អាមេរិកមានសុទិដ្ឋិនិយមលើលទ្ធភាពក្នុងការការពារប្រជាជនតួកគី និងពលរដ្ឋគួដឌីស្ថានស៊ីរី
លោកប្រមុខការទូតអាមេរិក Mike Pompeo បន្តទស្សនកិច្ចមួយជុំតំបន់មជ្ឈិមបូព៌ា។ ថ្លែងនៅក្នុងទីក្រុងអាប៊ូដាប៊ី ប្រទេសអេមីរ៉ាអារ៉ាប់រួមនាថ្ងៃសៅរ៍ ទី១២ មករា លោក Pompeo បានសម្តែងសុទិដ្ឋិនិយមស្តីពីលទ្ធភាពដែលថា ពលរដ្ឋគួដឌីស្ថានស៊ីរីនឹងទទួលបានការការពារ ទោះបីជាអាមេរិកដកទ័ពរបស់ខ្លួនចេញពីស៊ីរីក៏ដោយ និងធានាថា ប្រជាជនតួកគីក៏មានសិទ្ធិក្នុងការ ការពារប្រទេសរបស់ខ្លួនប្រឆាំងទល់នឹងពួកភេរវនិយមដែរ។ ទន្ទឹមគ្នានេះ លោក Pompeo ក៏មិនភ្លេចនិយាយពីស្ថានការណ៍ទូទៅនៅក្នុងតំបន់មជ្ឈិមបូព៌ាដោយបានប្រកាសពីគម្រោងរៀបចំកិច្ចប្រជុំអន្តរជាតិថ្នាក់រដ្ឋមន្រ្តីនៅក្នុងប្រទេសប៉ូឡូញនាខែកុម្ភៈខាងមុខ។ គឺជាជំនួបកំពូលស្តីពីស្ថិរភាព សន្តិភាព សេរីភាព និងសន្តិសុខនៅតំបន់មជ្ឈិមបូព៌ា។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣០
គឺនៅក្រោយកិច្ចសន្ទនាតាមទូរស័ព្ទជាមួយសមភាគីតួកគីក្នុងថ្ងៃសៅរ៍ ទី១២ មករាដែលប្រមុខការទូតអាមេរិក Mike Pompeo បានបញ្ជាក់ថា លោកមានសុទិដ្ឋិនិយម និងជឿជាក់ក្នុងការសម្រេចបាននូវគោលដៅទាំងពីររួមគ្នា គឺការពារប្រជាជនតួកគី និងពលរដ្ឋគួដឌីស្ថានស៊ីរី បន្ទាប់ពីអាមេរិកដកទ័ពចេញពីទឹកដីស៊ីរី។ ការថ្លែងយ៉ាងដូចនេះរបស់លោក Pompeo បានកើតមានឡើង បន្ទាប់ពីទីប្រឹក្សាសន្តិសុខជាតិអាមេរិកលោកចន បុលតុនបានស្នើរដ្ឋាភិបាលតួកគីកុំឲ្យវាយប្រហារលើពួកគួដឌីស្ថានស៊ីរី។ សំណើមួយនេះបានបញ្ឆេះកំហឹងប្រធានាធិបតីតួកគីលោកអ៊ែរដូហ្កានដោយបានចាត់ទុកការនិយាយរបស់លោកបុលតុនថាជាកំហុសឆ្គងមួយធ្ងន់ធ្ងរ។
គួរបញ្ជាក់ថា តួកគី និងសហរដ្ឋអាមេរិកយល់ឃើញមិនដូចគ្នាទេចំពោះកម្លាំងគួដឌីស្ថានស៊ីរី។ សម្រាប់អាមេរិក និងប្រទេសបស្ចិមលោកមួយចំនួន ពួកគួដឌីស្ថានស៊ីរីជាដៃគូនៅក្នុងយុទ្ធនាការប្រឆាំងនឹងពួកជីហាតអង្គការរដ្ឋអ៊ីស្លាមនៅទឹកដីស៊ីរី។ តែស្រាប់តួកគីវិញ ពួកគួដឌីស្ថានស៊ីរីជាពួកភេរវជនដែលត្រូវកម្ទេចចោលដូចពួកជីហាតអង្គការរដ្ឋអ៊ីស្លាម។ ក្រៅពីចាប់អារម្មណ៍រឿងគួដឌីស្ថានស៊ីរី ប្រមុខការទូតអាមេរិកក៏បានផ្តោតការយកចិត្តទុកដាក់ចំពោះតំបន់មជ្ឈិមបូព៌ាជាលក្ខណៈទូទៅដែរ។ នៅក្នុងបទសម្ភាសន៍ជាមួយទូរទស្សន៍ Fox News ចាក់ផ្សាយក្នុងថ្ងៃសុក្រ ទី១១ មករា លោក Mike Pompeo បានប្រកាសឲ្យដឹងពីការរៀបចំកិច្ចប្រជុំអន្តរជាតិមួយស្តីពីស្ថិរភាព សន្តិភាព សេរីភាព និងសន្តិសុខនៅតំបន់មជ្ឈិមបូព៌ា។
កិច្ចប្រជុំអន្តរជាតិថ្នាក់រដ្ឋមន្រ្តីមួយនេះនឹងរៀបចំនៅថ្ងៃទី១៣ និង ១៤ ខែកុម្ភៈក្នុងប្រទេសប៉ូឡូញ។ សេចក្តីប្រកាសព័ត៌មានរួមគ្នារវាងអាមេរិក និងប៉ូឡូញបានប្រាប់ពីប្រធានរឿងដែលត្រូវជជែករួមមាន ភេរវនិយម ភាពជ្រុលនិយម ការអភិវឌ្ឃគ្រាប់មីស៊ីល និងរំសាយនុយក្លេអ៊ែរ ពាណិជ្ជកម្មផ្លូវសមុទ្រ និងសន្តិសុខ រួមទាំងការគំរាមដោយក្រុមជ្រុលនិយមដែលគាំទ្រដោយប្រទេសមួយចំនួននៅក្នុងតំបន់។ នៅក្នុងន័យនេះ អ៊ីរ៉ង់ត្រូវបានភាគីអាមេរិកចង្អុលចំមុខ។ ប្រតិកម្មតបភ្លាមៗ រដ្ឋមន្រ្តីការបរទេសអ៊ីរ៉ង់លោក Javad Zarif បានថ្លែងឌឺដងដាក់ប៉ូឡូញដែលបានចូលដៃជាមួយអាមេរិកប្រឆាំងអ៊ីរ៉ង់។
លោក Zarif បានរម្លឹកគុណរបស់អ៊ីរ៉ង់នៅក្នុងអតីតកាលដែលបានជួយយកអាសាពលរដ្ឋប៉ូឡូញចំនួន ១០០ ០០០នាក់នៅក្នុងសម័យសង្រ្គាមលោកលើកទី២៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ