ញូវយ៉កថែមស៍ ផ្សាយលិខិតវាយប្រហារលោកត្រាំ ដោយមិនបញ្ចេញឈ្មោះ
ប្រហែលពុំធ្លាប់កើតមានទេ ពីមុនមក ! នៅថ្ងៃពុធទី ៥កញ្ញា ម្សិលមិញ ញូវយ៉កថែមស៍ បានផ្សព្វផ្សាយលិខិតមួយ សរសេរដោយមន្ត្រីជាន់ខ្ពស់ក្នុងរដ្ឋការលោកដូណាល់ ត្រាំ ក្នុងទំព័រកាសែតរបស់ខ្លួន ដោយមិនបញ្ចេញឈ្មោះអ្នកនិពន្ធទេ។ ជាលិខិតវាយប្រហារលោកត្រាំ ជាមួយសេចក្តីពន្យល់ថាតើពួកគេប្រឹងតស៊ូប្រយុទ្ធ ផ្ទៃក្នុងយ៉ាងណាខ្លះ ប្រឆាំងទង្វើមិនត្រឹមត្រូវរបស់ប្រធានាធិបតីអាមេរិក។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៦
ក្រោមចំណងជើងថា « ខ្ញុំជាមនុស្សម្នាក់នៃចលនាតស៊ូក្នុងរដ្ឋការលោកត្រាំ » អ្នកនិពន្ធបានគូសបញ្ជាក់យ៉ាងច្បាស់ថា នេះមិនមែនជាសកម្មភាពគាំទ្របក្សប្រឆាំងទេ ប៉ុន្តែគឺដើម្បីការពារប្រទេស ប្រឆាំងនឹងឥរិយាបថរបស់ប្រធានាធិបតីទី ៤៥នៃសហរដ្ឋអាមេរិក ដែលប្រកាន់ស្ទីលដឹកនាំបែបមិនថ្លៃថ្នូ បែបច្រឡោត និង គ្មានប្រសិទ្ធភាព។ អ្នកនិពន្ធបានធានាថា លោកមិនមែនធ្វើតែម្នាក់ឯងទេ តែមានមន្ត្រីជាន់ខ្ពស់ក្នុងរដ្ឋបាល ជាច្រើននាក់ កំពុងស្ថិតក្នុងចលនាតស៊ូប្រឆាំងលោកត្រាំ។ ហើយជាលើកទីមួយ បើតាមការអះអាងរបស់អ្នកនិពន្ធនេះដដែល ដែលគណៈរដ្ឋមន្ត្រីនាំគ្នាលើកឡើងអំពីការដាក់ឱ្យដំណើរការជាយថាហេតុ បែបបទទម្លាក់ប្រធានាធិបតីពីបទអសមត្ថភាព។
“យើងមានកាតព្វកិច្ចការពារជាតិ តែប្រធានាធិបតីបន្តធ្វើសកម្មភាពបែបគ្រោះថ្នាក់ដល់ប្រទេសទៅវិញ ! ហេតុដូច្នេះហើយបានយើងប្រឹងធ្វើគ្រប់យ៉ាងដើម្បីការពារស្ថាប័នប្រជាធិបតេយ្យ ដោយត្រូវទប់ចរិតយ៉ាប់យឺនខ្លាំងរបស់លោកដូណាល់ ត្រាំ រហូតទាល់តែគ » នេះតាមសំណេរក្នុងលិខិតដដែល។
ការផ្សព្វផ្សាយសក្ខីកម្មនេះ ធ្លាក់មកតែមួយថ្ងៃក្រោយការផ្សព្វផ្សាយសម្រង់សៀវភៅរបស់អ្នកកាសែតស៊ើបអង្កេត Bob Woodward ដ៏ល្បីល្បាញ ដែលរៀបរាប់ថា ប្រធានាធិបតីអាមេរិកដូណាល់ត្រាំ ជាមនុស្សចិត្តស្រាល មមើមមាយដែលសហការីត្រូវប្រឹងត្រួតពិនិត្យ ឬបង្វែរបង្វៀងហេតុការណ៍ ដើម្បីបញ្ចៀសគ្រោះថ្នាក់។
ដោយគ្មានបង្អង់ និងដូចទម្លាប់ លោកដូណាល់ ត្រាំ បានបញ្ចេញប្រតិកម្មតាមទ្វីត ចោទសួរថាតើនេះជាទង្វើក្បត់ឬ ?! លោកប្រធានាធិបតីក៏បានបរិហារកាសែតញូវយ៉កថែមស៍ថាគ្មានភាពស្មោះត្រង់សោះ។ អ្នកនាំពាក្យសេតវិមានបានសម្តែងការខកចិត្តយ៉ាងខ្លាំង នៅចាត់ទុកការផ្សព្វផ្សាយរបស់កាសែតញូវយ៉កថែមស៍ ថាខ្វះការពិចារណា និងអាត្មានិយម។
ញូវយ៉កថែមស៍បានពន្យល់ថា សេចក្តីសម្រេចចិត្តដ៏កម្រផ្សាយអត្ថបទដោយមិនបញ្ចេញឈ្មោះធ្វើឡើងតាមសំណើរបស់អ្នកនិពន្ធ ដែលកាសែតស្គាល់អត្តសញ្ញាណយ៉ាងច្បាស់ និងយល់ថានេះជាមធ្យោបាយតែមួយគត់ដែលអនុញ្ញាតឱ្យអ្នកអានបានកត់សម្គាល់អំពីភាពសំខាន់នៃស្ថានការណ៍។
ការផ្សព្វផ្សាយដោយមិនបញ្ចេញឈ្មោះអ្នកនិពន្ធនេះ ក៏បានបង្កបង្កើតឱ្យមានសំណួរជាច្រើន និងការរិះគន់ក៏ច្រើន នៅក្នុងចំណោមសារព័ត៌មានធំៗរបស់អាមេរិករាប់ទាំងរង្វង់កាសែតញូវយ៉កថែមស៍ខ្លួនឯងផង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ