ពលរដ្ឋប៉ាឡេស្ទីន សម្រុកទៅព្រំដែនប្រថុយស្លាប់ ដើម្បីធ្វើបាតុកម្មប្រឆាំងអាមេរិក
ចំនួនជនរងគ្រោះប៉ាឡេស្ទីន ស្លាប់ដោយគ្រាប់កាំភ្លើងអ៊ីស្រាអែលបានកើនឡើងឥតឈប់ (៤១នាក់ ស្លាប់ និងរបួសជាង៩០០នាក់) នៅក្នុងថ្ងៃបើកសម្ពោធស្ថានទូតអាមេរិកនៅទីក្រុងហ្ស៊េរុយសាឡិម ប៉ុន្តែបាតុករប៉ាឡេស្ទីនបាក់ស្បាតទេ ! បាតុករប៉ាឡេស្ទីនទាំងពាន់ៗនាក់ ប្រមូលផ្តុំជាក្រុមតូចៗ សម្រុកបង្ខិតខ្លួន ទៅកាន់តែជិតព្រំដែន ដែលអ៊ីស្រាអែលបានបំពាក់សព្វាវុធ និងពង្រាយទាហានយ៉ាងសន្ធឹកសន្ធាប់។ បារាំងបានអំពាវនាវឱ្យអ៊ីស្រាអែល អត់ធ្មត់។ កូវែត គ្រោងនឹងប្តឹងទៅអង្គការសហប្រជាជាតិ។
ចុះផ្សាយនៅថ្ងៃ៖
ស្តាប់ - ០២:០១
ក្នុងពេលដែលអ៊ីស្រាអែលកំពុងកាត់ខ្សែបូសម្ពោធស្ថានទូតអាមេរិកនៅទីក្រុងហ្ស៊េរុយសាឡិមស្ថានភាពនៅតំបន់ហ្កាហ្សាកាន់តែតានតឹងឡើងៗ ! ដើម្បីសម្តែងការប្រឆាំងនឹងសេចក្តីសម្រេចរបស់លោក ត្រាំ បាតុករប៉ាឡេស្ទីននាំគ្នាប្រថុយជីវិតរុលទៅកាន់តែជិតព្រំដែន ដោយមានតែដុំថ្មប្រយុទ្ធទល់នឹងគ្រាប់កាំភ្លើងអ៊ីស្រាអែល ដែលមិនសំចៃនឹងបាញ់ប្រហារបាតុករ និងលើទីតាំងយោធារបស់ចលនាហាម៉ាស នៅហ្កាហ្សាឡើយ។
គិតចាប់តាំងពីឆ្នាំ២០១៤មក ថ្ងៃនេះជាថ្ងៃមរណៈច្រើនជាងគេបំផុត សម្រាប់ប្រជាពលរដ្ឋប៉ាឡេស្ទីន។ ប្រឈមនឹងស្ថានការណ៍ដ៏ដុនដាបបែបនេះ សហគមន៍អន្តរជាតិបាននាំគ្នាបញ្ចេញសំឡេង បង្ហាញសេចក្តីព្រួយបារម្ភគ្រប់គ្នា រាប់ទាំងអគ្គលេខាធិការអង្គការសហប្រជាជាតិផង។ កូវ៉េត សមាជិកមិនអចិន្ត្រៃយ៍នៃក្រុមប្រឹក្សាសន្តិសុខអង្គការសហប្រជាជាតិ នឹងស្នើសុំឱ្យមានជំនួបប្រជុំបន្ទាន់ស្តីអំពីស្ថានភាពនៅតំបន់ហ្កាហ្សា។ អង្គការការពារសិទ្ធិមនុស្ស Amnesty International បានថែមទាំងបរិហារទង្វើរំលោភសិទ្ធិមនុស្សរបស់អ៊ីស្រាអែល មកលើតំបន់ហ្កាហ្សា និងទាមទារឱ្យបញ្ឈប់សកម្មភាពនេះជាបន្ទាន់។
ចំណែក សហភាពអឺរ៉ុប បារាំង អង់គ្លេស បានជំរុញឱ្យគ្រប់ភាគីប្រឹងអត់ធ្មត់ មែនទែន ដើម្បីកុំឱ្យអំពើហិង្សាមរណៈបន្ថែមទៀត។ បារាំងតាមរយៈលិខិតរបស់រដ្ឋមន្ត្រីការបរទេស បានបន្ទោសការសម្រេចចិត្តរបស់អាមេរិកផ្ទេរស្ថានទូតមកទីក្រុងហ្ស៊េរុយសាឡិម ជាទង្វើបញ្ច្រាសនឹងច្បាប់អន្តរជាតិ និងបានអំពាវនាវឱ្យគ្រប់ភាគីពាក់ព័ន្ធទាំងមូលក្នុងជម្លោះប៉ាឡេស្ទីនអ៊ីស្រាអែល ចេះមានទំនួលខុសត្រូវ និងត្រៀមខ្លួនប្រឈមនឹងវិបត្តិស្មុគស្មាញថ្មី។
ប៉ុន្តែសម្រាប់អាមេរិក តាមរយៈវីដេអូកុងហ្វេរ៉ង់ក្នុងពិធីសម្ពោធស្ថានទូតថ្មី លោកប្រធានាធិបតី ដូណាល់ ត្រាំ បានអះអាងជាថ្មី ថា “អាមេរិកមានឆន្ទៈពិត និងសន្យាប្រលូកយ៉ាងពេញទំហឹងក្នុងការស្វែងសន្តិភាពជាទូទៅ និងជានិរន្តឱ្យអ៊ីស្រាអែលនិងប៉ាឡេស្ទីន។ ប៉ុន្តែអ៊ីស្រាអែលជារដ្ឋមួយមានបូរណភាព ដែលត្រូវតែមានរដ្ឋធានីដូចបណ្តារដ្ឋផ្សេងទៀតដែរៗ ! ត្រូវតែទទួលការពិតដែលថាក្រុងហ្ស៊េរុយសាឡិម ជារដ្ឋធានីរបស់អ៊ីស្រាអែល ទើបយើងត្រូវសម្រេចបំណងមកតាំងស្ថានទូតនៅទីនេះ !”
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ