CNN៖អារ៉ាប៊ីសាអូឌីតទំនងត្រៀមខ្លួនទទួលស្គាល់ការស្លាប់លោកហ្សាម៉ាល់ ខាស្ហូហ្ស៊ី
លោកប្រមុខការទូតអាមេរិកម៉ៃ ប៉ុមប៉េអូបានទៅដល់ប្រទេសអារ៉ាប៊ីសាអូឌីតនាថ្ងៃអង្គារ ទី១៦ តុលា។ កម្មវត្ថុ គឺចូលជួបសន្ទនាជាមួយព្រះមហាក្សត្រសាលម៉ានដើម្បីនិយាយពីការបាត់ខ្លួនលោកហ្សាម៉ាល់ ខាស្ហូហ្ស៊ី អ្នកកាសែតជនជាតិអារ៉ាប៊ីសាអូឌីត។ គួររម្លឹកថា លោកខាស្ហូហ្ស៊ីបានបាត់ដំណឹងសូន្យឈឹងតាំងពីថ្ងៃទី២ តុលា បន្ទាប់ពីរូបគាត់បានចូលក្នុងស្ថានកុងស៊ុលអារ៉ាប៊ីសាអូឌីតប្រចាំទីក្រុងអ៊ីស្តង់ប៊ុល ប្រទេសតួកគី។ វត្តមានរបស់លោកប៉េអូលើទឹកដីអារ៉ាប៊ីសាអូឌីតពេលនេះបានធ្វើឡើង ក្រោយពីក្រុមប៉ូលិសតួកគីបានចូលឆែកឆេរក្នុងស្ថានកុងស៊ុលនោះអស់រយៈពេល ៨ម៉ោងនៅយប់ថ្ងៃចន្ទ ទី១៥ តុលា។ បើតាមទូរទស្សន៍ CNN អារ៉ាប៊ីសាអូឌីតទំនងជាត្រៀមខ្លួនទទួលស្គាល់ការស្លាប់លោកខាស្ហូហ្ស៊ី។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៧
ការហ៊ានអះអាងយ៉ាងដូចនេះដោយទូរទស្សន៍ CNN បានផ្អែកលើប្រភពពីរខុសគ្នា ហើយបញ្ជាក់ថាទីបំផុត អារ៉ាប៊ីសាអូឌីតទំនងនឹងទទួលស្គាល់ពីការស្លាប់លោកហ្សាម៉ាល់ ខាស្ហូហ្ស៊ីនៅក្នុងស្ថានកុងស៊ុលរបស់ខ្លួនប្រចាំទីក្រុងអ៊ីស្តង់ប៊ុល ប្រទេសតួកគីមែន។ ចំណែកការស្លាប់នោះទៀតសោតបានកើតមានឡើងក្នុងពេលសួរចម្លើយលោកខាស្ហូហ្ស៊ីពីសំណាក់ភ្នាក់ងារអារ៉ាប៊ីសាអូឌីត និងដែលការសួរចម្លើយនោះប្រហែលជាបានប្រព្រឹត្តទៅដោយមានការប្រទាញប្រទង់គ្នាខ្លាំង។
តាមដំណឹងថ្មីស្តីពីរឿងរ៉ាវមួយនេះដែលរដ្ឋាភិបាលអារ៉ាប៊ីសាអូឌីតកំពុងរៀបចំ និងដែល CNN បានបញ្ជាក់នោះគឺថា ក្រុមជនដៃដល់ដែលបានសម្លាប់លោកខាស្ហូហ្ស៊ីអាចជាក្រុមមនុស្សដែលបញ្ជូនពីអារ៉ាប៊ីសាអូឌីតទៅទឹកដីតួកគីដោយគ្មានការបញ្ជាពីរដ្ឋអំណាចថ្នាក់កំពូលនៅអារ៉ាប៊ីសាអូឌីតទេ។ គេអាចនិយាយបានដោយខ្លីថា ទីក្រុងរីយ៉ាដត្រៀមខ្លួនទទួលស្គាល់ការស្លាប់លោកហ្សាម៉ាល់ ខាស្ហូហ្ស៊ីនៅក្នុងស្ថានកុងស៊ុលប្រចាំទីក្រុងអ៊ីស្តង់ប៊ុលមែន តែខ្លួនមិនមានជាប់ពាក់ព័ន្ធនឹងឃាតកម្មនោះឡើយ។
នាព្រឹកថ្ងៃចន្ទ ទី១៥ តុលា និងមុនដាក់ជើងឈានឡើងឧទ្ធម្ភាគចក្រ លោកប្រធានាធិបតីអាមេរិកដូណាល់ ត្រាំបានលើកឡើងពីឃាតករថោកទាប បន្ទាប់ពីលោកបានជួបសន្ទនាជាមួយព្រះមហាក្សត្រអារ៉ាប៊ីសាអូឌីតសាលម៉ានតាមទូរស័ព្ទ។ « មហាក្សត្រសាលម៉ានបានបដិសេធថា ព្រះអង្គមិនបានដឹងរឿងរ៉ាវអ្វីទាំងអស់។ បើតាមមើលទៅខ្ញុំគិត អ្នកសម្លាប់លោកខាស្ហូហ្ស៊ីអាចជាឃាតករយូកូម » នេះជាការថ្លែងរបស់លោកត្រាំ។ យ៉ាងណាក៏ដោយ ការថ្លែងរបស់លោកត្រាំយ៉ាងដូចនេះបានទទួលការបរិហារពីក្រុមអ្នកប្រជាធិបតេយ្យ។ « ទ្រឹស្តីស្តីពីឃាតករថោកទាបជារឿងគួរឲ្យអស់សំណើច។ វាជារឿងអស្ចារ្យមែនទែនដែលប្រធានាធិបតីអាមេរិកបានបញ្ចេញប្រតិកម្មក្នុងនាមជាអ្នកនាំពាក្យឲ្យមហាក្សត្រអារ៉ាប៊ីសាអូឌីត » នេះជាសារឌឺដងរបស់សមាជិកព្រឹទ្ធសភាអាមេរិកម្នាក់សរសេរលើបណ្តាញសង្គម Twitter៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ