លោក ត្រាំ ភ្ជាប់លក្ខខណ្ឌនៃការដកកងទ័ពអាមេរិកចេញពីស៊ីរី ទៅនឹងសន្តិសុខយុទ្ធជនគួដ ?
ចុះផ្សាយនៅថ្ងៃ៖
ស្តាប់ - ០៥:៤២
កាលពីខែធ្នូ ប្រធានាធិបតីអាមេរិកបានធ្វើសេចក្តីប្រកាសដ៏ភ្ញាក់ផ្អើលចង់ដកកងទ័ពអាមេរិកចេញពីស៊ីរី ! សេចក្តីសម្រេចបានរុញច្រានអាមេរិករបស់លោកត្រាំនិងតួកគីល្អួកល្អើននឹងគ្នាខ្លាំង។ ជិតមួយខែក្រោយមក ផែនការនៅជាផែនការ ! ភាពស្រពិចស្រពិលបានគ្របដណ្តប់លើតំបន់ដើមបូព៌ាទាំងមូល។ ប៉ុន្តែនៅចុងសប្តាហ៍នេះ នៅក្នុងសារទ្វីតមួយខ្សែ លោក ដូណាល់ ត្រាំ បែរជាប្តូរសំឡេង ដោយបានគំរាមបំផ្លាញសេដ្ឋកិច្ចតួកគី និងបានស្រែកឱ្យពួកគួដកុំផ្គើន ហើយបានរំលឹកថាអាមេរិកមិនមែនជាមិត្តរបស់រុស្ស៊ី អ៊ីរ៉ង់ និងស៊ីរីទេ។
ល្ងាចមិញនេះ លោក ដូណាល់ ត្រាំ បានប្រើពាក្យធ្ងន់ៗខ្លាំងណាស់ គំរាមតួកគី តាមរយៈការបង្ហោះសារទ្វីតថា អាមេរិកនឹងបំផ្លាញសេដ្ឋកិច្ចតួកគី ប្រសិនបើប្រទេសនេះហ៊ានវាយប្រហារលើពួកគួដ។ ជាមួយគ្នានោះ លោកប្រធានាធិបតីបានស្នើ ឱ្យបង្កើត “តំបន់សុវត្ថិភាព” ប្រវែង៣០គីឡូម៉ែត្រ ប៉ុន្តែលោកមិនបានផ្តល់ព័ត៌មានលម្អិតថាតើតំបន់សន្តិសុខនោះ ស្ថិតនៅទីណា ចំណុចណា និងតើនរណាជាអ្នកផ្តល់ហិរញ្ញវត្ថុឡើយ។
ទន្ទឹមគ្នានោះដែរ លោក ដូណាល់ ត្រាំ ក៏បានអំពាវនាវឱ្យភាគីយុទ្ធជនគួដ កុំធ្វើអ្វីដែលជាការផ្គើនដល់រដ្ឋាភិបាលតួកគីឱ្យសោះ។ រុស្ស៊ី អ៊ីរ៉ង់ ស៊ីរី បានផលចំណេញពីនយោបាយប្រយុទ្ធប្រឆាំងនឹងអង្គការរដ្ឋអ៊ីស្លាមរបស់អាមេរិក យូរពេលមកហើយ។ អាមេរិកក៏បានផល យកឈ្នះពួកជីហាតដែរ តែដល់វេលាដែលទាហានអាមេរិកត្រូវត្រលប់មកផ្ទះវិញ ! ឈប់ធ្វើសង្គ្រាមគ្មានទីបញ្ចប់ !
សេចក្តីប្រកាសរបស់លោក ដូណាល់ ត្រាំនេះ ធ្វើឡើងក្នុងខណៈ ដែលតួកគីនិងអាមេរិកកំពុងឆ្លងកាត់សម្ពាធដ៏តានតឹងនឹងគ្នា ជុំវិញជោគវាសនាយុទ្ធជនគួដ និងក្នុងខណៈដែលរដ្ឋមន្ត្រីការបរទេសអាមេរិកលោក ម៉ាយ ប៉ុមប៉េអូ កំពុងបំពេញទស្សនកិច្ចនៅតំបន់ដើមបូព៌ា។ ប្រមុខការទូតអាមេរិក ចង់ផ្តល់ការធានាអះអាងនិងស្វែងរកការពារឱ្យយុទ្ធជនគួដ ដែលបានកាន់អាវុធជាមួយកងទ័ពអាមេរិក ក្នុងការប្រយុទ្ធប្រឆាំងនឹងពួកអង្គការរដ្ឋអ៊ីស្លាម។
តួកគីអំពាវនាវឱ្យអាមេរិកលើកកិត្តិយសប្រទេសដៃគូ
គាំទ្រដោយតួកគី ការដកកងទ័ពអាមេរិកចេញពីស៊ីរី នឹងធ្វើក្រុមយុទ្ធជនគួដនៅស៊ីរី ចុះទន់ខ្សោយ ហើយងាយរងការវាយប្រហារពីសំណាក់តួកគីបានគ្រប់ពេល។ សម្រាប់អង់ការ៉ា ក្រុមប្រដាប់អាវុធគួដ (YPG) ជាក្រុមភេរវនិយម ព្រោះមានចំណងទាក់ទងនឹងបក្សពលករគួដ (PKK) ដែលបានដឹកនាំចលនាឧទ្ទាមលើទឹកដីតួកគី តាំងពីឆ្នាំ១៩៨៤មក។ ដើម្បីកុំឱ្យក្រុមគួដ កកើតជា “រដ្ឋ” នៅជាប់របងតួកគី ឬយូរទៅអាចទាមទារផ្តាច់ទឹកដីពីតួកគីបាន តួកគីមិនដែលលាក់បាំងគម្រោងចង់បើកប្រតិបត្តិការប្រយុទ្ធប្រឆាំងនឹងក្រុមគួដ (YPG) នៅស៊ីរីនេះទេ។
ហេតុដូច្នេះហើយ បានជាគ្រាន់តែបានឃើញសារទ្វីតរបស់លោកត្រាំ ដែលមានន័យចង់ភ្ជាប់លក្ខខណ្ឌនៃការដកកងទ័ពអាមេរិកចេញពីស៊ីរី ជាមួយនឹងការធានាសន្តិសុខឱ្យយុទ្ធជនគួដភ្លាម តួកគីក៏បានបញ្ចេញប្រតិកម្មវិញភ្លែត ថា តួកគីរង់ចាំមើលសហរដ្ឋអាមេរិកផ្តល់កិត្តិយសដល់ដៃគូយុទ្ធសាស្ត្រ។ អ្នកនាំពាក្យរបស់ប្រធានាធិបតីតួកគី បានថែមទាំងព្រមានតបវិញថា តួកគីនឹងបន្តប្រយុទ្ធប្រឆាំងនឹង ក្រុមប្រដាប់អាវុធគួដដដែល គឺប្រយុទ្ធប្រឆាំងនឹង ពួកភេរវនិយម មិនមែនតួកគីប្រយុទ្ធប្រឆាំងនឹងពលរដ្ឋគួដទេ។ តួកគីមិនចាញ់សំឡុតនរណាទាំងអស់ ! គំរាមតួកគីផ្នែកសេដ្ឋកិច្ច គ្មាននាំទៅសម្រេចផលអ្វីទេ។ ប៉ុន្តែតួកគីមិនច្រានចោលគំនិតចង់បង្កើតតំបន់សន្តិសុខតាមបណ្តោយព្រំដែន របស់លោកត្រាំឡើយ ព្រោះគំនិតនេះតួកគីធ្លាប់បានស្នើជាច្រើនលើកសាមកហើយ។
កាលពីខែមុន ក្នុងពេលប្រកាសដកកងទ័ពអាមេរិកចេញពីស៊ីរី ដ៏គួរឱ្យភ្ញាក់ផ្អើលនោះ លោក ត្រាំ ពិតជាមិនបានវាស់វែងឃើញអំពីផលវិបាកសម្រាប់តំបន់ដើមបូព៌ាទេ។ លោក គិតឃើញតែម្យ៉ាង គឺគោរពពាក្យសន្យាពេលឃោសនាបោះឆ្នោត នាំទាហានអាមេរិកត្រលប់មកផ្ទះវិញ។
ដល់តែសម្រេចហើយ ទើបឃើញមានភាពច្របូកច្របល់នៅក្នុងតំបន់។ តាំងពីពេលនោះមក លោក ត្រាំ បានបញ្ជូនរដ្ឋមន្ត្រីការបរទេស ទីប្រឹក្សាសន្តិសុខ ឱ្យចុះទៅជួបប្រទេសជាសម្ព័ន្ធមិត្តនៅក្នុងតំបន់ ដើម្បីធានាអះអាង និងផ្តល់ទំនុកចិត្តដល់ប្រទេសជាដៃអាមេរិក។ ប៉ុន្តែមិនដឹងថា តើកិច្ចខិតខំប្រឹងប្រែងរបស់ពួកគេ ប៉ុន្មានសប្តាហ៍មកនេះ អាចទប់រួចនឹងទម្ងន់សារទ្វីតរបស់លោកប្រធានាធិបតី ដែលបង្ហោះស្ទើរគ្មានលួសថ្ងៃនោះ បានដែលឬយ៉ាងណាទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ