បញ្ហាសិទ្ធិមនុស្សធ្វើឲ្យអារ៉ាប៊ី សាអូឌីតផ្ទុះវិបត្តិការទូតជាមួយកាណាដា
វិបត្តិការទូត កាណាដា និងអារ៉ាប៊ី សាអូឌីត កាន់តែធ្លាក់ធ្ងន់ធ្ងរ។ រដ្ឋាភិបាលកាណាដា នៅថ្ងៃចន្ទម្សិលមិញ បានប្រកាសរក្សា ជំហរ ការពារបញ្ហាសិទ្ធិមនុស្ស នៅអារ៉ាប៊ី សាអូឌីត និងបានទាមទារឲ្យក្រុងរីយ៉ាដ ពន្យល់ពីរឿងដែលឯកអគ្គរាជទូតកាណាដា ត្រូវបណ្តេញចេញ ពីប្រទេសអារ៉ាប៊ី សាអូឌីត។ ជំហរមិនផ្លាស់ប្តូរ របស់កាណាដា បានធ្វើឲ្យអារ៉ាប៊ី សាអូឌីតដែចោទប្រកាន់កាណាដាថា បានលូកដៃជ្រៀតជ្រែកចូលក្នុងកិច្ចការផ្ទៃក្នុងរបស់ខ្លួន ប្រកាសចាត់វិធានការបន្ថែម ថ្មី ប្រឆាំង កាណាដា ពីលើការប្រកាសផ្អាកព្យួរ ការដោះដូរពាណិជ្ជកម្មថ្មីៗរវាងប្រទេសទាំងពីរ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣២
ភាពតានតឹងការទូត ដ៏ធ្ងន់ធ្ងរ មិនធ្លាប់មានរវាងកាដាណា និងអារ៉ាប៊ី សាអូឌីត កាន់តែធ្លាក់ចុះអាក្រក់ មួយកម្រិតទៀត បន្ទាប់ពីកាណាដា នៅល្ងាចថ្ងៃចន្ទម្សិលមិញ បានបញ្ជាក់ ជំហរ មិនផ្លាស់ប្តូររបស់កាណាដា ក្នុងរឿងទាមទារឲ្យមានការគោរពសិទ្ធិមនុស្សនៅប្រទេសអារ៉ាប៊ី សាអូឌីត។ ឆ្លើយទៅនឹងអ្នកកាសែត នៅទីក្រុងអូតាវ៉ា រដ្ឋមន្រ្តីការបរទេសកាណាដា លោកស្រី Chrystia Freelandប្រតិកម្មជាលើកទី១ នៅក្រោយការបណ្តេញឯកអគ្គរាជទូតកាណាដាពីប្រទេសអារ៉ាប៊ី សាអូឌីតថា កាណាដានៅតែការពារជានិច្ចសិទ្ធិមនុស្ស សិទ្ធិស្រ្តី នៅក្នុងពិភពលោក។
កាលពីថ្ងៃចន្ទ រដ្ឋាភិបាលអារ៉ាប៊ី សាអូឌីតបានធ្វើឲ្យគេភ្ញាក់ផ្អើលខ្លាំង ដោយបានប្រកាសបណ្តេញឯកអគ្គរាជទូត កាណាដា ឲ្យចាកចេញពីទឹកដីរបស់ខ្លួន ក្នុងរយៈពេល ២៤ម៉ោង។ ការសម្រេចចិត្តយ៉ាងដូច្នេះរបស់អារ៉ាប៊ី សាអូឌីត ធ្វើឡើងនៅក្រោយ ឯកអគ្គរាជទូតរបស់កាណាដា ប្រចាំក្រុងរីយ៉ាដ នៅក្នុងសារTwitter បានសំដែងការព្រួយបារម្ភពីការចាប់ខ្លួនកាន់តែច្រើនសកម្មជនការពារសិទ្ធិមនុស្សនៅប្រទេសអារ៉ាប៊ី សាអូឌីត។
នៅក្នុងសេចក្តីថ្លែងការណ៍ដែលត្រូវបានអានតាមទូរទស្សន៍រដ្ឋ រដ្ឋមន្រ្តីការបរទេសអារ៉ាប៊ីសាអូឌីតបានបញ្ជាក់ថា រាជាណាចក្រប្រកាន់ជំហរមិនជ្រៀតជ្រែកក្នុងកិច្ចការផ្ទៃក្នុងរបស់ប្រទេសដទៃ។ ដូច្នេះ ប្រទេសផ្សេងទៀត ក៏មិនត្រូវលូកដៃ ក្នុងកិច្ចការផ្ទៃក្នុង ហើយឈឺឆ្អាលក្នុងទំនាក់ទំនងរវាងប្រជាជន ហើយនិងរដ្ឋាភិបាលអារ៉ាប៊ីសាអូឌីតដែរ។
នៅក្រោយការប្រកាសបណ្តេញឯកអគ្គរាជទូតកាណាដា អារ៉ាប៊ី សាអូឌីតបានកោះហៅ អ្នកតំណាងរបស់ខ្លួន នៅកាណាដា ឲ្យត្រលប់ចូលប្រទេសវិញ និងបានប្រកាសផ្អាកព្យួរ ការដោះដូរពាណិជ្ជកម្ម និងការវិនិយោគ ជាមួយកាណាដា។ ក្រុមហ៊ុនអាកាចរណ៍អារ៉ាប៊ី សាអូឌីត វិញបានសម្រេចផ្អាកជើងហោះរបស់ខ្លួនទៅទីក្រុងអូតាវ៉ា។ បន្ថែមពីលើការផ្អាកព្យួរ ការដោះដូរពាណិជ្ជកម្មជាមួយកាណាដា ដោយសារតែវិបត្តិការទូតលើកនេះ ទីក្រុងរីយ៉ាដ បានប្រកាសផងដែរ កាត់ផ្តាច់អាហារូបករណ៍រដ្ឋាភិបាលសម្រាប់និស្សិតអារ៉ាប៊ី សាអូឌីត នៅប្រទេសកាណាដា។ នៅថ្ងៃចន្ទ ប្រតិកម្មទៅនឹងកាណាដា ដែលមិនព្រម ផ្លាស់ប្តូរជំហររបស់ខ្លួន ក្នុងរឿងរិះគន់បញ្ហាសិទ្ធិមនុស្ស នៅអារ៉ាប៊ីសាអូឌីត ប្រទេសមហាសេដ្ឋីប្រេង បានអំពាវនាវឲ្យជនជាតិរបស់ខ្លួន ប្តូរសាលារៀន ទៅប្រទេសផ្សេងពីកាណាដា។
អ្នកជំនាញខាងតំបន់បូព៌ា លោក Thomas Juneauបានវាយតម្លៃថា វិបត្តិការទូត លើកនេះ នឹងផ្តល់ផលអាក្រក់តិចតួចព្រោះថា ការដោះដូរពាណិជ្ជកម្មកាណាដា និងអារ៉ាប៊ី សាអូឌីត មានតម្លៃត្រឹមតែ ជាង ៣ពាន់លានដុល្លារ ប៉ុណ្ណោះ កាលពីឆ្នាំមុន។ ប៉ុន្តែ កាណាដា នឹងអាចខាតបង់សេដ្ឋកិច្ចធ្ងន់ធ្ងរ បើសិន អារ៉ាប៊ី សាអូឌីត សម្រេចលុបចោលទៅវិញ កិច្ចព្រមព្រៀងទិញរថពាសដែក ធុនស្រាលកាណាដាតម្លៃ ១៥ពាន់លានដុល្លារ ដែលកាណាដា និងអារ៉ាប៊ី សាអូឌីត បានចុះរួចហើយ ជាមួយគ្នា កាលពីឆ្នាំ ២០១៤។
នេះមិនមែនជាលើកទី១ទេ ដែលអារ៉ាប៊ី សាអូឌីត ប្រតិកម្ម ឆេះដុំខ្លាំង នៅចំពោះមុខការរិះគន់ពីរដ្ឋាភិបាលប្រទេសលោកខាងលិច ជុំវិញ បញ្ហារំលោភសិទ្ធិមនុស្សនៅអារ៉ាប៊ី សាអូឌីត។ កាលពីខែ ឧសភាឆ្នាំនេះ រាជបុត្រស្នងរាជ្យម៉ូហាមេដ បិន សាលម៉ាន បានបញ្ជាឲ្យផ្អាកព្យួរ ការចរចាជាមួយ ក្រុមហ៊ុនអាល្លឺម៉ង់ នៅក្រោយក្រុងប៊ែរឡាំងរិះគន់អារ៉ាប៊ី សាអូឌីតក្នុងរឿងប្រទេសលីបង់។ ដោយសារតែបញ្ហាសិទ្ធិមនុស្សដូចគ្នានេះ អារ៉ាប៊ី សាអូឌីត កាលពីឆ្នាំ ២០១៥ ធ្លាប់មានភាពតានតឹងការទូតខ្លាំងម្តងដែរ ជាមួយរដ្ឋាភិបាលស៊ុយអែត។ សម្រាប់អ្នកជំនាញរបស់វិទ្យាស្ថានវិបត្តិអន្តរជាតិ ការបណ្តេញមន្រ្តីទូត ហើយនិងផ្អាកព្យួរការដោះដូរពាណិជ្ជកម្មជាមួយកាណាដា មិនមែនជាវិធានការត្រឹមត្រូវនោះទេ បើសិនអារ៉ាប៊ី សាអូឌីត ចង់បើកទ្វារ ទាក់ទាញអ្នកវិនិយោគទុនបរទេស នោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ