អាមេរិក៖ហេតុអ្វីបានជាលោកដូណាល់ ត្រាំកំចាត់លោក Jeff Sessions ពីតំណែងរដ្ឋមន្រ្តីក្រសួងយុត្តិធម៌?
ចុះផ្សាយនៅថ្ងៃ៖
ស្តាប់ - ០៦:១៥
នៅសហរដ្ឋអាមេរិក លោកប្រធានាធិបតីដូណាល់ ត្រាំបានដកតំណែងរដ្ឋមន្រ្តីក្រសួងយុត្តិធម៌ពីលោក Jeff Sessions។ លោកត្រាំបានប្រាប់ដំណឹងមួយនេះតាមរយៈសារនៅក្នុងបណ្តាញសង្គម Twitter របស់លោក។ ការបញ្ឈប់តំណែងលោក Jeff Sessions ត្រូវបានធ្វើឡើង មួយថ្ងៃក្រោយការបោះឆ្នោតពាក់កណ្តាលអាណត្តិដែលគណបក្សសាធារណរដ្ឋរបស់លោកត្រាំបានបាត់បង់សម្លេងភាគច្រើននៅក្នុងរដ្ឋសភា តែបានកើនសម្លេងបន្ថែមនៅក្នុងព្រឹទ្ធសភា។ ប្រតិកម្មនៃការដកតំណែងលោក Jeff Sessions បានបន្តធ្លាក់មកជាបន្តបន្ទាប់ មានទាំងពីគណបក្សសាធារណរដ្ឋ និងគណបក្សប្រជាធិបតេយ្យដែលទើបទទួលបានសម្លេងភាគច្រើននៅក្នុងរដ្ឋសភា។ ខណៈនេះ តំណែងរដ្ឋមន្រ្តីក្រសួងយុត្តិធម៌ត្រូវបានលោកត្រាំប្រគល់ឲ្យលោក Matthew Whitaker កាន់ជាបណ្តោះអាសន្ន។
ការដែលលោកដូណាល់ ត្រាំបានបញ្ឈប់លោក Jeff Sessions ពីតំណែងរដ្ឋមន្រ្តីក្រសួងយុត្តិធម៌មិនបានធ្វើឲ្យគ្រប់គ្នាភ្ញាក់ផ្អើលប៉ុន្មានទេ ឬអាចថាជារឿងដែលគ្រប់គ្នាបានទន្ទឹងរង់ចាំ រួមទាំងរូបលោក Jeff Sessions ខ្លួនឯងផង។ ជាផ្លូវការ លោកដូណាល់ ត្រាំបានយល់ព្រមតាមលិខិតសុំលាចុះពីតំណែងរបស់លោក Jeff Sessions ដែលនៅក្នុងលិខិតនោះមិនបានចុះថ្ងៃខែទេ តែនៅក្រៅផ្លូវការវិញ គឺលោក Jeff Sessions បានសុខចិត្តចុះចេញពីតំណែងតាមសំណើរបស់លោកដូណាល់ ត្រាំ។ បើនិយាយតាមភាសាសាមញ្ញ លោក Sessions ត្រូវបានលោកត្រាំបង្ខំឲ្យដកខ្លួនចេញ។ បន្ទាប់ពីត្រូវបានលោកត្រាំជ្រើសឲ្យធ្វើជារដ្ឋមន្រ្តីក្រសួងយុត្តិធម៌នាដើមខែកុម្ភៈ ឆ្នាំ ២០១៧ លោក Jeff Sessions ក៏បានក្លាយជាផ្ទាំងស៊ីបនៃការវាយប្រហាររបស់លោកត្រាំក្នុងខែមីនាឆ្នាំ ២០១៧ ពោលក្រោយពីលោក Sessions បានដកខ្លួនចេញពីការស៊ើបអង្កេតរបស់រដ្ឋអាជ្ញាពិសេសលោក Robert Mueller លើរឿងរ៉ាវជាប់ពាក់ព័ន្ធរវាងរុស្ស៊ី និងក្រុមឃោសនាបោះឆ្នោតរបស់លោកត្រាំនៅក្នុងសម័យបោះឆ្នោតប្រធានាធិបតីឆ្នាំ ២០១៦។
សូមជម្រាបថា បន្ទាប់ពីបានដកខ្លួនចេញដោយសារតែមានជាប់ពាក់ពន័្ធនឹងរឿងរ៉ាវមួយនេះដែរ លោក Sessions ក៏បានចាត់តាំងលោក Rod Rosenstein ដែលជាអនុរដ្ឋមន្រ្តីឲ្យទទួលបន្ទុកគ្រប់គ្រងលើការងារស៊ើបអង្កេតរបស់រដ្ឋអាជ្ញាពិសេសលោក Robert Mueller។ ទង្វើមួយនេះត្រូវបានលោកត្រាំចាត់ទុកលោក Sessions ជារដ្ឋមន្រ្តីទន់ខ្សោយ និងគ្មានសមត្ថភាពការពាររូបលោក។ នៅដើមខែសីហាកន្លងទៅថ្មីៗនេះ លោកត្រាំក៏បានស្នើលោក Sessions ឲ្យបិទបញ្ចប់ការស៊ើបអង្កេតរបស់លោករដ្ឋអាជ្ញាពិសេស Robert Mueller ដែរ តែគ្មានចម្លើយអ្វីពីលោក Sessions ឡើយ។ មានអាយុ ៧១ឆ្នាំ លោក Sessions ក៏ជាមនុស្សជំនិតម្នាក់របស់លោកត្រាំដែលបានចេញមុខគាំទ្របេក្ខជនលោកត្រាំនៅក្នុងសម័យឃោសនាបោះឆ្នោតប្រធានាធិបតីឆ្នាំ ២០១៦។
លោក Matthew Whitaker ជានរណា?
មានអាយុ ៤៩ឆ្នាំ លោក Matthew Whitaker ជានាយកខុទ្ទកាល័យនៅក្នុងក្រសួងយុត្តិធម៌ អតីតរដ្ឋអាជ្ញាសហព័ន្ធ និងធ្លាប់បានឈរឈ្មោះជាបេក្ខជនប្រកួតប្រជែងក្នុងបក្សសាធារណរដ្ឋដើម្បីតំណែងអភិបាលរដ្ឋ Iowa។ នៅក្នុងខែសីហា ឆ្នាំ ២០១៧ លោក Matthew Whitaker ធ្លាប់បានចុះផ្សាយបទអត្ថាធិប្បាយមួយនៅក្នុងកាសែតទាក់ទងនឹងដំណើរការស៊ើបអង្កេតរបស់លោករដ្ឋអាជ្ញាពិសេស Robert Mueller លើរឿងរ៉ាវជាប់ពាក់ព័ន្ធរវាងរុស្ស៊ី និងក្រុមឃោសនាបោះឆ្នោតរបស់លោកត្រាំនៅក្នុងសម័យបោះឆ្នោតប្រធានាធិបតីឆ្នាំ ២០១៦។ នៅក្នុងបទអត្ថាធិប្បាយកាលណោះ លោក Matthew បានស្តីពីបន្ទោសលោក Mueller ពីបទបានផ្តោតការស៊ើបអង្កេតលើហិរញ្ញវត្ថុរបស់លោកត្រាំ ហើយបានស្នើលោក Rod Rosenstein ដែលជាអនុរដ្ឋមន្រ្តីយុត្តិធម៌ឲ្យកម្រិតអំណាចស៊ើបអង្កេតរបស់លោក Mueller។
លោក Matthew បានយល់ឃើញថា ដំណើរការស៊ើបអង្កេតរបស់លោក Mueller ហាក់ជ្រុលបន្តិច។ ក្រោយពីបានទទួលតំណែងរដ្ឋមន្រ្តីភ្លាម ទោះបណ្តោះអាសន្នក្តី លោក Matthew បានសន្យាដឹកនាំក្រសួងយុត្តិធម៌ដោយទទួលបញ្ជា និងស្តាប់តាមការណែនាំរបស់ថ្នាក់លើ។ តាមរយៈពាក្យសម្តីនេះនាំឲ្យគេយល់បានថា លោក Matthew នឹងចូលខ្លួនអន្តរាគមន៍លើការស៊ើបអង្កេតរបស់លោក Mueller ហើយរូបលោកត្រាំយល់មិនច្រឡំទេថា ជម្រើសរបស់គាត់ពិតជាមិនខុសឡើយ។ ចំណែកមធ្យោបាយឃោសនាមហាជនអាមេរិកផ្សេងទៀតក៏បានយល់ឃើញដូចគ្នាថា ជាមួយនឹងវត្តមានលោក Matthew ជារដ្ឋមន្រ្តីយុត្តិធម៌ ការស៊ើបអង្កេតរបស់លោក Mueller អាចនឹងត្រូវរឹតត្បិត។
គណបក្សប្រជាធិបតេយ្យបរិហារលើការព្យាយាមលូកដៃរបស់លោកត្រាំ
ក្រៅពីប្រតិកម្មរបស់គណបក្សប្រជាធិបតេយ្យដែលទើបទទួលបានសម្លេងភាគច្រើននៅក្នុងរដ្ឋសភានាការបោះឆ្នោតពាក់កណ្តាលអាណត្តិនាថ្ងៃអង្គារ ៦ វិច្ឆិកា ក៏គេឃើញមានប្រតិកម្មពីគណបក្សសាធារណរដ្ឋរបស់លោកដូណាល់ ត្រាំដែរ។ អ្វីដែលពួកអ្នកសាធារណរដ្ឋខ្លះចង់បាន គឺការបន្តការងារស៊ើបអង្កេតរបស់លោករដ្ឋអាជ្ញាពិសេស Mueller ដល់ទីបញ្ចប់ដើម្បីចង់ដឹងថា តើរុស្ស៊ីមានបានលូកដៃកកូរកកាយរឿងបោះឆ្នោតប្រធានាធិបតីអាមេរិកកាលពីឆ្នាំ ២០១៦ ឬអត់។ ចំណែកនៅខាងគណបក្សប្រជាធិបតេយ្យវិញអ្នកខ្លះបានទាមទារឲ្យរដ្ឋមន្រ្តីយុត្តិធម៌ថ្មីលោក Matthew ដកខ្លួនចេញឲ្យឆ្ងាយពីការស៊ើបអង្កេតរបស់លោក Mueller។
ចំណែកអ្នកខ្លះទៀតបានបរិហារលោកត្រាំចាស់ដៃពីការដែលលោកបានលូកដៃចូលកិច្ចការផ្ទៃក្នុងរបស់លោក Mueller។ ទន្ទឹមគ្នានេះ ក្រុមអ្នកប្រជាធិបតេយ្យដែលទើបមានទឹកមាត់ប្រៃឡើងវិញនៅក្នុងរដ្ឋសភាក៏ចង់ស្វែងរកសាក្សី និងឯកសារដើម្បីចង់ដឹងថា តើមានភស្តុតាងដែលអាចបញ្ជាក់ពីការរារាំងរបស់លោកត្រាំលើដំណើរការស៊ើបអង្កេតរបស់លោក Mueller ដែរ ឬអត់?។ រឿងរ៉ាវបន្ទាប់នឹងមានអ្វីខ្លះនោះ គេត្រូវរង់ចាំមើលនាពេលខាងមុខ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ