លោកដូណាល់ ត្រាំ៖អាមេរិកនឹងមិនក្លាយជាជំរំអន្តោប្រវេសន៍ទេ
នៅថ្ងៃអង្គារ ទី១៩ មិថុនានេះ ការបរិហារ និងការរិះគន់ ទិតៀនកំពុងបន្តមានយ៉ាងផុសផុលលើនយោបាយអាមេរិករបស់លោកដូណាល់ ត្រាំក្នុងការបំបែកកូនជនអន្តោប្រវេសន៍ចេញពីឱពុកម្តាយរបស់ពួកគេ។ តែលោកត្រាំបែរជាបានទម្លាក់ការទទួលខុសត្រូវលើក្រុមអ្នកប្រជាធិបតេយ្យ និងចង់ឲ្យសភាអនុម័តឆាប់ៗលើច្បាប់មួយដើម្បីសង់ជញ្ជាំងនៅតាមព្រំដែន និងរឹតបន្តឹងលំហូរជនអន្តោប្រវេសន៍។ សម្រាប់លោកអគ្គលេខាធិការអង្គការសហប្រជាជាតិ Antonio Guterres ជនភៀសខ្លួន និងជនអន្តោប្រវេសន៍គ្រប់រូបត្រូវតែទទួលបានការគោរព និងសេចក្តីថ្លៃថ្នូរដោយអនុលោមតាមច្បាប់អន្តរជាតិ។ យ៉ាងណាក៏ដោយ លោកត្រាំបានបញ្ជាក់ច្បាស់ៗថា អាមេរិកនឹងមិនក្លាយជាជំរុំអន្តោប្រវេសន៍ ហើយប្រទេសដែលគ្មានព្រំដែនមិនមែនជាប្រទេសទេ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៣
« អាមេរិកនឹងមិនក្លាយជាជំរុំអន្តោប្រវេសន៍ ឬក៏ជាមជ្ឈមណ្ឌលសម្រាប់ទទួលជនភៀសខ្លួនទេ។ រឿងនេះនឹងមិនអាចទៅរួចជាដាច់ខាត។ ចូរអស់លោកក្រឡេកមើលរឿងរ៉ាវដែលកំពុងកើតមានឡើងនៅក្នុងទ្វីបអឺរ៉ុប និងនៅកន្លែងផ្សេងទៀតទៅមើល យើងមិនអាចអនុញ្ញាតឲ្យរឿងរ៉ាវដូចគ្នានេះកើតមាននៅក្នុងទឹកដីអាមេរិកឡើយ គឺមិនអាចទេនៅក្រោមការកាន់កាប់របស់ខ្ញុំ។
យើងចង់បានសន្តិសុខសម្រាប់ប្រទេសរបស់យើង។ ប្រសិនបើពួកអ្នកប្រជាធិបតេយ្យយល់ព្រមអង្គុយជជែកគ្នាជាជាងនាំគ្នាយកជើងរាទឹក យើងនឹងអាចដោះស្រាយបញ្ហាយ៉ាងឆាប់រហ័ស។ យើងនឹងអាចធ្វើអ្វីៗគ្រប់យ៉ាងដែលល្អសម្រាប់កូនក្មេង ល្អសម្រាប់ប្រទេសជាតិ និងល្អសម្រាប់ពិភពលោក។ យើងមានច្បាប់ដ៏អាក្រក់ជាងគេក្នុងលោកស្តីពីអន្តោប្រវេសន៍។
ប្រទេសមួយគ្មានព្រំដែនមិនមែនជាប្រទេសទេ។ យើងត្រូវការព្រំដែន យើងត្រូវការសន្តិសុខ និងយើងត្រូវតែយកចិត្តទុកដាក់ចំពោះប្រជាជនរបស់យើង។ យើងចង់បាននយោបាយអន្តោប្រវេសន៍មួយតាមបែបជ្រើសរើសដោយផ្អែកលើគុណសម្បត្តិ និងសមត្ថភាព។ គឺមិនមែនជានយោបាយអន្តោប្រវេសន៍ដែលបើកទ្វារចំហទទួលមនុស្សគ្រប់រូបដែលឆ្លងដែនចូលមក និងដែលមានខ្លះជាឧក្រិដ្ឋជន ជាចោរ ឬមួយក៏មិនដឹងជាប្រភេទមនុស្សស្អីនោះទេ។
ដូច្នេះ យើងចង់បានប្រទេសមួយដែលមានសុវត្ថិភាព ហើយចំណុចនេះត្រូវចាប់ផ្តើមនៅព្រំដែន និងវាត្រូវតែអ៊ីចឹង »៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ