វ៉េណេស៊ុយអេឡា៖គណបក្សប្រឆាំងអំពាវនាវឲ្យមានបាតុកម្មដើម្បីរៀបចំបោះឆ្នោតឡើងវិញ
នៅក្នុងប្រទេសវ៉េណេស៊ុយអេឡា លោក Juan Guaido ប្រធានរដ្ឋសភាបានប្រកាសនាថ្ងៃសុក្រ ទី១១ មករាពីការត្រៀមខ្លួនដើម្បីកាន់អំណាចនៅក្នុងរដ្ឋាភិបាលអន្តរកាលមួយ។ ការប្រកាសរបស់ប្រធានរដ្ឋសភាបានធ្វើឡើង មួយថ្ងៃបន្ទាប់ពីលោកនីកូឡា ម៉ាឌុយរ៉ូបានស្បថចូលកាន់តំណែងប្រធានាធិបតីសម្រាប់អាណត្តិទី២។ គួររម្លឹកថា លោកម៉ាឌុយរ៉ូបានជាប់ឆ្នោតអាណត្តិថ្មីនាការបោះឆ្នោតក្នុងខែឧសភាកន្លងមក តែក្រុមគណបក្សប្រឆាំងបានធ្វើពហិកាមិនចូលរួម និងដែលសហគមន៍អន្តរជាតិមិនទទួលស្គាល់ទេ។ ក្រុមប្រឆាំងសង្ឃឹមលើការដាក់សម្ពោធពីសហគមន៍អន្តរជាតិ ហើយពេលនេះ គឺការគាំទ្រពីពលរដ្ឋទូទៅដើម្បីអាចឲ្យមានការរៀបចំបោះឆ្នោតឡើងវិញ។
ចុះផ្សាយនៅថ្ងៃ៖
ស្តាប់ - ០១:៥៨
ការថ្លែងយ៉ាងដូចនេះរបស់ប្រធានរដ្ឋសភាលោក Juan Guaido បានធ្វើឡើងនៅក្នុងអង្គមេទ្ទិញមួយក្នុងទីក្រុងការ៉ាកាស់។ លោក Guaido បានលើកយកមាត្រាចំនួន ៣ នៅក្នុងច្បាប់រដ្ឋធម្មនុញ្ញទៅសំអាងដើម្បីបញ្ជាក់ពីរដ្ឋាភិបាលមិនស្របច្បាប់របស់លោកប្រធានាធិបតីនីកូឡា ម៉ាឌុយរ៉ូសម្រាប់អាណត្តិទី២។ សម្រាប់លោក Guaido បើប្រធានាធិបតីម្នាក់លែងស្របច្បាប់ហើយ អំណាចនឹងត្រូវធ្លាក់ក្នុងកណ្តាប់ដៃរបស់ពលរដ្ឋ ហើយគឺមានតែពលរដ្ឋវ៉េណេស៊ុយអេឡា កងទ័ព និងសហគមន៍អន្តរជាតិទេដែលអាចផ្តល់អំណាចឲ្យយើងបាន។
នៅក្នុងន័យនេះ ប្រធានរដ្ឋសភាបានអំពាវនាវឲ្យមានមហាបាតុកម្មពលរដ្ឋនៅទូទាំងប្រទេសនាថ្ងៃទី២៣ មករាខាងមុខ។ ជម្រើសថ្ងៃទី២៣ នេះទៀតសោតក៏មិនមែនជាជម្រើសចៃដន្យដែរ ព្រោះវាជាថ្ងៃធ្លាក់ពីអំណាចរបស់អតីតអ្នកកាន់អំណាចផ្តាច់ការនៅវ៉េណេស៊ុយអេឡាក្នុងឆ្នាំ ១៩៥៨។ គេនៅមិនទាន់ដឹងថា តើការអំពាវនាវរបស់លោក Guaido ពេលនេះនឹងទទួលបានការគាំទ្រពីពលរដ្ឋកម្រិតណានោះទេ។ អ្វីដែលគេដឹង រដ្ឋាភិបាលបានបញ្ចេញប្រតិកម្មព្រមានខ្លាំងៗដាក់លោក Guaido។ លោកស្រីរដ្ឋមន្រ្តីទទួលបន្ទុកគ្រប់គ្រងពន្ធនាគារបានថ្លែងនៅក្នុងបណ្តាញសង្គម Twitter ថា បន្ទប់គុក និងសម្លៀកបំពាក់អ្នកទោសបានរៀបចំរួចរាល់អស់ហើយសម្រាប់លោក Guaido។
ឃើញថា ភាពតានតឹងជារឿងចៀសមិនរួចរវាងរដ្ឋាភិបាល និងគណបក្សប្រឆាំងនៅក្នុងក្បួនបាតុកម្មថ្ងៃទី២៣ មករា។ ក្រៅពីការចាប់ខ្លួនឥស្សរជននយោបាយជាយថាហេតុ ក៏អាចមានការវាយបង្រ្កាបយ៉ាងហិង្សា បង្ហូរឈាមលើហ្វូងបាតុករដូចដែលគេធ្លាប់បានឃើញក្នុងឆ្នាំ ២០១៧ ដែលមានមនុស្សស្លាប់ប្រមាណជា ១០០នាក់។ ទាំងនេះជាបញ្ហាប្រឈមមួយដែលគណបក្សប្រឆាំងត្រូវនិយាយជំនះពលរដ្ឋ ពិសេសកងទ័ពដែលទើបបានបង្ហាញជំហរគាំទ្រជាថ្មីចំពោះលោកនីកូឡា ម៉ាឌុយរ៉ូ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ