សហរដ្ឋអាមេរិកបង្កើតស្ថាប័នត្រួតពិនិត្យការដាក់ទណ្ឌកម្មលើអ៊ីរ៉ង់
ប្រមុខការទូតអាមេរិក លោក Make Pompeo បានប្រកាសនៅថ្ងៃព្រហស្បតិ៍នេះ បង្កើតក្រុមការងារថ្មីមួយស្តីពីអ៊ីរ៉ង់។ ជាការក្រុមការងារដែលមានបន្ទុកត្រួតពិនិត្យការគោរពទណ្ឌកម្មសេដ្ឋកិច្ចរបស់សហរដ្ឋអាមេរិកដាក់លើក្រុងតេអេរ៉ង់ផង និងអាចចាត់ចែងដាក់ទណ្ឌកម្មរណបលើបណ្តាប្រទេសផ្សេងទៀត ដែលមិនគោរពតាមអាមេរិកផង។
ចុះផ្សាយនៅថ្ងៃ៖
ស្តាប់ - ០២:១២
ក្រុមការងារនេះនឹងត្រូវដឹកនាំដោយអន្តរការីពិសេស ឈ្មោះ លោក Brian Hook និងមានបន្ទុកដឹកនាំ វាយតម្លៃ និងសម្របសម្រួលលើគ្រប់សកម្មភាពរបស់គ្រប់ក្រសួងដែលមានពាក់ព័ន្ធនឹងការដាក់ទណ្ឌកម្មអ៊ីរ៉ង់។ នេះបើតាមសេចក្តីប្រកាសរបស់លោក មាយ ប៉ុមប៉េអូ ទៅកាន់អ្នកសារព័ត៌មាន។
កម្មវត្ថុរបស់ក្រុមការងារនេះ គឺធ្វើយ៉ាងណាឱ្យគ្រប់បណ្តាប្រទេសដទៃផ្សេងទៀត នាំគ្នាដាក់ទណ្ឌកម្មលើអ៊ីរ៉ង់ដូចអ្វីដែលលោកដូណាល់ ត្រាំ បានសម្រេចកាលពីខែឧសភាដកខ្លួនចេញពីកិច្ចព្រមព្រៀងនុយក្លេអ៊ែរអន្តរជាតិ ចុះហត្ថលេខាកាលពីឆ្នាំ២០១៥រវាងអ៊ីរ៉ង់ និងមហាអំណាចទាំង៥ព្រមទាំងអាល្លឺម៉ង់។
សម្រាប់លោក ប៉ុមបេអូ ក្រុមការងារថ្មីនេះនឹងមានទំនួលខុសត្រូវដាច់ខាតសម្រេចឱ្យបានជាមួយពិភពលោក រុញច្រានអ៊ីរ៉ង់ឱ្យប្តូរជំហរ ដោយត្រូវសហការយ៉ាងស្អិតល្មួតជាមួយនឹងសម្ព័ន្ធមិត្តនិងបណ្តាដៃគូរនៅលើពិភពលោកទាំងមូល។
សូមបញ្ជាក់ថា កាលពីដើមខែសីហា អាមេរិកបានប្រកាសដាក់ទណ្ឌកម្មអ៊ីរ៉ង់មួយខ្សែដំបូង ដោយបិទខ្ទប់ការផ្ទេរហិរញ្ញវត្ថុ និងការនាំចូលវត្ថុធាតុដើម ព្រមទាំងចំណាត់ការទណ្ឌកម្មលើវិស័យយានយន្ត ពាណិជ្ជកម្មដឹកជញ្ជូនផ្លូវអាកាស។ ទណ្ឌកម្មវគ្គទីពីរ នឹងចាប់ផ្តើមនៅខែវិច្ឆិកាខាងមុខ ដោយត្រូវកាត់បន្ថយការនាំចេញប្រេងកាតពីអ៊ីរ៉ង់ទៅកាន់ប្រទេសផ្សេងឱ្យចុះដល់កំរិតសូន្យនៅថ្ងៃទី ៤វិច្ឆិកាតែម្តង។ នេះបើតាមការបញ្ជាក់បន្ថែមរបស់លោកហុក ដោយអះអាងទៀតថា អាមេរិកក៏ត្រៀមខ្លួនជាស្រេចនឹងដាក់ទណ្ឌកម្មបន្ទាប់បន្សំទៀត លើបណ្តាប្រទេសណាដែលមិនគោរពតាមទណ្ឌកម្មអាមេរិក។
លោកដូណាល់ត្រាំបានប្រកាសដើរចេញពីកិច្ចព្រមព្រៀងនុយក្លេអ៊ែរជាឯកតោភាគី ឯអឺរ៉ុប ភាគីហត្ថលេខីនៃកិច្ចព្រមព្រៀងដែរ ប្រឆាំងជានិច្ចនឹងវិធានការរបស់អាំមេរិក។ ចំណាត់ការថ្មីរបស់អាមេរិកបែបនេះអាចនឹងធ្វើឱ្យមានភាពតានតឹងថ្មីជាមួយសម្ព័ន្ធមិត្ត។ ព្រោះតាមពាក្យលោកត្រាំ ប្រទេសណាចង់រកស៊ីជាមួយអ៊ីរ៉ង់ត្រូវអត់ជាមួយអាមេរិក។
ជាច្រើនច្រើនសាមកហើយដែលរដ្ឋាភិបាលលោកត្រាំ បានធ្វើគ្រប់យ៉ាងដើម្បីឱ្យអ៊ីរ៉ង់ប្តូរផ្លាស់ឥរិយាបថ និងបានធ្វើបញ្ជីដ៏វែង ឱ្យក្រុងតេអេរ៉ង់ធ្វើតាម ដូចជាត្រូវឈប់គាំទ្ររបបស៊ីរី ឈប់គាំទ្រពួកហេស្បូឡានៅលីបង់ និងបញ្ឈប់កម្មវិធីនុយក្លេអ៊ែរមីស៊ីល និងឈប់ចាប់ជនជាតិអាមេរិក។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ