងទណ្ឌកម្មដែលអាចនាំមកជា លាភដោយមិនដឹងខ្លួន សម្រាប់បណ្តាសហគ្រាសរុស្ស៊ី។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២០
ខណៈដែលប្រទេសអឺរ៉ុប នាំគ្នាបោចសក់ ដើម្បីរក្សាទុក ទំនាក់ទំនងសេដ្ឋកិច្ចត្បាញប្រទាក់ ជាមួយ អ៊ីរ៉ង់ ក្រោយពីមានចុះបានកិច្ចព្រមព្រៀងនុយក្លេអ៊ែរនោះក្នុង ឆ្នាំ ២០១៥ សម្រាប់បណ្តាសហគ្រាសរុស្សី គឺ ស្រាប់តែ ទទួលបានជាថ្មីទីតាំងក្នុងប្រទេសនោះ ដែលនាំជាអត្ថប្រយោជន៍ដល់ខ្លួន - នេះ បើតាមមតិ ពួកអ្នកធ្វើវិភាគ។
តាមអំណះអំណាង អ្នកនយោបាយវិទូឯករាជ្យ លោក Vladimir Sotnikov ៖
-កិច្ចព្រមព្រៀងដែលមានចុះបាន និង ការលុបទៅវិញ ទណ្ឌកម្មប្រឆាំងអ៊ីរ៉ង់ បានបើកផ្លូវ ឲ្យ សហគ្រាស អឺរ៉ុបទាំងឡាយ វិលត្រឡប់ទៅអ៊ីរ៉ង់វិញ ហែហមដោយការប្រជែងគ្នាយ៉ាងខ្លាំង។ ប៉ុន្តែ ឥឡូវ សហគ្រាស អឺរ៉ុបទាំងនោះ អាចបន្តសកម្មភាពខ្លួនទាំងលំបាកនៅអ៊ីរ៉ង់ ហេតុដែលនឹងបន្សល់ទុកលំហ សម្រាប់ ប្រទេសរុស្ស៊ីតែម្តង។
មើលមុខគ្នាមិនចំ អស់ពេលយ៉ាងយូរ រុស្ស៊ីនិងអ៊ីរ៉ង់ បានកែទំនាក់ទំនងខ្លួន ឲ្យល្អឡើងវិញ ក្រោយពីចប់ទៅ សង្គ្រាមត្រជាក់។ ពេលដែលអ៊ីរ៉ង់ ស្ថិតនៅឯកោ ម៉ូស្គូ សុខចិត្តយល់ព្រម នៅកណ្តាលទសវត្សរ៍ទី៩០ បំពេញឡើងវិញ កុងត្រាស្តីអំពីការសង់ស្ថានីយអគ្គិសនីបរមាណូ នៅក្រុង Boucherhr ប៉ែកខាងត្បូងអ៊ីរ៉ង់ ដែលត្រូវក្រុមហ៊ុនអាល្លឺម៉ង់ ដោះដៃឈប់សង់។
ទាំងក្នុងសម័យមុនចុះបានកិច្ចព្រមព្រៀងនុយក្លេអ៊ែរនោះក្នុងឆ្នាំ ២០១៥ រុស្ស៊ីនិងអ៊ីរ៉ង់ តែងបានខិតខំ ពង្រឹង ចំណងពាណិជ្ជកម្មនឹងគ្នា ទោះបី ទណ្ឌកម្មបស្ចិមលោកកាលណោះ ស្ថិតនៅជាធរមាននៅឡើយ។
តាមយោបល់ លោក Igor Delanoé នៃ អង្គការបារាំង-រុស្ស៊ី ខាងប្រមូលនិងផ្សព្វផ្សាយព័ត៌មាន ៖ សូម្បី ពេលដែលអ៊ីរ៉ង់ជាប់ក្នុងទណ្ឌកម្មក្តី ក៏រុស្ស៊ី នៅបន្តរកស៊ីជាមួយអ៊ីរ៉ង់ ដោយមិនខ្វល់នឹងទណ្ឌកម្មនោះ ។
យ៉ាងណាមិញ ក្នុងដំណើរទស្សនកិច្ចនៅ រដ្ឋធានីអ៊ីរ៉ង់ ថ្ងៃព្រហស្បត៏ម្សិលមិញ លោកអនុរដ្ឋមន្ត្រីការបរទេស រុស្ស៊ី Serguei Riabkov បានថ្លែងបញ្ជាក់ថា ប្រទេសទាំងពីរ សង្ឃឹមបន្តយ៉ាងរលូន “ សហប្រតិបត្តិការ សេដ្ឋកិច្ច តាមគ្រប់មុខព្រួញ។ អ្នកការទូតរុស្ស៊ីជាន់ខ្ពស់់នេះ សង្កត់ធ្ងន់ថា ៖ ម៉ូស្គូ មិនភ័យខ្លាចទណ្ឌកម្ម សោះឡើយ។
ស្របនឹងតួលេខផ្លូវការ ៖ ក្នុងឆ្នាំ ២០១៧ កន្លងទៅ ទំហំផ្តោះប្តូរពាណិជ្ជកម្មរុស្ស៊ី-អ៊ីរ៉ង់ បានមានទឹកប្រាក់ ១.៧០០ លានដុល្លារ ឫ ធ្លាក់ចុះអស់ ២០% បើធៀបទៅនឹងឆ្នាំ ២០១៦ ហើយប្រាកដណាស់ ទាបជាង ឆ្ងាយ ពី រង្វង់ឆ្នាំ ២.០១០ កាលដែលទំហំផ្តោះប្តូរនេះ តែងលើសពី ៣.០០០ លានដុល្លារជានិច្ច៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ