អាមេរិក៖លោកដូណាល់ ត្រាំបញ្ចេញប្រតិកម្មប្រឆាំងនឹង FBI ពិសេសលោក James Comey
ចុះផ្សាយនៅថ្ងៃ៖
ស្តាប់ - ០៥:៣៥
នៅសហរដ្ឋអាមេរិក លោកប្រធានាធិបតីដូណាល់ ត្រាំបានបញ្ចេញប្រតិកម្មខ្លាំងៗនាថ្ងៃសៅរ៍ ទី១២ មករាប្រឆាំងនឹងស្ថាប័នស៊ើបការណ៍សម្ងាត់ FBI ពិសេស លោក James Comey។ ក៏ដូចជាទម្លាប់សព្វមួយដង លោកត្រាំបានបញ្ចេញប្រតិកម្មនៅក្នុងបណ្តាញសង្គម Twitter ដោយបានចាត់ទុកលោក Comey ជាមនុស្សកុហក និងជាសម្រាមមួយ។ ប្រតិកម្មក្តៅក្រហាយរបស់លោកត្រាំពេលនេះបានធ្វើឡើង បន្ទាប់ពីកាសែត New York Times ទើបបានទម្លាយព័ត៌មានមួយដែលបញ្ជាក់ថា ប៉ូលិសសហព័ន្ធបានបើកការស៊ើបអង្កេតមួយក្នុងឆ្នាំ ២០១៧ ដើម្បីចង់ដឹងថា តើលោកត្រាំមានបានធ្វើការងារជាប់ពាក់ព័ន្ធជាមួយប្រទេសរុស្ស៊ី ឬអត់។
លោក James Comey បានចូលកាន់មុខតំណែងជានាយក FBI ក្នុងថ្ងៃទី៤ កញ្ញា ឆ្នាំ ២០១៣ ក្នុងជំនាន់លោកប្រធានាធិបតីបារ៉ាក់ អូបាម៉ា។ ក្រោយការឡើងកាន់អំណាចប្រធានាធិបតីរបស់លោកដូណាល់ ត្រាំក្នុងថ្ងៃទី២០ មករា ឆ្នាំ ២០១៧ ទំនាក់ទំនងតានតឹងក៏បានកើតមានឡើងរវាងលោកត្រាំ និងលោក Comey។ នៅទីបំផុត លោកត្រាំបានសម្រេចដកតំណែងលោក Comey ក្នុងខែឧសភា ឆ្នាំ ២០១៧។ ការដកតំណែងលោក Comey ភ្លាមៗពេលនោះបានបង្កឲ្យមានប្រតិកម្មជាច្រើន ហើយក៏ហាក់បានស្ងប់ស្ងាត់ទៅវិញនៅពេលបន្ទាប់មក។ គឺទើបតែមានព័ត៌មានចុះផ្សាយដោយកាសែត New York Times ក្នុងថ្ងៃសុក្រ ទី១១ មករាដែលបានធ្វើឲ្យលោកត្រាំផ្ទុះកំហឹងជាថ្មីប្រឆាំងនឹងលោក Comey។
យោងតាមកាសែត New York Times នៅប៉ុន្មានថ្ងៃក្រោយការដកលោក Comey ពីតំណែងនាយក FBI ក្នុងឆ្នាំ ២០១៧ ស្ថាប័នស៊ើបការណ៍សម្ងាត់របស់អាមេរិកមួយនេះក៏បានបើកការស៊ើបអង្កេតដើម្បីចង់ដឹងថា តើលោកត្រាំមានបានធ្វើការងារជាប់ពាក់ព័ន្ធនឹងផលប្រយោជន៍ជាមួយប្រទេសរុស្ស៊ី ឬអត់?។ នៅក្នុងករណីមួយនេះ FIB ចង់ផ្តោតសំខាន់លើការលូកដៃជាយថាហេតុរបស់រុស្ស៊ីក្នុងការជួយលោកដូណាល់ ត្រាំឲ្យជាប់ឆ្នោតប្រឈមនឹងគូប្រជែងមកពីគណបក្សប្រជាធិបតេយ្យ គឺលោកស្រីហ៊ីលឡារី គ្លីនតុន។ បន្ទាប់មក FBI ក៏ចង់ដឹងពីហេតុផលដែលលោកត្រាំបានដកតំណែងលើក Comey។
តាម New York Times ដដែល FBI មានមន្ទិលសង្ស័យស្តីពីទំនាក់ទំនងជាយថាហេតុរវាងលោកត្រាំ និងរុស្ស៊ីតាំងពីនៅក្នុងយុទ្ធនាការឃោសនាបោះឆ្នោតរបស់លោកត្រាំក្នុងឆ្នាំ ២០១៦។ បន្ទាប់មក កាសែត New York Times ក៏បានទម្លាយឲ្យដឹងផងដែរពីការរួមសហការណ៍ស៊ើបអង្កេតលើសំណុំរឿងមួយនេះរវាង FBI និងរដ្ឋអាជ្ញាពិសេសលោក Robert Muellers។ តើព័ត៌មានចុះផ្សាយដោយកាសែត New York Times ពេលនេះជារឿងពិត ឬមួយជារឿងប្រឌិត។ខណៈនេះ FBI បានបដិសេធមិនធ្វើអត្ថាធិប្បាយអ្វីទាំងអស់។
លោកត្រាំនិយាយដៀមដាមដាក់ FBI និងប្រមាថលោកJames Comey
នៅក្នុងប្រតិកម្មក្តៅក្រហាយរបស់លោកត្រាំតាមរយៈបណ្តាញសង្គម Twitters គេហាក់មិនបានឃើញមានភស្តុតាងអ្វីដែលលោកត្រាំលើកយកទៅសំអាងដើម្បីច្រានចោលលើព័ត៌មានចុះផ្សាយដោយកាសែត New York Times ទេ។ អ្វីដែលលោកត្រាំបានសរសេរ គឺពាក្យដៀមដាមលើ FBI ដែលជាស្ថាប័នរបស់លោក និងសម្តីប្រមាថលើលោក James Comey។ លោកត្រាំបានចាត់ទុកអតីតនាយក FBI រូបនេះជាមនុស្សកុហក ជាសម្រាម និងជាប៉ូលិសអាក្រក់។ បន្ទាប់មក លោកត្រាំបានរម្លឹកឡើងវិញពីស្ថានភាពច្របូកច្របល់នៅផ្ទៃក្នុង FBI ក្រោមការដឹកនាំរបស់លោក James Comey និងបានចាត់ទុកថ្ងៃដកតំណែងលោក Comey ថាជាថ្ងៃមួយដ៏អស្ចារ្យសម្រាប់សហរដ្ឋអាមេរិក។
ក្រៅពីប្រតិកម្មរបស់លោកត្រាំដែលជាសមីខ្លួនផ្ទាល់ ក៏គេឃើញមានប្រតិកម្មពីថ្នាក់ដឹកនាំក្នុងរដ្ឋបាលលោកត្រាំ និងក្រុមអ្នកគាំទ្រលោកត្រាំ។ ប្រមុខការទូតលោក Mike Pompeo បានថ្លែងថា ព័ត៌មានចុះផ្សាយដោយកាសែត New York Times ជារឿងគួរឲ្យអស់សំណើច និងមិនសក្តិសមនឹងឆ្លើយតបទេ។ ចំណែកក្រុមអ្នកប្រជាធិបតេយ្យដែលជាក្រុមប្រឆាំងក៏បានបញ្ចេញប្រតិកម្មតបវិញដោយអះអាងថា អ្វីដែលលោកត្រាំបានឆ្លើយតបពេលនេះមិនអាចបិទបាំងនូវការពិតបានទេ។ លោក Jerrold Nadler តំណាងរាស្រ្តរបស់គណបក្សប្រជាធិបតេយ្យ និងជាប្រធានគណៈកម្មការទទួលបន្ទុកកិច្ចការតុលាការនៅក្នុងសភាបានបញ្ជាក់ពីភាពគ្មានមន្ទិលសង្ស័យលើការងារអាជីព ប្រាកដប្រជារបស់ FBI។
លោក Nadler ក៏បានប្រាប់ឲ្យដឹងផងដែរថា គណៈកម្មការរបស់លោកនឹងធ្វើការសិក្សាលើព័ត៌មានដែលចុះផ្សាយដោយកាសែត New York Times។ គួររម្លឹកថា រឿងរ៉ាវជុំវិញទំនាក់ទំនងជាយថាហេតុរវាងលោកដូណាល់ ត្រាំ និងប្រទេសរុស្ស៊ីមិនមែនជារឿងថ្មី ហើយលោកត្រាំតែងបដិសេធ រួចមិនញញើតនឹងទិតៀន វាយប្រហារលើការស៊ើបអង្កេតរបស់រដ្ឋអាជ្ញាពិសេសលោក Robert Mueller និងអតីតនាយក FBI លោក James Commey។ យ៉ាងណាក៏ដោយ ការពិតនឹងត្រូវលាតត្រដាងនៅប៉ុន្មានសប្តាហ៍ខាងមុខតាមរយៈលទ្ធផលស៊ើបអង្កេតរបស់លោក Robert Mueller៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ