លោកដូណាល់ ត្រាំ៖«អាមេរិកនឹងផ្តន្ទាទោសចាស់ដៃ បើរកឃើញថា អារ៉ាប៊ីសាអូឌីតជាអ្នកសម្លាប់លោកហ្សាម៉ាល់ ខាស្ហូហ្ស៊ី»
អស់រយៈពេលជាង ១០ថ្ងៃដែលអ្នកកាសែតជនជាតិអារ៉ាប៊ីសាអូឌីតលោកហ្សាម៉ាល់ ខាស្ហូហ្ស៊ីបានបាត់ខ្លួន បន្ទាប់ពីរូបគាត់បានចូលក្នុងស្ថានកុងស៊ុលអារ៉ាប៊ីសាអូឌីតប្រចាំទីក្រុងអ៊ីស្តង់ប៊ូល ប្រទេសតួកគី។ រឿងរ៉ាវមួយនេះកំពុងបន្តក្លាយជាបច្ចុប្បន្នភាពយ៉ាងក្តៅគគុករវាងតួកគី និងអារ៉ាប៊ីសាអូឌីត រួមទាំងរវាងអាមេរិក និងអារ៉ាប៊ីសាអូឌីត។ នៅថ្ងៃសៅរ៍ ទី១៣ តុលា ទីក្រុងអង់ការ៉ាបានសុំទីក្រុងរីយ៉ាដចូលឆែកឆេរក្នុងស្ថានកុងស៊ុល តែអារ៉ាប៊ីសាអូឌីតមិនឆ្លើយអ្វីទាំងអស់។ រីឯនៅអាមេរិក លោកដូណាល់ ត្រាំបានបញ្ជាក់ច្បាស់ៗថា បើអារ៉ាប៊ីសាឌីតពិតជាអ្នកនៅពីក្រោយការបាត់ខ្លួនលោកស្ហូហ្ស៊ីមែន នោះនឹងមានការផ្តន្ទាទោសចាស់ដៃ។ ចម្លើយរបស់លោកត្រាំបានធ្វើឡើងនៅក្នុងបទសម្ភាសន៍មួយនាថ្ងៃសៅរ៍ ទី១៣ តុលា។
ចុះផ្សាយនៅថ្ងៃ៖
ស្តាប់ - ០១:៤៥
« នៅពេលនេះ រដ្ឋអំណាចអារ៉ាប៊ីសាអូឌីតបានឆ្លើយបដិសេធ គឺបដិសេធយ៉ាងដាច់អហង្ការតែម្តង។ អ៊ីចឹងសួរថា តើអាចជាស្នាដៃរបស់អារ៉ាប៊ីសាអូឌីតមែន ឬ? ពិតជាមែន។ ខ្ញុំគិតថានៅក្នុងពេលដ៏ខ្លីខាងមុខ គេនឹងអាចដឹងការពិតជុំវិញរឿងរ៉ាវមួយនេះជាមិនខាន។
ពិតណាស់ តែវាស៊ីសងថាតើទណ្ឌកម្មប្រភេទណា?។ ខ្ញុំឲ្យឧទាហរណ៍មួយ រដ្ឋាភិបាលអារ៉ាប៊ីសាអូឌីតបានកម្ម៉ង់ទិញគ្រឿងសព្វាវុធ និងសម្ភារៈបរិក្ខារយោធា ហើយប្រទេសផ្សេងចង់ទទួលបានកុងត្រាមួយនេះពីអារ៉ាប៊ីសាអូឌីត។ ប្រទេសរុស្ស៊ីក៏ចង់បាន ចិនក៏ចង់បាន ហើយយើងក៏ចង់បានដែរ។ ទីបំផុត អាមេរិកទទួលបានកុងត្រាមួយនេះ ហើយយើងទទួលបានផ្តាច់មុខតែម្នាក់ឯង ក្រុមហ៊ុន Boeing ក្រុមហ៊ុន Lokeed។
ខ្ញុំមិនចង់ឲ្យអាមេរិកបាត់បង់ការងារ ហើយខ្ញុំក៏មិនចង់លះបង់កុងត្រាដែលមានទឹកប្រាក់ដ៏សម្បើមមួយនេះដែរ។ តើអ្នកដឹងទេថា មានវិធីសាស្រ្តផ្សេងដើម្បីពិន័យ។ ពិតហើយ ពិន័យជាពាក្យធ្ងន់ធ្ងរណាស់។ ការបាត់ខ្លួនលោកហ្សាម៉ាល់ ខាស្ហូហ្ស៊ីមានបង្កប់ដោយរឿងច្រើន ពិសេសប្រហែលដោយសារតែរូបគាត់ជាអ្នកកាសែតម្នាក់។ អ្វីដែលខ្ញុំបាននិយាយអាចនឹងធ្វើឲ្យអ្នកភ្ញាក់ផ្អើល ក៏ប៉ុន្តែ បើអារ៉ាប៊ីសាអូឌីតពិតជាអ្នកនៅពីក្រោយការបាត់ខ្លួនអ្នកកាសែតអារ៉ាប៊ីសាអូឌីតរូបនោះមែន នេះពិតជារឿងមួយគួរឲ្យខ្លាច និងមិនអាចអត់ឱនឲ្យបានទេ។
អ៊ីចឹងគេត្រូវរង់ចាំមើល គេត្រូវតាមដានរឿងរ៉ាវមួយនេះរហូតដល់ចុងបញ្ចប់ ហើយវានឹងអាចមានការផ្តន្ទាទោសចាស់ដៃ »៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ