លោក ដូណាល់ ត្រាំ ប្តូរចិត្តឈប់បំបែកក្មេងអន្តោប្រវេសន៍ពីឪពុកម្តាយ
ដូចក្រឡាស់បាតដៃ ! នៅថ្ងៃពុធម្សិលមិញនេះ លោកប្រធានាធិបតីអាមេរិក ដូណាល់ ត្រាំ បានចុះហត្ថលេខាលើក្រិត្យមួយ ឈប់ពង្រាត់ក្មេងមិនទាន់ពេញវ័យពីឪពុកម្តាយអន្តោប្រវេសន៍ ដែលរត់ឆ្លងពីម៉ិចស៊ិកមកសហរដ្ឋអាមេរិក។ រឿងអាស្រូវចាប់ពង្រាត់យកក្មេងចំនួន ជិត ២៣០០នាក់ពីគ្រួសារ ដែលបានបំផុសឱ្យមានក្រោយពីរងការរិះគន់យ៉ាងខ្លាំង ទាំងនៅក្នុងប្រទេស និងនៅលើឆាកអន្តរជាតិ។
ចុះផ្សាយនៅថ្ងៃ៖ កែប្រែថ្ងៃទី៖
លោកប្រធានាធិបតីបានទន្ទេញពាក្យដដែលៗ តាំងពីជាច្រើនថ្ងៃមកហើយ ថាលោកអនុវត្តទៅតាមអ្វីដែលមានចែងក្នុងច្បាប់ ហើយមានតែសភាទេ ដែលអាចបិទបញ្ចប់ការពង្រាត់កូនក្មេងពីគ្រួសារអន្តោប្រវេសន៍ខុសច្បាប់បាន។ ប៉ុន្តែនៅចំពោះមុនការរិះគន់ ទាំងនៅក្នុងប្រទេស លើពិភពលោក និងក្នុងជួរបក្សសាធារណរដ្ឋផ្ទាល់ លោក ដូណាល់ ត្រាំ ក៏សុខចិត្តដកថយ និងបានចុះហត្ថលេខាយ៉ាងរួសរាន់ លើក្រិត្យ បញ្ជាឱ្យ ឈប់បំបែកក្មេងពីឪពុកម្តាយ តែត្រូវឱ្យចាប់ឃុំឃាំងជុំគ្នា ទាំងគ្រួសារ តែម្តង នូវរាល់អន្តោប្រវេសន៍ណាដែលបានរត់ឆ្លងព្រំដែនដោយខុសច្បាប់ និងក្នុងពេលរង់ចាំបំពេញដំណើរការបែបបទតាមច្បាប់។
នេះជាសេចក្តីសម្រេចចិត្តដ៏ភ្ញាក់ផ្អើល ! ដែលតម្រូវឱ្យក្រុមអ្នកតំណាងនៅសភាត្រូវប្រញាប់អនុម័តច្បាប់អន្តោប្រវេសន៍ ប៉ុន្តែ សម្រាប់សមាជិកសភាបក្សប្រជាធិបតេយ្យ ទង្វើរបស់លោក ត្រាំ នឹងមិនធ្វើឱ្យពួកគេប្តូរចិត្ត ទៅបោះឆ្នោតគាំទ្រច្បាប់ ស្នើឡើងដោយលោកប្រធានាធិបតីឡើយ។
សូមបញ្ជាក់ថា ដើម្បីអាចចាប់ឃុំឃាំង អន្តោប្រវេសន៍ខុសច្បាស់ដែលរត់ឆ្លងចូលអាមេរិកតាមព្រំដែនម៉ិចស៊ិក ទាំងអស់ ១០០% ក្រិត្យរបស់លោកដូណាល់ ត្រាំ ក៏មានគ្រោងលុបចោលច្បាប់កំរិតចំនួនថ្ងៃឃុំឃាំងគ្រួសារអន្តោប្រវេសន៍ខុសច្បាប់ ត្រឹម២០ថ្ងៃផង។ សមាគមការពារសិទ្ធិមនុស្សគ្រោងនឹងដាក់ពាក្យបណ្តឹងទៅតុលាការប្រឆាំងនឹងសេចក្តីសម្រេចរបស់លោកត្រាំទៀត។
ជាងនេះទៅទៀត ក្រិត្យដែលលោកត្រាំទើបចុះហត្ថលេខានេះ មិនមែនជាដំណោះស្រាយនៃវិបត្តិមនុស្សធម៌តាមព្រំដែនទេ។ ក្នុងរយៈពេល៥សប្តាហ៍ចុងក្រោយនេះ លោកត្រាំ បានបំបែកក្មេងចំនួនជិត២៣០០នាក់ ពីឪពុកម្តាយរបស់ពួកគេ។ ឯជោគវាសនារបស់ក្មេងទាំងនោះ គ្មានភាពជាក់លាក់ទេ ! វាពិតជាមិនមែនងាយស្រួលឡើយ ក្នុងការស្វែងរកឪពុកម្តាយរបស់ពួកគេ ដើម្បីដាក់ឃុំជុំគ្នានោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ