លោកដូណាល់ ត្រាំ៖« ខ្ញុំមិនទុកឲ្យចិន និងរុស្ស៊ីយកលុយពីអារ៉ាប៊ីសាអូឌីតទេ »
នៅសហរដ្ឋអាមេរិក លោកដូណាល់ ត្រាំបានរម្លឹកជាថ្មីនាថ្ងៃព្រហស្បតិ៍ ទី១១ តុលាពីការចង់ដឹងរឿងរ៉ាវពិតជុំវិញការបាត់ខ្លួនអ្នកកាសែតជនជាតិអារ៉ាប៊ីសាអូឌីតលោកហ្សាម៉ាល់ ខាស្ហូហ្ស៊ីតាំងពីថ្ងៃទី២ តុលាក្នុងទីក្រុងអ៊ីស្តង់ប៊ូល ប្រទេសតួកគី។ « យើងនឹងធ្វើការសិក្សាលើបញ្ហានេះឲ្យបានល្អិតល្អន់ជាទីបំផុត។ ខ្ញុំមិនចូលចិត្តរឿងរ៉ាវបែបនេះទាល់តែសោះ » នេះជាការបញ្ជាក់ជាថ្មីរបស់លោកត្រាំ។ តាមលោកត្រាំ ក្រុមអ្នកស៊ើបអង្កេតអាមេរិកកំពុងធ្វើការជាមួយប្រទេសតួកគី និងអារ៉ាប៊ីសាអូឌីតដើម្បីដឹងស្វែងរកការពិតជុំវិញការបាត់ខ្លួនលោកហ្សាម៉ាល់។ តែទោះជាយ៉ាងនេះក្តី លោកត្រាំហាក់មិនចង់និយាយដល់ការលុប ឬព្យួរកុងត្រាអាវុធរ៉ាប់ពាន់លានដុល្លារដែលអាមេរិកមានជាមួយអារ៉ាប៊ីសាអូឌីតទេ។ សម្រាប់លោកត្រាំ អាមេរិកមិនអាចទុកឲ្យចិន និងរុស្ស៊ីយកលុយពីអារ៉ាប៊ីសាអូឌីតជំនួសអាមេរិកឡើយ។
ចុះផ្សាយនៅថ្ងៃ៖
ស្តាប់ - ០១:១៤
« ខ្ញុំមិនមែន និងគ្មានបំណងណាមួយដើម្បីទៅរារាំងប្រទេសមួយដែលបានចំណាយលុយរាប់សិបពាន់លានដុល្លារដែលជាទឹកប្រាក់ដ៏សម្បើមអស្ចារ្យ ហើយបែរជាទុកឲ្យប្រទេសរុស្ស៊ី និងប្រទេសចិនជាអ្នកប្រមូលយកលុយទាំងអស់នោះទេ។ ប្រទេសអារ៉ាប៊ីសាអូឌីតចំណាយលុយចំនួន ១១០ ០០០លានដុល្លារដើម្បីទិញគ្រឿងសព្វាវុធ និងសម្ភារៈបរិក្ខារយោធា និងទិញរបស់របរជាច្រើនផ្សេងទៀតរបស់អាមេរិក។
ខ្ញុំមិនចូលចិត្តលើគំនិតដែលចង់ឲ្យមានការលប់ចោលកុងត្រាវិនិយោគក្នុងទឹកប្រាក់ដល់ទៅ ១១០ ០០០លានដុល្លារដែលអាមេរិកមានជាមួយអារ៉ាប៊ីសាអូឌីតឡើយ។ ហេតុផលគឺសាមញ្ញ អារ៉ាប៊ីសាអូឌីតនឹងងាកទៅចាយវាយជាមួយរុស្ស៊ី និងចិនវិញ។ បើយើងជ្រើសយកផ្លូវលុប ឬព្យួរកុងត្រាជាមួយអារ៉ាប៊ីសាអូឌីត អារ៉ាប៊ីសាអូឌីតប្រាកដជានិយាយថា OK យើងឈប់ទិញពីក្រុមហ៊ុនអាមេរិក Boeing ឬពីក្រុមហ៊ុន Lokeed ហើយទៅទិញពីរុស្ស៊ី និងពីចិនវិញម្តង។
ដូច្នេះសម្រាប់យើង តើនេះអាចជារឿងល្អទេ?។ គេពិតជាមានមធ្យោបាយ ឬផ្លូវផ្សេងដើម្បីដោះស្រាយបញ្ហា »៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ