អាមេរិកច្រានចោលការចោទប្រកាន់របស់អ៊ីរ៉ង់ និងស្នើឲ្យអ៊ីរ៉ង់ឆ្លុះកញ្ចក់មើលខ្លួនឯង
នៅថ្ងៃអាទិត្យ ទី២៣ កញ្ញា សហរដ្ឋអាមេរិកតាមរយៈលោកស្រី Nikki Haley ឯកអគ្គរដ្ឋទូតអាមេរិកប្រចាំអង្គការសហប្រជាជាតិបានច្រានចោលការចោទប្រកាន់របស់ប្រទេសអ៊ីរ៉ង់ដែលថា អាមេរិកបានស្ថិតនៅពីក្រោយភេរវកម្មប្រឆាំងលើក្បួនព្យុះហយាត្រាកងទ័ពអ៊ីរ៉ង់កាលពីថ្ងៃសៅរ៍ ទី២២ កញ្ញា។ អំពើភេរវកម្មដែលបានផ្តាច់ជីវិតមនុស្សយ៉ាងតិច ២៩នាក់ និងរបួសធ្ងន់ស្រាលជិត ៦០នាក់ផ្សេងទៀត។ ទន្ទឹមនឹងការឆ្លើយបដិសេធ លោកស្រី Haley ក៏បានឆ្លៀតវាយបកប្រធានាធិបតីអ៊ីរ៉ង់លោករ៉ូហានីដោយស្នើលោករ៉ូហានីឲ្យសម្លឹងមើលបញ្ហាផ្ទៃក្នុងនៅអ៊ីរ៉ង់ជាជាងដើរទម្លាក់កំហុសដាក់អ្នកដទៃ។
ចុះផ្សាយនៅថ្ងៃ៖
ស្តាប់ - ០១:៥៩
នេះជាប្រតិកម្មលើកទី១ របស់សហរដ្ឋអាមេរិកទាក់ទងនឹងភេរវកម្មប្រឆាំងកងទ័ពអ៊ីរ៉ង់កាលពីថ្ងៃសៅរ៍ ទី២២ កញ្ញា។ ទោះបីជាអំពើភេរវកម្មនោះត្រូវបានប្រកាសទទួលស្គាល់ដោយអង្គការរដ្ឋអ៊ីស្លាមក៏ដោយ ក៏រដ្ឋាភិបាលទីក្រុងតេហេរ៉ង់បន្តចង្អុលមុខចលនាទាមទារផ្តាច់ទឹកដីនិយមអារ៉ាប់មួយក្នុងស្រុកដែលគាំទ្រដោយក្រុមប្រទេសអារ៉ាប់មួយចំនួននៅក្នុងតំបន់។ មុននឹងឡើងយន្តហោះទៅចូលរួមមហាសន្និបាតអង្គការសហប្រជាជាតិក្នុងទីក្រុងញូយ៉ក លោកប្រធានាធិបតីអ៊ីរ៉ង់រ៉ូហានីបានថ្លែងជាថ្មីដោយបញ្ជាក់ថា សហរដ្ឋអាមេរិកបានជួយគាំទ្រ និងលើកទឹកចិត្តដល់ក្រុមប្រទេសអារ៉ាប់មួយចំនួននៅក្នុងតំបន់ឲ្យបង្កភាពវឹកវរ និងអសន្តិសុខនៅក្នុងទឹកដីអ៊ីរ៉ង់។
« ខ្ញុំគិតថាអ្វីដែលរ៉ូហានីត្រូវធ្វើ គឺត្រូវសម្លឹងមើលក្នុងប្រទេសរបស់ខ្លួន។ គាត់កំពុងប្រឈមនឹងការងើបបះបោររបស់ពលរដ្ឋអ៊ីរ៉ង់។ សូម្បីលុយ ១សេនដែលអ៊ីរ៉ង់ទទួលបានត្រូវបានយកទៅចិញ្ចឹមបំប៉នកងទ័ព។ រ៉ូហានីបានធ្វើបាបពលរដ្ឋតាំងពីយូរមកហើយ » នេះជាការឆ្លើយបកវិញរបស់លោកស្រីឯកអគ្គរដ្ឋទូតអាមេរិកប្រចាំអង្គការសហប្រជាជាតិ Nikki Haley នៅក្នុងបទសម្ភាសន៍ជាមួយទូរទស្សន៍ CNN។ តាមលោកស្រី Haley ពលរដ្ឋអ៊ីរ៉ង់ហាក់បានឆ្អែតឆ្អន់នឹងរបបដឹកនាំសព្វថ្ងៃ ហើយដែលនេះជាចំណុចចាប់ផ្តើមនៃបញ្ហា។ « រ៉ូហានីអាចចោទអាមេរិកប៉ុន្មានដងក៏ស្រេចនឹងគាត់ទៅចុះ តែអ្វីដែលរូបគាត់ត្រូវធ្វើ គឺត្រូវឆ្លុះកញ្ចក់មើលខ្លួនឯង » នេះជាការបន្ថែមរបស់លោកស្រី Haley។
ទោះជាយ៉ាងនេះក្តី ឯកអគ្គរដ្ឋទូតអាមេរិកប្រចាំអង្គការសហប្រជាជាតិរូបនេះដដែលបានបញ្ជាក់ជាថ្មីដោយធានាថា រដ្ឋបាលអាមេរិករបស់លោកដូណាល់ ត្រាំមិនបានព្យាយាមធ្វើការផ្លាស់ប្តូររបបដឹកនាំនៅអ៊ីរ៉ង់សព្វថ្ងៃទេ។ ក្រៅពីវាយបកនឹងការចោទប្រកាន់របស់អ៊ីរ៉ង់ និងដោយមិននិយាយចំលើភេរវកម្មនៅក្នុងប្រទេសអ៊ីរ៉ង់ លោកស្រី Haley មិនភ្លេចថ្លែងទេថា អាមេរិកថ្កោលទោសលើគ្រប់អំពើភេរវកម្មទាំងអស់ ទោះនៅទីណាក៏ដោយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ