អាមេរិករងគ្រោះព្យុះសង្ឃរាជាថ្មី និងកំណាចខ្លាំងជាងមុន
Michael ជាព្យុះសង្ឃរាដ៏មហាកំណាចបំផុត បើគិតក្នុងរយៈពេលជាង៨០ឆ្នាំចុងក្រោយនេះ និងជាព្យុះដ៏សែនកំណាចទីបី ដែលអាមេរិកបានជួបប្រទះនៅលើទឹកដីរបស់ខ្លួន។ Michael បានបោកបក់មួយទំហឹង នាំទឹកភ្លៀង ទៅចាក់លើភាគពាយ័ព្យនិងតំបន់ឆ្នេររបស់រដ្ឋFlorida បង្កឱ្យមានទឹកជំនន់ និងការហិនហោចយ៉ាងដំណំ ព្រមទាំងបានសម្លាប់ជីវិតមនុស្សអស់ម្នាក់ផង។
ចុះផ្សាយនៅថ្ងៃ៖ កែប្រែថ្ងៃទី៖
រូបភាពនៃមហន្តរាយដ៏គួរឱ្យរន្ធត់បានបង្ហោះក្នុងប្រព័ន្ធសង្គម និងតាមកញ្ចក់ទូរទស្សន៍ ជាបន្តបន្ទាប់ ! ក្រុងឆ្នេរសមុទ្ទ Panama City Mexico Beach នៃរដ្ឋហ្វ្លរីដា សាងសង់ស្មើនឹងកំរិតកំពស់ទឹកសមុទ្ទ បានត្រូវព្យុះសង្ឃរាMichael ឈូសបាត់ ! ផ្ទះនៅបបមាត់ទឹក ត្រូវលិចដល់ដំបូល។ នៅតាមផ្លូវ គេឃើញសល់តែជញ្ជាំងធ្លុះធ្លាយ ព្រោះកម្លាំងខ្យល់បានបោកបក់យកទៅអស់។ ព្យុះMichael បានមកដល់ជ្រោយអាមេរិកលឿនហួសពីការព្រៀងទុក និងក្នុងល្បឿន ២៥០គីឡូម៉ែត្រក្នុងមួយម៉ោង ជាហេតុធ្វើឱ្យប៉ើងខ្ទេចប៉ើងខ្ទី ដើមឈើរលើងឬសដួល រថយន្តក្រឡាប់គគ្នាត្រៀបត្រា ... កម្ពស់ទឹកបានឡើង៤,៣ម៉ែត្រលើកំរិតធម្មតា
ថ្វីបើអាជ្ញាធរបានចាត់វិធានការការពារត្រៀមជាមុន បញ្ចេញពលទាហានប្រមាណ៣៥០០នាក់ ដើម្បីជួយជម្លៀសប្រជាជនជាងពីរលានមួយសែននាក់ទៅកាន់ទីមានសុវត្ថិភាព បួនពាន់នាក់ត្រៀមអាសន្នចាំជួយតាមផ្លូវ តាំងពីថ្ងៃចន្ទហើយក្តី ប៉ុន្តែអាជ្ញាធរនៅតែស្លន់ខ្លាំងនៅចំពោះមុខភាពកំណាចរបស់ព្យុះMichael ដែលកាលពីថ្ងៃអាទិត្យមុននេះ មានទម្រង់ជាព្យុះត្រូពិកទេ។ តែបានប្រែរាងទៅជាព្យុះកំណាចខ្លាំងឡើងៗ ក្លាយជាព្យុះសង្ឃរាកំរិត៣ រួច៤ ក្នុងចំណាត់ថ្នាក់ព្យុះសង្ឃរា៥កំរិត នៅពេលមកដល់ដីហ្វ្លរីដា។ ៨ម៉ោងក្រោយប៉ះតំបន់ដីគោក Michaelបន្តបោកបក់ខ្លាំងក្នុងល្បឿន១៥០គីឡូម៉ែត្រក្នុងមួយម៉ោង។
សម្រាប់ពេលនេះ Michael ត្រូវបានគេចាត់ទុកជាព្យុះសង្ឃរាដ៏កំណាចបំផុតគិតចាប់តាំងពីឆ្នាំ ១៩៣៨ និងបន្ទាប់ពីព្យុះសង្ឃរាកាមីយ កាលពីឆ្នាំ១៩៦៩មក។ ពលរដ្ឋជម្លៀសខ្លួនដែលចង់អំពីស្ថានភាពខូចខាតផ្ទះសម្បែងរបស់ខ្លួន មិនទាន់បានទទួលការអនុញ្ញាតឱ្យវិលត្រលប់ចូលវិញទេ ព្រោះមិនទាន់កម្ទេចបំណែក។ សាលារៀន សាកលវិទ្យាល័យ នឹងត្រូវបិទទ្វាររហូតដល់ចុងសប្តាហ៍។ លោកប្រធានាធិបតី ដូណាល់ ត្រាំ បានប្រកាសដាក់ហ្វ្លរីដាក្នុងភាពអាសន្ន និងសន្យាចុះជួបពលរដ្ឋរងគ្រោះផ្ទាល់នៅថ្ងៃអាទិត្យឬយ៉ាងយូរថ្ងែចន្ទខាងមុខ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ