កិច្ចប្រជុំOPEC៖ ប្រទេសផលិតប្រេងបន្តខ្វែងគំនិតគ្នា ពីរឿងបង្កើនការផលិតប្រេង
ចុះផ្សាយនៅថ្ងៃ៖
ស្តាប់ - ០៨:០៦
ក្រុមប្រទេសផលិតប្រេងធំៗនៅក្នុងពិភពលោក ជួបប្រជុំគ្នា នៅថ្ងៃសុក្រនេះ នៅក្នុងទីក្រុងវីយ៉ែន ប្រទេសអូទ្រីស។ ប្រធានបទសំខាន់ដែលប្រទេសផលិតប្រេងទាំង២៤ ត្រូវជជែកគ្នា ការសំណើចង់បង្កើនការផលិតប្រេងបន្ថែម។ នៅមុនកិច្ចប្រជុំរបស់អង្គការប្រទេសផលិតប្រេង OPEC ហើយនិងប្រទេសមិនមែនសមាជិករបស់OPEC ទៅទៀត រុស្ស៊ី និងអារ៉ាប៊ីសាអ៊ូឌីត ដែលជាប្រទេសបូមប្រេងច្រើនជាងគេក្នុងលោក បានព្រមព្រៀងគ្នារួចហើយ ចង់ឲ្យមានការបង្កើនការផលិត ប៉ុន្តែ អ៊ីរ៉ង់វិញបានបដិសេធមមិនចង់ឲ្យបង្កើនការផលិតប្រេង។ តើក្រុមប្រេទេសផលិតប្រេងអាចរកឃើញកិច្ចព្រមព្រៀងដើម្បីបង្កើនបរិមាណផលិតប្រេងដែរឬទេ?
រដ្ឋមន្រ្តីរបស់ក្រុមប្រទេសផលិតប្រេង OPEC ហើយនិងប្រទេសដៃគូ ដែលរួមមាន២៤ប្រទេស បានបើកការប្រជុំនៅថ្ងៃនេះ និងថ្ងៃសៅរ៍ស្អែក ដើម្បីជជែកពីគម្រោងចង់បង្កើនការផលិតប្រេង នៅទូទាំងពិភពលោក។ នៅចុងឆ្នាំ ២០១៦ ដើម្បី ធ្វើឲ្យតម្លៃប្រេងឆៅ ឡើងថ្លៃវិញ ប្រទេសផលិតប្រេង ទាំង ២៤ បាន ចុះហត្ថលេខាលើកិច្ចព្រមព្រៀង កាត់បន្ថយការបូមប្រេង ប្រមាណ ១លានបារីល ពោលគឺគេបានយល់ព្រមព្រៀងគ្នាផលិតប្រេងប្រមាណ ៣២លានបារីល ប៉ុណ្ណោះ ក្នុងមួយថ្ងៃ។ កិច្ចព្រមព្រៀងនេះបានជួយស្រោចស្រង់តម្លៃប្រេង ដែលធ្លាក់ចុះខ្លាំង ក្នុងទីផ្សារប្រេង រហូត ដល់ ៣០ដុល្លារ ក្នុងមួយបារីល នៅឆ្នាំ ២០១៦ ឲ្យកើនឡើងដល់៧៨ដុល្លារវិញ នៅថ្ងៃបើកប្រជុំរបស់OPEC។
ប៉ុន្តែ សម្រាប់អារ៉ាប៊ី សាអូឌីត ដែលជាប្រទេសនាំចេញប្រេងធំជាងគេក្នុងលោក អង្គការ OPEC និងក្រុមប្រទេសផលិតប្រេងផ្សេងទៀត ត្រូវសើរើកិច្ចព្រមព្រៀងឡើងវិញ ដើម្បីឆ្លើយតបនឹងតម្រូវការប្រេងក្នុងទីផ្សារ។ តាមកិច្ចព្រមព្រៀង ឆ្នាំ ២០១៦ ក្រុមប្រទេសផលិតប្រេង ត្រូវកាត់បន្ថយការបូមប្រេង រហូតដល់ចុងឆ្នាំ ២០១៨ ដើម្បីស្រោចស្រង់ តម្លៃប្រេងឆៅឡើងវិញ។
សូមអាន៖ តម្លៃប្រេងឆៅកើនឡើងក្រោយពី OPEC ព្រមព្រៀងកាត់បន្ថយបរិមាណបូមប្រេង
ប៉ុន្តែ អារ៉ាប៊ី សាអូឌីត ប្រទេសនាំមុខគេរបស់ OPEC ហើយនិងរុស្ស៊ីដែលមិនមែនជាសមាជិករបស់ OPEC បានទាមទារឲ្យគេបង្កើនបរិមាណផលិតប្រេង ចាប់ពីខែកក្កដា ដោយមិនចាំបាច់ត្រូវរង់ចាំដល់ដំណាច់ឆ្នាំនេះ តាមកិច្ចព្រមព្រៀងឆ្នាំ ២០១៦នោះទេ។ ដើម្បីបញ្ចុះបញ្ចូលប្រទេសផលិតប្រេងផ្សេងទៀតឲ្យយល់ព្រម បោះឆ្នោត គាំទ្រ កិច្ចព្រមព្រៀងថ្មី អារ៉ាប៊ី សាអូឌីត បានលើកឡើងពីការតវ៉ារបស់ប្រទេសទិញប្រេង ដែលមានដូចជាអាមេរិក ចិន និងឥណ្ឌា ដែលត្អូញ ពីតម្លៃប្រេងឡើងថ្លៃ ដោយសារតែនយោបាយកាត់បន្ថយការផលិតប្រេង កន្លងមករបស់ប្រទេស OPEC។ អ្នកវិភាគមួយចំនួន បានវាយតម្លៃថា អារ៉ាប៊ី សាអូឌីត មិនចំណេញ ពីនយោបាយបង្កើនការផលិតប្រេង នេះទេ ប៉ុន្តែ អារ៉ាប៊ី សាអូឌីត បានយល់ព្រមចង់ឲ្យបង្កើនការផលិតប្រេង ឡើងវិញ ដើម្បីទម្លាក់តម្លៃប្រេងឆៅ ទៅតាមការដាក់សម្ពាធរបស់អាមេរិក។ អាចថា អារ៉ាប៊ី សាអូឌីត ធ្វើដូច្នេះ ដើម្បីសងគុណអាមេរិករបស់លោកដូណាល់ ត្រាំ ដែលបានបើកផ្លូវឲ្យមានការដាក់ទណ្ឌកម្មសាជាថ្មី លើអ៊ីរ៉ង់ ដែលជាគូប្រជែងរបស់អារ៉ាប៊ី សាអូឌីត ទាំងផ្នែកឥទ្ធិពល និងសេដ្ឋកិច្ចនៅក្នុងតំបន់។
នៅមុនការជួបប្រជុំ របស់OPEC លោកដូណាល់ ត្រាំ ធ្លាប់បានរិះគន់ ក្រុមប្រទេសផលិតប្រេង OPECថា ជាអ្នកធ្វើឲ្យតម្លៃប្រេងឡើងថ្លៃ។ គេវាយតម្លៃថា លោកដូណាល់ ត្រាំ ស្រែក ទម្លាក់កំហុស លើក្រុមប្រទេសផលិតប្រេង ដោយសារតែហេតុផលសន្លឹកឆ្នោត។ នៅអាមេរិកដែលជាប្រទេសនាំចូលប្រេងច្រើនបន្ទាប់ពីចិន ប្រជាជនអាមេរិក រអ៊ូពីតម្លៃប្រេងឡើងថ្លៃ នៅមុនពេលបោះឆ្នោតសភា អាមេរិក ដែលត្រូវធ្វើនៅខែវិច្ឆិកាខាងមុខនេះ។
នៅចំណែកភាគីរុស្ស៊ីវិញ ដែលជាប្រទេសផលិតប្រេង ធំទី ២លើលោក បានទាមទារ ឲ្យបង្កើនការផលិតប្រេងឡើងវិញ ដើម្បីឆ្លើយតបនឹងការទាមទារ របស់អ្នកភាគហ៊ុន រុស្ស៊ី។ អ្នកមាននៅរុស្ស៊ី ចង់ឲ្យ គេបង្កើនការរុករក ធ្វើអាជីវកម្ម ប្រេង បន្ថែមទៀត នៅរុស្ស៊ី ព្រោះថា ធនធានធម្មជាតិរបស់រុស្ស៊ី នៅមានច្រើន ដែលមិនទាន់ធ្វើអាជីវកម្ម នៅឡើយ។
អ៊ីរ៉ង់ ដែលជាប់ទណ្ឌកម្មជាថ្មីរបស់អាមេរិក ប្រឆាំងនឹងនិន្នាការបង្កើនការផលិតប្រេង
នៅមុនក្នុងកិច្ចប្រជុំត្រៀម របស់ OPEC នៅថ្ងៃម្សិលមិញ រដ្ឋមន្រ្តីថាមពលអ៊ីរ៉ង់បានបញ្ជាក់រួចហើយថា នឹងគ្មានការបង្កើនការបូមប្រេងបន្ថែម ទៅតាមការចង់បានរបស់អារ៉ាប៊ី សាអូឌីតនោះ។
នៅក្នុងកិច្ចព្រមព្រៀងរបស់OPEC នៅចុងឆ្នាំ ២០១៦ នៅពេលក្រុមប្រទេសផលិតប្រេងសម្រេចថា ត្រូវកាត់បន្ថយការបូមប្រេង ដើម្បីធ្វើឲ្យតម្លៃប្រេងឆៅកើនឡើងវិញ នៅទីផ្សារ អ៊ីរ៉ង់ ជាប្រទេសតែមួយ ដែលត្រូវបានគេអនុញ្ញាតឲ្យបន្ត បង្កើនការបូមប្រេង។ នយោបាយយោគយល់ដល់អ៊ីរ៉ង់ ធ្វើឡើងនៅក្នុងបរិបទដែលអ៊ីរ៉ង់ ទើបបានចុះបានកិច្ចព្រមព្រៀងនុយក្លេអ៊ែរអន្តរជាតិ ដែលបានជួយឲ្យអ៊ីរ៉ង់រួចផុតពីទណ្ឌកម្មសេដ្ឋកិច្ចពីសហគមន៍អន្តរជាតិ និងជាពិសេសពីអាមេរិក។ នៅពេលនោះ អ៊ីរ៉ង់បានជំរុញ វិស័យបូម និងនាំចេញប្រេង ដែលធ្លាប់រាំងស្ទះ ដោយសារតែទណ្ឌកម្មសេដ្ឋកិច្ចរបស់អាមេរិក។
ប៉ុន្តែ នៅក្នុងបរិបទថ្មី ពោលគឺ អ៊ីរ៉ង់ដែលត្រលប់ទៅជាប់ស៊ង ជាថ្មី នៃទណ្ឌកម្មមសេដ្ឋកិច្ចរបស់លោកដូណាល់ ត្រាំ អ៊ីរ៉ង់ នឹងមិនអាចចំណេញបានច្រើនដែរ ទោះជាអ៊ីរ៉ង់ ត្រូវបង្កើនការផលិតប្រេង។ ដោយសារតែខ្លាចជាប់ទណ្ឌកម្មរបស់អាមេរិក គ្មានប្រទេសណា ក្រុមហ៊ុនណាហ៊ានទិញប្រេងអ៊ីរ៉ង់នោះទេ។
នៅក្នុងរឿងបង្កើន ការផលិតប្រេង នេះ មិនមែនមានតែអ៊ីរ៉ង់ម្នាក់ទេ ដែលប្រឆាំងមិនចង់ឲ្យគេបង្កើនការផលិតប្រេងឡើងវិញ ដែលអាចជាដើមហេតុ ធ្វើឲ្យតម្លៃប្រេងចុះថ្លៃនោះ។ អ៊ីរ៉ាក់ និងវេណេស៊ុយអេឡា ដែលជាប្រទេសផលិតប្រេងសំខាន់មួយដែរ ក៏ឈរនៅខាងអ៊ីរ៉ង់ ដែរ។ អ៊ីរ៉ាក់កំពុងមានសេដ្ឋកិច្ចអូសជើង ដោយសារសង្រ្គាម ត្រូវការចង់ឲ្យប្រេងនៅមានតម្លៃខ្ពស់។ ចំណែកវេណេស៊ុយអេឡា ត្រូវបង្ខំចិត្ត កាត់បន្ថយការផលិតប្រេង ដោយសារតែគ្មានអ្នកទិញ ដោយសារនយោបាយដាក់ទណ្ឌកម្មរបស់អាមេរិក។
ជារួមអ៊ីរ៉ង់ អ៊ីរ៉ាក់ ហើយនិងវេណេស៊ុយអេឡា ដែលមានអាចបញ្ចេញប្រេងទៅលក់ ដោយមានកំណត់ នៅទីផ្សារអន្តរជាតិ ដោយសារតែទណ្ឌកម្មរបស់អាមេរិក នឹងខាតបង់ប្រាក់ចំណូល ច្រើន ដោយសារប្រេងអាចចុះថោក នៅពេលទីផ្សារប្រេងមានតម្រូវការតិចជាងការផ្គត់ផ្គង់។ ដោយសារតែមិនចំណេញ គឺមានតែការខាតបង់ ទើបបានជាប្រទេសទាំងបី មិនគាំទ្រ ចង់ឲ្យ OPEC បង្កើនការផលិតប្រេងឡើងវិញ។
សូមអាន៖ អាមេរិក៖ហេតុអ្វីបានជាតម្លៃប្រេងឆៅចាប់ផ្តើមឡើងថ្លៃ?
តើក្រុមប្រទេសផលិតប្រេង អាចរកបានកិច្ចព្រមព្រៀង ដើម្បីបង្កើនប្រេងដែរឬទេ?
បើសិនគ្មានការបោះឆ្នោតជាឯកច្ឆន្ទទេនោះ ក្រុមប្រទេសផលិតប្រេង នឹងមិនអាចចេញកិច្ចព្រមព្រៀងរួមបានទេ។ យ៉ាងណាក៏ដោយ គេវាយតម្លៃថា ទោះជាអ៊ីរ៉ង់ និងអារ៉ាប៊ី សាអូឌីត ជាសត្រូវដណ្តើមឥទ្ធិពលគ្នានៅតំបន់ដើមបូព៌ា ប៉ុន្តែ រឿងជំនួញ ត្រូវបានប្រទេសទាំងពីរដាក់ដោយឡែក មិនលាយឡំក្នុងជម្លោះភូមិសាស្រ្តនយោបាយនោះទេ។ នៅចុងឆ្នាំ ២០១៦ ទោះជាមានការប្រឆាំងពីអ៊ីរ៉ង់ក្តី ប៉ុន្តែ នៅទីបំផុត អង្គការក្រុមប្រទេសផលិតប្រេង OPEC ដែលមានអ៊ីរ៉ង់ជាសមាជិក បានបោះឆ្នោត អនុម័ត កិច្ចព្រមព្រៀងមួយ ដែលសម្រេចឲ្យកាត់បន្ថយការផលិតប្រេង។ លើកនេះ អ៊ីរ៉ង់នៅទីបំផុតអាចយល់ព្រម ឲ្យគេបង្កើនការផលិតប្រេងឡើងវិញ ប៉ុន្តែ អ៊ីរ៉ង់ទំនងជាទាមទារចង់ឲ្យគេសរសេរបញ្ជាក់ នៅក្នុងកិច្ចព្រមព្រៀងថា អាមេរិក ដែលត្រលប់មកដាក់ទណ្ឌកម្មសេដ្ឋកិច្ចលើអ៊ីរ៉ង់ គឺជាដើមហេតុ ធ្វើឲ្យតម្លៃប្រេងឡើងថ្លៃនៅទីផ្សារ។ ត្រង់ចំណុចនេះ អ៊ីរ៉ង់ចង់ឲ្យក្រុមប្រទេសផលិតប្រេងជួយចង្អុរមុខ រកអ្នកដែលធ្វើឲ្យតម្លៃប្រេងឡើងថ្លៃ នោះ គឺអាមេរិក។ គឺទណ្ឌកម្មរបស់អាមេរិក ទៅលើអ៊ីរ៉ង់ និងវេណេស៊ុយអេឡា ដែលធ្វើឲ្យការផ្គត់ផ្គង់ប្រេង ថយចុះ រហូតធ្វើឲ្យតម្លៃប្រេងនៅទីផ្សារ កើនឡើងយ៉ាងដូច្នេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ