អាមេរិកទាមទារឲ្យព្យួរប្រទេសវ៉េណេស៊ុយអេឡាពីអង្គការរដ្ឋអាមេរិក
នៅថ្ងៃចន្ទ ទី៤ មិថុនា សហរដ្ឋអាមេរិកបានទាមទារឲ្យព្យួរជាបន្ទាន់ប្រទេសវ៉េណេស៊ុយអេឡាពីអង្គការរដ្ឋអាមេរិក។ ការទាមទារនេះត្រូវបានធ្វើឡើងដោយលោករដ្ឋមន្រ្តីការបរទេស Mike Pompeo នាឱកាសមហាសន្និបាតប្រចាំឆ្នាំនៃអង្គការរដ្ឋអាមេរិករៀបចំក្នុងទីក្រុងវ៉ាស៊ីនតោន។ នៅខែឧសភាកន្លងទៅ លោក Mike Pense អនុប្រធានាធិបតីអាមេរិកក៏ធ្លាប់បាននិយាយដូចគ្នានេះដែរ បន្ទាប់ពីមានការរៀបចំបោះឆ្នោតប្រធានាធិបតីនៅវ៉េណេស៊ុយអេឡាដែលលោកនីកូឡា ម៉ាឌូរ៉ូបានជាប់ឆ្នោតអាណត្តិថ្មី។ ទន្ទឹមនឹងការទាមទារឲ្យព្យួរព្យួរប្រទេសវ៉េណេស៊ុយអេឡាពីអង្គការរដ្ឋអាមេរិក លោក Pompeo ក៏បានអំពាវនាវឲ្យពង្រឹងទណ្ឌកម្មប្រឆាំងទីក្រុងការ៉ាកាស់ដែរ។
ចុះផ្សាយនៅថ្ងៃ៖
ស្តាប់ - ០២:០៨
« សព្វថ្ងៃនេះ គ្មានបញ្ហាប្រឈមណាដែលខ្លាំងជាងការបំបាត់ចោលនូវលទ្ធិប្រជាធិបតេយ្យ និងមហន្តរាយមនុស្សធម៌នៃប្រទេសវ៉េណេស៊ុយអេឡាទេ។ ក្នុងខែកន្លងទៅ អនុប្រធានាធិបតីអាមេរិក Pense បាននិយាយប្រាប់ដល់ប្រទេសសមាជិកទាំងអស់នៃអង្គការរដ្ឋអាមេរិកឲ្យគោរពតាមធម្មនុញ្ញប្រជាធិបតេយ្យដែលបានកំណត់ឲ្យយើងធ្វើនៅពេលណាដែលយើងកំពុងប្រឈមនឹងការរំលោភបំពានលើធម្មនុញ្ញប្រជាធិបតេយ្យនោះពីប្រទេសសមាជិកណាមួយ មានន័យថា ព្យួរប្រទេសវ៉េណេស៊ុយអេឡាពីអង្គការរដ្ឋអាមេរិក។
ការព្យួរនេះជាសក្ខីកម្មមួយដែលបញ្ជាក់ថា អង្គការរដ្ឋអាមេរិកបានប្រែក្លាយពីទ្រឹស្តីទៅជាការអនុវត្តជាក់ស្តែង ពោលមិននិយាយតែមាត់ ឬសរសេរតែលើក្រដាសទេ។ ម្យ៉ាងទៀត ទង្វើនេះក៏ជាសារព្រមានមួយចំពោះរបបដឹកនាំរបស់នីកូឡា ម៉ាឌូរ៉ូដែរ។ សារនោះគឺថា មានតែការរៀបចំបោះឆ្នោតសេរី ត្រឹមត្រូវ និងយុត្តិធម៌ទេដែលនឹងអនុញ្ញាតឲ្យរដ្ឋាភិបាលរបស់លោកអាចបញ្ចូលទៅក្នុងគ្រួសារនៃប្រជាជាតិនានា។ ក្រៅពីការព្យួរប្រទេសវ៉េណេស៊ុយអេឡាពីអង្គការរដ្ឋអាមេរិក ខ្ញុំអំពាវនាវដល់ប្រទេសសមាជិកទាំងអស់ឲ្យដាក់គំនាបបន្ថែមលើរបបម៉ាឌូរ៉ូ ដូចយ៉ាងទណ្ឌកម្ម និងដាក់ឲ្យនៅឯកោផ្លូវទូត។
គេត្រូវដាក់គំនាបរហូតដល់របបម៉ាឌូរ៉ូយល់ព្រមចាត់វិធានការចាំបាច់មួយចំនួនក្នុងការស្តារឡើងវិញនូវលទ្ធិប្រជាធិបតេយ្យពិតប្រាកដ និងអនុញ្ញាតឲ្យពលរដ្ឋទទួលបានជំនួយមនុស្សធម៌អន្តរជាតិដែលពួកគេកំពុងត្រូវការយ៉ាងខ្លាំង។ យើងសូមអំពាវនាវដល់គ្រប់ប្រទេសសមាជិកនៃអង្គការរដ្ឋអាមេរិកឲ្យផ្តើមអនុវត្តន៍ពីថ្ងៃនេះទៅចំពោះវ៉េណេស៊ុយអេឡា និងនៅគ្រប់កន្លែងទាំងអស់នាខាងមុខ បើចាំបាច់ដើម្បីប្រយោជន៍នៅក្នុងតំបន់ និងនៅក្នុងពិភពលោកទាំងមូល »៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ