អាមេរិកនឹងមានកងទ័ពអវកាសនៅឆ្នាំ២០២០
កងទ័ពអវកាសដែលលោកដូណាល់ ត្រាំ ចង់បាន នឹងកើតចេញជារូបរាង ចាប់ពីឆ្នាំ២០២០ទៅ។ នេះបើតាមសេចក្តីប្រកាសរបស់លោកអនុប្រធានាធិបតី ដោយបញ្ជាក់ថា កងទ័ពអវកាស “Space Force” នេះនឹងក្លាយទៅជាស្ថាប័នកងទ័ពទី៦របស់អាមេរិក មិនស្ថិតនៅក្រោមចំណុះស្ថាប័នកងទ័ពជើងអាកាស Us Air Forceទេ។ គម្រោងបង្កើតទ័ពអវកាសជាចម្លើយតបទៅនឹងការវិវឌ្ឍន៍ផ្នែកបច្ចេកវិទ្យាអវកាសដែលជាអាទិភាពមួយរបស់លោក ត្រាំ ប៉ុន្តែសភាអាមេរិកមិនប្រាកដថាយល់ស្របតាមសេតវិមានឡើយ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២២
បច្ចុប្បន្ននេះអាមេរិកមានកងទ័ព៥ផ្នែក ៖ ទ័ពជើងគោក ជើងទឹក(ម៉ារីន) ជើងអាកាស ទ័ពនាវិកឡើងគោក និងទ័ពឆ្មាំសមុទ្ទ។ នៅពីរឆ្នាំ ទៀតខាងមុខ អាមេរិកនឹងមានទ័ពថ្មីមួយបន្ថែមទៀត គឺទ័ពអវកាស។ គ្រាន់តែចាប់បង្កើតភ្លាម មានសេចក្តីជូនដំណឹងជាសាធារណៈភ្លែត។ អ្នកគាំទ្រលោកត្រាំ បានទទួលសារអ៊ីមែលមួយ ឱ្យជួយជ្រើសរើសស្លាកសញ្ញាមួយក្នុងចំណោមសំណើទាំង៦ សម្រាប់មកធ្វើជាតំណាងស្ថាប័នកងទ័ពអវកាស។
“សភាត្រូវចាត់ចែងបង្កើតនាយកដ្ឋានថ្មីសម្រាប់រៀបចំ បង្ហាត់ និងបង្កើតក្រុម ទ័ពអវកាសរបស់សហរដ្ឋអាមេរិក !” នេះបើតាមប្រសាសន៍របស់លោកអនុប្រធានាធិបតី ក្នុងបទអន្តរាគមន៍ នៅមន្ទីរបញ្ចកោណ កាលពីថ្ងៃព្រហស្បតិ៍ម្សិលមិញ។ សម្រាប់លោក អនុប្រធានាធិបតី គម្រោងនេះជាការបញ្ជាក់អំពីមហិច្ឆតារបស់លោកដូណាល់ត្រាំ។ ប៉ុន្តែ ការដែលអាមេរិកចង់ត្រួតត្រាអវកាស ក៏ព្រោះតែដើម្បីការពារខ្លួន ជាចំបង។ សុវត្ថិភាពផ្កាយរណប បានក្លាយជាវិញ្ញាសាចោទខ្លាំង ហើយចិននិងរុស្ស៊ីទំនងកំពុងចង់រករឿង និងចង់ចាញ់ចង់ឈ្នះអាមេរិកលើវិស័យអវកាសណាស់។ « គូប្រជែងយើងបានប្រែក្លាយអវកាសទៅទីលានប្រយុទ្ធរួចទៅហើយ” ! នេះជាការគូបញ្ជាក់បន្ថែមរបស់លោក Mike Pence។
ប៉ុន្តែក្រសួងការពារជាតិអាមេរិកនៅស្ទាក់ស្ទើរចិត្តឡើយចំពោះគម្រោងស្នើឡើងដោយសេតវិមាន។ រហូតមកទល់ពេលនេះ គឺកងទ័ពអាកាស US Air Force ជាអ្នកគ្រប់គ្រងវិស័យអវកាស។ ឥលូវផ្នែកអវកាសត្រូវបង្កើត ទៅជានាយកដ្ឋានថ្មី ទី៦ មានអគ្គបញ្ជាការថ្មី ទទួលបន្ទុកដាច់ដោយឡែក យ៉ាងដូច្នេះមិនមែនជាការងាយឡើយ។
ខាងសភា បានផ្តល់កំណត់សម្គាល់ថា ការបង្កើតនាយកដ្ឋានថ្មី ជាចំណាយរដ្ឋបាលច្រើនខ្លាំងអនេក ដែលគេអាចបញ្ចៀសបាន។ ដូច្នេះមុននឹងអាចបញ្ជូនកងទ័ពទៅដល់ភពអង្គារ Space Force ត្រូវការបញ្ចុះបញ្ចូលសភាសិន។
សហរដ្ឋអាមេរិក ជាប្រទេសហត្ថលេខីនៃសន្ធិសញ្ញាអវកាសឆ្នាំ ១៩៦៧។ សន្ធិសញ្ញា បានហាមឃាត់មិនឱ្យមានការប្រើប្រាស់អាវុធប្រល័យលោកនៅក្នុងអវកាសទេ តែអនុញ្ញាតឱ្យទៅធ្វើអាណានិគមនៅលើភពព្រះចន្ទ ព្រមទាំងភពផ្សេងទៀត ដើម្បីជាប្រយោជន៍បែបសន្តិវិធី។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ