នុយក្លេអ៊ែរអ៊ីរ៉ង់៖អាមេរិកចង់ធ្វើការជាមួយអឺរ៉ុបដើម្បីទទួលបានកិច្ចព្រមព្រៀងថ្មី
នៅសហរដ្ឋអាមេរិក លោករដ្ឋមន្រ្តីការបរទេសអាមេរិក Mike Pompeo បានបញ្ជាក់នៅក្នុងបទសម្ភាសន៍ជាមួយកាណាល់ទូរទស្សន៍ Fox ថា ការដែលអាមេរិកបានដកខ្លួនចេញពីកិច្ចព្រមព្រៀងនុយក្លេអ៊ែរឆ្នាំ ២០១៥ មិនមែនសំដៅប្រឆាំងអឺរ៉ុបទេ។ តាមលោក Pompeo អាមេរិកចង់ធ្វើការជាមួយអឺរ៉ុបដើម្បីស្វែងរកកិច្ចព្រមព្រៀងថ្មីស្តីពីបញ្ហាប្រទេសអ៊ីរ៉ង់ដែលមិនផ្តោតតែលើបញ្ហានុយក្លេអ៊ែរមួយមុខឡើយ។ ប្រតិកម្មរបស់ប្រមុខការទូតអាមេរិកពេលនេះបានធ្វើឡើង ក្នុងពេលដែលប្រមុខការទូតអ៊ីរ៉ង់លោកហ្សារីស្វកំពុងបន្តស្វែងរកការគាំទ្រពីប្រទេសហត្ថលេខីផ្សេងដើម្បីស្រោចស្រង់កិច្ចព្រមព្រៀងដែលមានស្រាប់។
ចុះផ្សាយនៅថ្ងៃ៖
ស្តាប់ - ០២:១៨
ចំពេលដែលប្រមុខការទូតអ៊ីរ៉ង់លោកហ្សារីស្វកំពុងព្យាយាមនិយាយបញ្ចុះបញ្ចូលប្រទេសហត្ថលេខីផ្សេងឲ្យរក្សាទុកកិច្ចព្រមព្រៀងឆ្នាំ ២០១៥ និងជួយការពារប្រយោជន៍សេដ្ឋកិច្ចអ៊ីរ៉ង់ សមភាគីអាមេរិកលោក Pompeo បែរជាចង់និយាយបញ្ចុះបញ្ចូលអឺរ៉ុបឲ្យស្វែងរកកិច្ចព្រមព្រៀងថ្មីទៅវិញ។ កិច្ចព្រមព្រៀងថ្មីដែលប្រមុខការទូតអាមេរិកបានបញ្ជាក់ច្បាស់ៗថា មិនមែននិយាយតែពីបញ្ហានុយក្លេអ៊ែររបស់អ៊ីរ៉ង់ប៉ុណ្ណោះទេ តែក៏ត្រូវបូកបញ្ចូលផងដែរនូវបញ្ហាគ្រាប់មីស៊ីលបាលីស្ទិក និងកំណើនឥទ្ធិពលរបស់អ៊ីរ៉ង់នៅក្នុងតំបន់ដើមបូព៌ា ពិសេសការលូកដៃរបស់ទីក្រុងតេហេរ៉ង់នៅក្នុងប្រទេសស៊ីរី លីបង់ អ៊ីរ៉ាក់ និងនៅក្នុងប្រទេសយេម៉ែន។
« ខ្ញុំសង្ឃឹមថានៅថ្ងៃខាងមុខ និងនៅប៉ុន្មានសប្តាហ៍ខាងមុខ យើងនឹងអាចរកឃើញកិច្ចព្រមព្រៀងថ្មីដែលល្អ និងដែលអាចជួយការពារពិភពលោកពិតប្រាកដប្រឈមមុខនឹងអាកប្បកិរិយាអាក្រក់របស់អ៊ីរ៉ង់ » នេះជាពាក្យសម្តីរបស់លោក Mike Pompeo នៅក្នុងបទសម្ភាសន៍ជាមួយកាណាល់ទូរទស្សន៍ Fox នាថ្ងៃអាទិត្យ ទី១៣ ឧសភា។ ប្រតិកម្មស្រដៀងគ្នានេះក៏មានពីលោកចន បុលតុន ទីប្រឹក្សាសន្តិសុខជាតិរបស់លោកប្រធានាធិបតីអាមេរិកដូណាល់ ត្រាំ។ នៅក្នុងបទសម្ភាសន៍ជាមួយកាណាល់ទូរទស្សន៍ ABC លោកបុលតុនបានចោទអ៊ីរ៉ង់ត្រង់ៗពីបទយកកិច្ចព្រមព្រៀងឆ្នាំ ២០១៥ ធ្វើជាឈ្នាន់ដើម្បីពង្រឹងអំណាចយោធា និងឥទ្ធិពលនៅក្នុងតំបន់។
គឺហេតុផលទាំងអស់នេះហើយដែលបានជំរុញឲ្យលោកដូណាល់ ត្រាំដកអាមេរិកចេញពីកិច្ចព្រមព្រៀងកាលពីថ្ងៃទី៨ ឧសភាកន្លងទៅ។ តែបញ្ហានៅត្រង់ថា ប្រទេសហត្ថលេខីផ្សេង មានចិន រុស្ស៊ី បារាំង អង់គ្លេស និងអាល្លឺម៉ង់បានសន្យាបន្តរក្សាទុកកិច្ចព្រមព្រៀង និងប្តេជ្ញាបន្តធ្វើការជាមួយអ៊ីរ៉ង់ដើម្បីការពារប្រយោជន៍របស់ពលរដ្ឋអ៊ីរ៉ង់។ ចំណែកអ៊ីរ៉ង់ តាមរយៈលោកប្រធានាធិបតីរ៉ូហានីក៏ដូចជាប្រមុខការទូតលោកហ្សារីស្វបានបន្តបញ្ជាក់ម្តងហើយម្តងទៀតពីបំណងចង់បន្តធ្វើការជាមួយក្រុមប្រទេសហត្ថលេខីផ្សេងដើម្បីទទួលបានការធានា និងដើម្បីស្រោចស្រង់កិច្ចព្រមព្រៀង។
បន្ទាប់ពីប្រទេសចិន លោកហ្សារីស្វបានទៅប្រទេសរុស្ស៊ីក្នុងថ្ងៃចន្ទ ទី១៤ ឧសភា និងបន្តដំណើរទៅកាន់ទីស្នាក់ការអឺរ៉ុបក្នុងទីក្រុងព្រុចសែល ប្រទេសបែលហ្ស៊ិកនៅថ្ងៃអង្គារ ទី១៥ ឧសភា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ