មានទស្សនៈផ្ទុយនឹងលោកត្រាំ រដ្ឋមន្ត្រីការពារជាតិអាមេរិកលាលែងពីតំណែង
ចុះផ្សាយនៅថ្ងៃ៖
ស្តាប់ - ០៦:៥៤
ប្រមុខដឹកនាំមន្ទីរបញ្ចកោណ បានសម្រេចចិត្តលាលែងចេញតំណែង ! លោករដ្ឋមន្ត្រីការពារជាតិអាមេរិក ជីម ម៉ាទីស ជ្រើសរើស ការដើរចេញពីតួនាទី ក្រោយសេចក្តីប្រកាសរបស់លោកដូណាល់ ត្រាំ ដកកងទ័ពអាមេរិកចេញពីស៊ីរី។ ការលាលែងនេះជាសារបញ្ជាក់ថា លោកឧត្តមសេនីយ៍ ផ្កាយបួន ប្រឆាំងនឹងយុទ្ធសាស្ត្រថ្មីរបស់សេតវិមាន។ ដូចទម្លាប់ លោកប្រធានាធិបតីអាមេរិកបានជូនដំណឹងតាមសារទ្វីតទ័រ អរគុណលោករដ្ឋមន្ត្រីការពារជាតិ ដែលបានបម្រើជាតិ និងដែលត្រូវចាកចេញពីតួនាទី ទៅចូលនិវត្តន៍។
ក្រសួងការពារជាតិអាមេរិកបានផ្សព្វផ្សាយជាសាធារណៈ លិខិតសុំលាលែងចេញពីតំណែងរបស់លោក ជីម ម៉ាទីស Jim Mattis។ ជាការលាលែងដែលនឹងចាប់មានសុពលភាព នៅចុងខែកុម្ភៈ ឆ្នាំ២០១៩ (ដើម្បីទុកពេលឱ្យសេតវិមានរកអ្នកថ្មីមកជំនួស)។ នៅក្នុងលិខិត លោកម៉ាទីសបានសរសេរត្រង់ៗថា “ដោយអ្នកមានសិទ្ធិជ្រើសរើសរដ្ឋមន្ត្រីការពារជាតិដែលមានទស្សនៈស្របនឹងលោក ខ្ញុំគិតថាល្អបំផុតដែលខ្ញុំត្រូវដកខ្លួនចេញ"។
ឃ្លានេះអាចឱ្យយើងកាត់យល់បានថា លោកម៉ាទីស មានជំហរមិនត្រូវគ្នាជាមួយនឹងលោកប្រធានាធិបតី ដូណាល់ត្រាំ និងមិនអាចធ្វើការជាមួយគ្នាបានទៀតឡើយ។ ភាពមិនចុះសម្រុងនឹងគ្នា បានចាប់លេចឡើងតាំងពីខែតុលាមកម្ល៉េះ។ នៅក្នុងបទសម្ភាសន៍មួយ លោក ដូណាល់ ត្រាំ បានបង្ហាញលក្ខណៈត្រៀមដើរបែកផ្លូវពីលោកម៉ាទីស ដោយពន្យល់ថាលោករដ្ឋមន្ត្រីមានជំហរដូចអ្នកប្រជាធិបតេយ្យ។
គោរពសម្ព័ន្ធមិត្ត
ដូច្នេះមានន័យថា សំណុំរឿងដកកងទ័ពស៊ីរី ប្រៀបបាននឹងទឹកមួយដំណក់ ដែលគេចាក់ លើកែវពេញស្រាប់ ឱ្យហៀតែប៉ុណ្ណោះ។ អ្វីដែលគួរឱ្យកត់សម្គាល់ខ្លាំង គឺអត្ថន័យនៃលិខិតសុំលាលែងចេញតំណែងដែលមានដល់មួយទំព័រកន្លះ រៀបរាប់យ៉ាងលម្អិតអំពីការយល់ឃើញខុសគ្នារវាងលោក និងប្រធានាធិបតី តែដោយមិននិយាយចំៗ ពីការដកទ័ពអាមេរិកចេញពីស៊ីរីឡើយ។
ដើម្បីសម្តែងការប្រឆាំងនឹងសេចក្តីសម្រេចដកកងទ័ព២០០នាក់ពីស៊ីរី ឱ្យបានឆាប់ លោក ម៉ាទីស បានបញ្ជាក់ថា “ខ្ញុំក៏យល់ដូចអ្នក ទាហានអាមេរិកមិនមែនជាកងអាវុធហត្ថរបស់ពិភពលោកទេ ! ប៉ុន្តែត្រូវគោរពសម្ព័ន្ធមិត្តខ្លះផង” ! សម្រាប់លោកម៉ាទីស អាមេរិកត្រូវប្រឹងឱ្យអស់ពីលទ្ធភាពក្នុងការសម្រួលសណ្តាប់ធ្នាប់អន្តរជាតិ ដើម្បីសន្តិសុខអាមេរិក ដើម្បីរក្សាតម្លៃអាមេរិក និងដើម្បីភាពរឹងមាំ តាមរយៈសាមគ្គីភាពជាមួយសម្ព័ន្ធមិត្ត (មិនគួរទុកសម្ព័ន្ធមិត្ត គួដ ឱ្យនៅហេហាលលើសមរភូមិតែឯងទេ)។
ដកទ័ពចេញពីអាហ្វហ្កានីស្ថាន
ទាក់ទងនឹងការដកកងទ័ពអាមេរិកចេញពីអាហ្វហ្កានីស្ថានវិញ លោក ម៉ាទីស មានជំហរប្រឆាំងតាំងតែដើមមក ! កាលពីឆ្នាំមុន លោករដ្ឋមន្ត្រីការពារជាតិ បានថែមទាំងអាចបញ្ចុះបញ្ចូលលោកត្រាំ ឱ្យដំឡើងកម្លាំងទាហាន ព្រោះខណៈនេះពួកតាលីបង់ កំពុងមានប្រៀបលើកងកម្លាំងអាហ្វហ្កានីស្ថានផង។ សម្រាប់ស្ទើរគ្រប់អ្នកជំនាញ ការដកកងទ័ពអាមេរិកចេញពីអាហ្វហ្កានីស្ថាន គឺដូចជាបើកឱកាសឱ្យពួកតាលីបង់បានទទួលជោគជ័យតាក់ទិក ដោយមិនបាច់ប្រឹងធ្វើសម្បទានអ្វី។
ប៉ុន្តែនៅថ្ងៃនេះ ក្រោយពីលោកម៉ាទីសបានប្រកាសលាលែងចេញពីតំណែង លោកត្រាំ ក្រលាស់ចិត្ត ត្រលប់មកប្រកាន់ជំហរដើមវិញ។ ក្រោយពីបានប្រកាសដកកងទ័ពចេញពីស៊ីរីបានមួយថ្ងៃ អាមេរិកក៏បានសម្រេចដកកងទ័ពទ្រង់ទ្រាយធំចេញពីអាហ្វហ្កានីស្ថានទៀត។ ហើយបើតាមសារព័ត៌មានអាមេរិក លោកប្រធានាធិបតី ត្រាំ គ្រោងដកទ័ពអាមេរិកចំនួន៧ពាន់នាក់ ក្នុងចំណោម១៤០០០នាក់ ដែលដាក់ពង្រាយលើដីអាហ្វហ្កានីស្ថាន តាំងពី១៧ឆ្នាំមុនមក។
សេចក្តីសម្រេចចិត្តនេះ បានធ្វើគ្រប់ភាគីនយោបាយខាកចិត្ត និងព្រួយបារម្ភ ព្រមទាំងសោកស្តាយការចាកចេញរបស់លោក ម៉ាទីស។
លោក ម៉ាទីស ជានិម្មិត្តរូបនៃស្ថិរភាព
គិតចាប់តាំងពីលោក ត្រាំបានឡើងកាន់អំណាចមក មានមន្ត្រីស្និទ្ធ ជំនិត និងសំខាន់ៗមិនតិចជាង១០នាក់ទេ ដែលត្រូវបានខ្ទាតចេញពីតំណែង។ លោក ម៉ាទីស អតីតឧត្តមសេនីយ៍ទ័ពម៉ារីន ត្រូវបានគេចាត់ទុកថាជាអ្នកមានអាយុជីវិតវែងឆ្ងាយជាងគេនៅក្នុងរដ្ឋបាលលោកត្រាំ។ លោកធ្លាប់មានឥទ្ធិពលគួរឱ្យកត់សម្គាល់ ជាពិសេសនៅក្នុងសំនុំរឿងសូម៉ាលី យេម៉ែន ឬក្នុងការសម្រេចពង្រាយទ័ពនៅស៊ីរី និងអ៊ីរ៉ាក់ ... ប៉ុន្តែទម្ងន់ឥទ្ធិពលរបស់លោក ចាប់សាបរលាបបន្តិចម្តងៗ សម្រាប់ក្រសែភ្នែកលោក ត្រាំ នៅពេលអតីតប្រមុខការទូតអាមេរិក រិច Tillerson និងទីប្រឹក្សាសន្តិសុខជាតិ ត្រូវបានដកចេញពីតំណែង។
មានអាយុ៦៨ឆ្នាំ មានងារជា ឆ្កែប្រយុទ្ធ (ដោយសារភាពពុះពារក្នុងសមរភូមិ ធ្លាប់ចូលប្រយុទ្ធនៅអ៊ីរ៉ាក់ និងអាហ្វហ្កានីស្ថាន) លោកម៉ាទីស ជាមនុស្សដែលបានទទួលការគោរពយ៉ាងខ្លាំងលើឆាកអន្តរជាតិ ព្រោះបានធ្វើឱ្យរដ្ឋបាលអាមេរិកអង្រួនដោយលោកត្រាំ មានលំនឹង។ លោកជាមនុស្សក៏កម្រម្នាក់ដែលជាគំរូនិងជាតំណាងនៃកម្លាំងនិងស្ថិរភាព របស់រដ្ឋាភិបាលអាមេរិក។ ហេតុដូច្នេះហើយបានជា មិនថាបក្សសាធារណរដ្ឋឬបក្សប្រជាធិបតេយ្យទេ សុទ្ធតែនាំគ្នាខកចិត្ត សោកស្តាយ និងព្រួយបារម្ភ នៅពេលឮដំណឹងថាលោក ម៉ាទីស ត្រូវដើរចេញពីតួនាទីនោះ។
នៅក្នុងសេចក្តីថ្លែងការណ៍ អ្នកសាធារណរដ្ឋ Marco Rubio បានចាត់ទុកអាមេរិកថាកំពុងលុងឆ្ពោះទៅក្នុងកំហុសនយោបាយកាន់តែជ្រៅ ដែលអាចបំផ្លាញចំណងសម្ព័ន្ធភាព។ ប្រធានព្រឹទ្ធសភា បក្សសាធារណរដ្ឋ បានសម្តែងការសោកស្តាយយ៉ាងខ្លាំង នៅពេលឃើញ មូលហេតុនៃការលាលែងពីតំណែងរបស់រដ្ឋមន្ត្រីការពារ បណ្តាលមកពីគំនិតផ្ទុយស្រឡះខ្លាំងជាមួយប្រធានាធិបតី លើគោលការណ៍ និងចំណុចសំខាន់ៗនៃភាពជាមេដឹកនាំពិភពលោករបស់អាមេរិក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ