អ.ស.ប.៖ក្រុមប្រឹក្សាសន្តិសុខទទួលសមាជិកថ្មីមិនអចិន្ត្រៃយ៍ចំនួន ៥ ប្រទេស
ចុះផ្សាយនៅថ្ងៃ៖
ស្តាប់ - ០៤:៤៦
ចាប់ពីថ្ងៃទី១ មករា ឆ្នាំថ្មី ២០១៩ មានប្រទេសចំនួន ៥ បានក្លាយជាសមាជិកថ្មីមិនអចិន្រ្តៃយ៍នៃក្រុមប្រឹក្សាសន្តិសុខអង្គការសហប្រជាជាតិសម្រាប់រយៈពេល ២ឆ្នាំ។ ប្រទេសសមាជិកថ្មីទាំង ៥ នោះមានអាហ្រ្វិកខាងត្បូង ឥណ្ឌូណេស៊ី សាធារណរដ្ឋដូមីនីក បែលហ្ស៊ិក និងប្រទេសអាល្លឺម៉ង់។ វត្តមានសមាជិកថ្មីទាំង ៥ប្រទេសបានកើតមានឡើងចំពេលដែលក្រុមប្រឹក្សាសន្តិសុខកំពុងជួបវិបត្តិផ្ទៃក្នុងយ៉ាងខ្លាំង ពិសេសប្រឈមនឹងជំហររឹងរូស និងមិនទៀងទាត់របស់លោកប្រធានាធិបតីអាមេរិកដូណាល់ ត្រាំ។ តែសម្រាប់ប្រទេសបារាំងដែលជាសមាជិកអចិន្រ្តៃយ៍ វត្តមានជាថ្មីរបស់ប្រទេសអាល្លឺម៉ង់ជាដំណឹងល្អមួយ។ តើជាមួយនឹងការផ្លាស់ប្តូរសមាជិកថ្មីពេលនេះ ក្រុមប្រឹក្សាសន្តិសុខអាចមានលទ្ធភាព និងសមត្ថភាពដោះស្រាយបញ្ហាពិភពលោកឲ្យមានប្រសិទ្ធិភាពជាងមុនដែរឬទេ?
អ្វីដែលគួរបញ្ជាក់ជាដំបូង ក្រុមប្រឹក្សាសន្តិសុខអង្គការសហប្រជាជាតិមានសមាជិកទាំងអស់ ១៥ប្រទេស ក្នុងនោះ មាន ៥ប្រទេសជាសមាជិកអចិន្ត្រៃយ៍ និង ១០ប្រទេសជាសមាជិកមិនអចិន្រ្តៃយ៍។ ៥ប្រទេសសមាជិកអចិន្ត្រៃយ៍មានសហរដ្ឋអាមេរិក រុស្ស៊ី ចិន បារាំង និងប្រទេសអង់គ្លេស។ សមាជិកអចិន្ត្រៃយ៍ទាំង ៥ប្រទេសនេះគ្មានការបោះឆ្នោតដោះដូរទេ តែសម្រាប់សមាជិកមិនអចិន្ត្រៃយ៍ទាំង ១០ប្រទេសវិញ គឺមានការបោះឆ្នោតដោះដូរថ្មីចំនួនពាក់កណ្តាលនៅរៀងរាល់ឆ្នាំ ហើយសមាជិកថ្មីមានអាណត្តិរយៈពេល ៥ឆ្នាំ។ ក្រុមប្រឹក្សាសន្តិសុខជាស្ថាប័នជាន់ខ្ពស់បំផុតរបស់អង្គការសហប្រជាជាតិ ហើយរាល់សេចក្តីសម្រេចរបស់ក្រុមប្រឹក្សាសន្តិសុខ គឺមានលក្ខណៈបង្ខិតបង្ខំតាមផ្លូវច្បាប់ ពោលខុសពីសេចក្តីសម្រេចរបស់អង្គការសហប្រជាជាតិ។
គេអាចនិយាយបានថា ក្រុមប្រឹក្សាសន្តិសុខជាអ្នកធានាថែរក្សាសន្តិភាព និងសន្តិសុខអន្តរជាតិ។ នេះជាទ្រឹស្តី តែការអនុវត្តជាក់ស្តែងជារឿងមួយផ្សេងទៅវិញ។ ជារឿងមួយផ្សេងព្រោះគេបានសង្កេតឃើញជាទូទៅថា មានប្រទេសសមាជិកខ្លះ ពិសេសប្រទេសមហាអំណាចបានប្រើវេទិកានៅក្រុមប្រឹក្សាសន្តិសុខដើម្បីគំរាមដាក់គ្នា និងការពារសម្ព័ន្ធមិត្តរបស់ខ្លួនក្នុងប្រយោជន៍ផ្ទាល់ខ្លួន។ មានវិបត្តិក្នុងលោកច្រើនណាស់ដែលក្រុមប្រឹក្សាសន្តិសុខមិនអាចអនុម័តសេចក្តីសម្រេចរួមបានដោយសារតែនិន្នាការ និងជំហរ។ ឧទាហរណ៍ជាក់ស្តែង វិបត្តិនៅក្នុងប្រទេសស៊ីរីដែលនៅម្ខាង រុស្ស៊ី រួមជាមួយសមាជិកមួយចំនួនបន្តគាំទ្ររបបដឹកនាំរបស់លោកប្រធានាធិបតីស៊ីរីអាសាដ និងនៅម្ខាងទៀត អាមេរិក រួមជាមួយសមាជិកខ្លះបន្តគាំទ្រពួកប្រឆាំងនៅស៊ីរី។
មន្រ្តីការទូតជាច្រើនបានសារភាពត្រង់ៗពីកង្វះឯកភាពនៅផ្ទៃក្នុងក្រុមប្រឹក្សាសន្តិសុខ និងទទួលស្គាល់ថា នៅក្នុងកិច្ចប្រជុំសាធារណៈ ឬបិទទ្វារ ការប៉ះទង្គិចពាក្យសម្តីមានច្រើនជាងការស្វែងរកកុងសង់ស៊ុសដើម្បីដោះស្រាយបញ្ហាប្រឈមនៅក្នុងលោក។ តើជាមួយនឹងការផ្លាស់ប្តូរសមាជិកថ្មីមិនអចិន្ត្រៃយ៍ចំនួន ៥ប្រទេសពេលនេះ ក្រុមប្រឹក្សាសន្តិសុខអាចនឹងមានឯកភាព ហើយអាចរួមកម្លាំងគ្នាដើម្បីដោះស្រាយបញ្ហាប្រឈមក្នុងលោកឲ្យមានប្រសិទ្ធិភាពជាងពេលកន្លងមកដែរ ឬទេ?។ នេះជាសំណួរដែលគេត្រូវរង់ចាំចម្លើយនាពេលខាងមុខ។ តែសម្រាប់ប្រទេសបារាំងដែលជាសមាជិកអចិន្ត្រៃយ៍មួយក្នុងចំណោមសមាជិកទាំង ៥ ហាក់មានសង្ឃឹមច្រើនចំពោះវត្តមានប្រទេសអាល្លឺម៉ង់ពេលនេះ។
សង្ឃឹមច្រើនព្រោះក្រុងប៉ារីសបានរកឃើញឡើងវិញនូវសម្ព័ន្ធមិត្តអឺរ៉ុបមួយរបស់ខ្លួន ចំពេលដែលប្រទេសអង់គ្លេសត្រៀមខ្លួនចេញពីសមាជិកសហភាពអឺរ៉ុបនៅខែមីនាខាងមុខ។ គួររម្លឹកថា នេះមិនមែនជាលើកទី១ ទេដែលប្រទេសអាល្លឺម៉ង់ជាប់ឆ្នោតជាសមាជិកមិនអចិន្រ្តៃយ៍នៃក្រុមប្រឹក្សាសន្តិសុខសម្រាប់រយៈពេល ២ឆ្នាំ។ អាល្លឺម៉ង់ធ្លាប់បានអង្គុយកៅអីមួយនេះចំនួន ៥ដងមកហើយ លើកទី១ ពីឆ្នាំ ១៩៧៧ ដល់១៩៧៨ លើកទី២ ពីឆ្នាំ ១៩៨៧ ដល់១៩៨៨ លើកទី៣ ពីឆ្នាំ ១៩៩៥ ដល់១៩៩៦ លើកទី៤ ពីឆ្នាំ ២០០៣ ដល់២០០៤ និងលើកទី៥ ពីឆ្នាំ ២០១១ ដល់២០១២។ ក្រុមមន្រ្តីការទូតសង្ឃឹមថា អាល្លឺម៉ង់នឹងប្រើឥទ្ធិពលរបស់ខ្លួនដើម្បីនិយាយជាមួយរុស្ស៊ីក្នុងការពន្លឿនដំណោះស្រាយឲ្យវិបត្តិស៊ីរី និងអ៊ុយក្រែន។
បន្ទាប់មក ប៊ែរឡាំងក៏ជាតួអង្គដ៏សំខាន់ដើម្បីរួមកម្លាំងជាមួយប្រទេសផ្សេងក្នុងការព្យាយាមរក្សាកិច្ចព្រមព្រៀងនុយក្លេអ៊ែរអ៊ីរ៉ង់ឆ្នាំ ២០១៥ ដែលលោកប្រធានាធិបតីអាមេរិកដូណាល់ ត្រាំបានដកខ្លួនចេញ។ បារាំង និងអាល្លឺម៉ង់រួមកម្លាំងគ្នាជាម៉ាស៊ីនដើម្បីផ្តល់សន្ទុះដំណើរការរបស់ក្រុមប្រឹក្សាសន្តិសុខ។ បារាំង និងអាល្លឺម៉ង់ចាប់ដៃធ្វើការរួមគ្នាជាសក្ខីកម្មដើម្បីបញ្ជាក់ពីទម្ងន់ និងទឹកមាត់ប្រៃរបស់អឺរ៉ុបនៅលើឆាកអន្តរជាតិ។ បន្ទាប់មក បារាំងក៏អាចពឹងពាក់លើការគាំទ្ររបស់សមាជិកមិនអចិន្ត្រៃយ៍ថ្មីមួយទៀត គឺប្រទេសបែលហ្ស៊ិក។
បើជាមួយនឹងការផ្លាស់ប្តូរថ្មីនេះ ក្រុមប្រឹក្សាសន្តិសុខនៅតែបន្តបែកបាក់ផ្ទៃក្នុងដដែល នៅសល់សេណារីយ៉ូមួយទៀតមិនអាចខ្វះបាន គឺការធ្វើកំណែទម្រង់ស៊ីជ្រៅនៅផ្ទៃក្នុងក្រុមប្រឹក្សាសន្តិសុខទាំងការរុះរើ ដោះដូរសមាជិកអចិន្ត្រៃយ៍ និងទាំងរបៀបជ្រើសរើសដោះដូរសមាជិកមិនអចិន្ត្រៃយ៍។ គ្រប់គ្នាបានមូលមតិ និងយល់ឃើញដូចគ្នាថា បរិបទពិភពលោកសព្វថ្ងៃមិនដូចគ្នានឹងបរិបទពិភពលោកកាលពីជាង ៧០ឆ្នាំមុនទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ